ސެންޓްރަލް ޒޯން މުބާރާތުގެ އެންމެ ފަހުގެ ތައްޔާރީތަކުގެ ތެރެއިން ރާއްޖޭގެ ގައުމީ ޓީމަށް އިތުރު މެޗުތަކެއް ކުޅެން ލިބުމުގެ ތަފާތު ޓީމުގެ ކުޅުމުން ފެންނަ ކަމަށް ޓީމުގެ ކެޕްޓަން އިސްމާއިލް ސާޖިދު (ކުޑަކާއްޓެ) ބުނެފި އެވެ.
ސެންޓްރަލް ޒޯން މުބާރާތަށް ތައްޔާރުވާން ރާއްޖޭން މި މަހު އެންމެ ފުރަތަމަ ކުޅުނީ ސްރީ ލަންކާ ގައުމީ ޓީމާ ދެކޮޅަށެވެ. ލަންކާއާ ދެކޮޅަށް ކުޅުނު ތިން މެޗުން ވެސް ރާއްޖެ ބަލިވީ ސީދާ ތިން ސެޓުންނެވެ.
އެކަމަކު، އޭގެ ފަހުން އިންޑިއާ ލީގުގެ ހައިދަރުއާބާދު ސްޕައިކާސްއާ ދެކޮޅަށް މިދިޔަ ދެ ރޭ ކުޅުނު ދެ މެޗުން ވެސް ރާއްޖެ ވަނީ 3-1 ސެޓުން މޮޅުވެފަ އެވެ. ރޭ ކުޅުނު މެޗުގެ ސެޓުތައް ދިޔައީ 25-13، 23-25، 25-20 އަދި 25-19 އިންނެވެ.
މެޗަށް ފަހު ދިން އިންޓަވިއުއެއްގައި ކުޑަކާއްޓެ ބުނީ ހައިދަރުއާބާދާ ދެކޮޅަށް ކުޅުނު ދެ މެޗުން މޮޅުވިއިރު، މި މެޗުތަކުގެ ބޭނުންހިފޭ އެހެން ގޮތްތަކެއް ވެސް އެބަހުރި ކަމަށެވެ.
"މި މޮޅުވުން އެއީ އަޅުގަނޑަށް ހީވަނީ މުބާރާތަށް ފުދޭ ވަރަކަށް ރަނގަޅު ކާމިޔާބީއެއް. އެކްސްޕީރިއަންސް އެއް. ދެން ކުޅުންތެރިން ތެރެއިން ޓެސްޓް ކޮށްލަން، ޗާންސް ދޭން ވެސް ރަނގަޅު ފުރުސަތެއް މުބާރާތަށް ތައްޔާރުވުމުގެ ގޮތުން،" ކުޑަކާއްޓެ ބުންޏެވެ.
ޓީމުގެ އެންމެ ތަޖުރިބާކާރު ކުޅުންތެރިޔާގެ ހައިސިއްޔަތުން ކުޑަކާއްޓެ، 31، ދެކޭގޮތުގައި ލަންކާއާ ދެކޮޅަށް ކުޅުނު މެޗުތަކަށް ވުރެ ހައިދަރުއާބާދު މެޗުތަކުގައި ރަނގަޅު ކުރެވުނު ކަންތައްތަކެއް ވެސް އެބަހުއްޓެވެ.
"އަމިއްލަ މިސްޓޭކް މަދުކުރުން. އެބައި ތަންކޮޅެއް ރަނގަޅުކޮށް މިދަނީ. ކުރިން މެޗުތަކާ އަޅާބަލާއިރު ވަރަށް މަދުން މި ދަނީ. ދެން ބްލޮކް ޑިފެންސް ވަރަށް ރަނގަޅުކޮށް މި ދަނީ މެޗަކަށް ވުރެ މެޗެއް،" ކުޑަކާއްޓެ ބުންޏެވެ.
ރާއްޖޭން މި ފަހަރުގެ ސެންޓްރަލް ޒޯން މުބާރާތަށް މީގެ ދޮޅު މަހެއްހާ ދުވަސް ކުރިން ފަރިތަކުރުުންތައް ފެށީ ދެ އަހަރު ރަސްމީކޮށް ވޮލީ ކުޅުމާ ދުރުގައި ތިބުމަށް ފަހު އެވެ. އެއީ އެންމެ ފަހުން ގައުމީ ޓީމު ކުޅުނު މުބާރާތަކީ 2019 ވަނަ އަހަރުގެ ޑިސެމްބަރު މަހު ބޭއްވި ސައުތު އޭޝިއަން ގޭމްސް ކަމަށްވާއިރު، އޭގެ ފަހުން ކޮވިޑާ ހެދި އައި މެދުކެނޑުމުގެ ތެރޭގައި ވޮލީ އޮތީ ހުއްޓިފައި ކަމަށްވާތީ އެވެ.
އަލުން ވޮލީ ފަށައިގެން ސެންޓްރަލް ޒޯން މުބާރާތަށް ދިއުމުގެ ކުރިން ރާއްޖޭން ޓްރެއިނިން ކޭމްޕެއް ބޭރަށް ދާން ރޭވި ނަމަވެސް ހާލަތުގެ ގޮތުން އެކަން ކުރެވޭ ގޮތެއް ނުވި އެވެ.
"ކޮވިޑް ހާލަތުގެ ގޮތުން ބޭރަށް ޓްރެއިނިން ކޭމްޕެއް ނުގޮސް މާލޭގައި މި މެޗުތަކެއް ކުޅެވުމަކީ އެޑްވާންޓޭޖެއް،" ކޭމްޕެއް ނުދެވި މާލޭގައި ހުރެ ވެސް މެޗުތަކެއް ކުޅެލަން ލިބުމާ ބެހޭގޮތުން ކުޑަކާއްޓެ ބުންޏެވެ.
ސެންޓްރަލް ޒޯން މުބާރާތަށް މާދަމާ ބަންގްލަދޭޝަށް ދާން ފުރުމުގެ ކުރިން ގައުމީ ޓީމުން މާލޭގައި ކުޅޭ ފަހު މެޗު އޮންނާނީ މިއަދު ހަވީރު އެވެ. ހައިދަރުއާބާދު ޓީމާ ދެކޮޅަށް މިއަދު ކުޅޭ މެޗު ފަށާނީ ހަވީރު 16:30 ގަ އެވެ.
