ރަބަތް، މޮރޮކޯ (ޑިސެމްބަރު 18) - އިސްލާމިކް ސްޓޭޓް (އައިއެސް) އިން މޮރޮކޯގައި ދޭން އުޅުނު ބޮމުގެ ހަމަލާއެއް އެމެރިކާގެ އެހީއާ އެކު ހުއްޓުވައި، އެކަކު ހައްޔަރުކޮށްފި އެވެ.
"މިއީ މޮރޮކޯ ސަލާމަތީ ފައުޖުތަކާއި އެމެރިކާގެ ފުލުހުން ގުޅިގެން ކުރި މަސައްކަތުގެ ނަތީޖާ،" މޮރޮކޯގެ ސެންޓްރަލް ބިޔުރޯ އޮފް ޖުޑީޝަލް އިންވެސްޓިގޭޝަނުން ނެރުނު ބަޔާނެއްގައި ބުންޏެވެ.
ބަޔާނުގައި ބުނީ ހައްޔަރު ކުރީ ރަބަތްގެ އުތުރުން އޮންނަ ސަލާ އަލް ޖަދީދާގައި ދިރިއުޅޭ އުމުރުން 24 އަހަރުގެ މީހެއް ކަމަށެވެ. އޭނާ އަކީ، ބެލެވޭ ގޮތުގައި، އައިއެސްގެ މެމްބަރެކެވެ.
މިހާތަނަށް ބެލި ބެލުމުން އެ މީހާ އައިއެސް އަށް ބައިއަތު ހިފާފައިވާކަން ވަނީ އެނގިފަ އެވެ. އޭނާ އެންމެ ފުރަތަމަ މަސައްކަތް ކުރީ ބޭރު ގައުމުތަކުގައި ހިންގާ އައިއެސްގެ ކޭމްޕަކަށް ދިޔުމަށެވެ.
ނަމަވެސް ފަހުން އޭނާ ނިންމީ ގޮވާ ޒާތުގެ ތަކެތި ބޭނުންކޮށްގެން މޮރޮކޯގައި ހަމަލާ ދޭން ރާވާފައިވާ ބަޔަކާ ގުޅިގެން މަސައްކަތް ކުރުމަށެވެ.
އެ މީހާ ހައްޔަރު ކުރުމަށް ފަހު އިލެކްޓްރޯނިކް ޑިވައިސްތަކާއި ގޮވާ ތަކެތި ތައްޔާރު ކުރަން ބޭނުންވާ ސާމާނު ފުލުހުންގެ ބެލުމުގެ ދަށަށް ގެންދިޔަ އެވެ.
މިދިޔަ އޮކްޓޯބަރު މަހު ވެސް މޮރޮކޯގައި "ޓެރަރިސްޓުންގެ ސެލް"އެއް ރޫޅާލައި، ފަސް މީހަކު ހައްޔަރު ކުރި އެވެ. އެ މީހުންނަށް ވެސް ތުހުމަތު ކުރީ ބޮމުގެ ހަމަލާތައް ދޭން އުޅުނު ކަމަށެވެ.
އޭގެ ކުރިން ސެޕްޓެމްބަރު މަހު ވެސް އައިއެސްއާ ގުޅުން ހުރި ހަތް މީހުން ހައްޔަރު ކުރި އެވެ. މޮރޮކޯ ފުލުހުން ބުނީ 2002 ވަނަ އަހަރުން ފެށިގެން 2000 އަށް ވުރެ ގިނަ "ޓެރަރިސްޓުންގެ ސެލް" ރޫޅާލާފައިވާ ކަމަށެވެ. އެ ސެލްތަކާ ގުޅުން ހުރި 3،500 އަށް ވުރެ ގިނަ މީހުން ހައްޔަރުކޮށްފައި ވެ އެވެ.
