ޓޯކިޔޯ، ޖަޕާން (ޑިސެމްބަރު 18) - ޖަޕާނުގެ ނަފްސާނީ އެހީދޭ ކްލިނިކެއްގައި ހުކުރު ދުވަހު ހިނގި އަލިފާނުގެ ހާދިސާއާ ގުޅުން ހުރި ކަމަށް ޝައްކު ކުރެވޭ މީހެއްގެ ހާލު ސީރިއަސް ކަމަށް ފުލުހުން ބުނެފި އެވެ.
އުމުރުން 61 އަހަރުގެ ފިރިހެން މީހާ އަކީ އޮސާކާގައި ހުންނަ ކްލިނިކުން ކުރިން ފަރުވާ ހޯދާފައިވާ މީހެކެވެ. ފުލުހުންނާ ހަވާލަދީ އެންއެޗްކޭ އިން ރިޕޯޓު ކުރި ގޮތުގައި އެ މީހާ އަށް ދަނީ ހޮސްޕިޓަލުގައި ފަރުވާދެމުންނެވެ.
ހުކުރު ދުވަހުގެ ހެނދުނު 30 މިނެޓު ވަންދެން އަލިފާންގަނޑު ފެތުރުނެވެ. ކްލިނިކް ގާއިމްކޮށްފައި ހުންނަ ހިމަ އިމާރާތުގެ ހަތަރު ވަނަ ފަންގިފިލާ ވަނީ އެއްކޮށް އަނދާ ހުލިވެފަ އެވެ. އެ ކްލިނިކަކީ ޖެނެރަލް ސިއްހީ ފަރުވާ ވެސް ފޯރުކޮށްދޭ ތަނެކެވެ.
އަލިފާނުގެ ހާދިސާ ހިނގި އިމާރާތް. --ފޮޓޯ: އޭއެފްޕީ
އެންއެޗްކޭ އާއި އަސަހީ ޝިމްބުން ޑެއިލީ އިން ބުނީ ކްލިނިކްގައި ހިނގި ހާދިސާ އާއި އޭގެ 30 މިނެޓު ކުރިން ތުހުމަތު ކުރެވޭ ފިރިހެން މީހާގެ ގޭގައި ހިނގި ކުޑަ އަލިފާނުގެ ހާދިސާއަކާ ގުޅުމެއްވާ ކަމަށް ބެލެވޭތީ ފުލުހުން ދަނީ ތަހުގީގު ކުރަމުންނެވެ.
އޮސާކާ ސިޓީގެ އަލިފާން ނިއްވާ ޑިޕާޓްމަންޓުން ބުނީ ކްލިނިކްގައި ރޯވެ، 24 މީހުން މަރުވި ކަމަށެވެ. އަދި އެއީ ގަސްތުގައި ރޯކުރުމުގެ އަމަލެއްގެ ގޮތުގައި ބަލައިގެން ކުރިއަށްދާ ކަމަށް ބުންޏެވެ. ހަތަރު މީހަކަށް ދަނީ އަދިވެސް ފަރުވާދެމުންނެވެ.
ޖަޕާނުގެ މީޑިއާ އިން ބުނީ ގިނަ މީހުން މަރުވީ އަލިފާން ރޯކޮށްފައި ހުރި ޔުނިޓުން ނުކުންނަ ދޮރު ނުހުޅުވޭ ގޮތް ހަދާފައި ވާތީ އެތަނުގައި ތާށިވެ ކާބަންމޮނޮކްސައިޑް ގޭހުން ވިހަވެގެން ކަމަށެވެ.
ހުޅުހިފާ ޒާތުގެ އެއްޗެއް ހުރި ކަރުދާސް ކޮތަޅެއް ހީޓަރެއް ކައިރީގައި ބެހެއްޓުމަށް ފަހު، އޭތި ވައްޓާލައި ރޯކޮށްލި މަންޒަރު ފެނުނު ކަމަށް ބައެއް މަންޒަރު ދުށް މީހުން ވަނީ ނޫސްތަކަށް ބުނެފަ އެވެ.
ނަފްސާނީ އެހީދޭ ކްލިނިކް ހިންގާ ޑޮކްޓަރުގެ ބައްޕަ ބުނީ އޭނާގެ ދަރިފުޅު ސަލާމަތުން ހުރިކަން ސާފުނުވާ ކަމަށެވެ. ވަޒީފާ ނެތް މީހުންނަށް ހާއްސަ އިންޝުއަރެންސް ހޯދަން ބޭނުންވާ ސެޓްފިކެޓް ދޭން އެދި ގިނަ ޕޭޝެންޓުން ޑޮކްޓަރަށް ޕްރެޝަރު ކުރަމުން ދިޔަ ކަމަށް އޭނާ ބުންޏެވެ.
ޖަޕާނުގެ ހުޅަނގުގައި އޮންނަ އޮސާކާ އަކީ ޓޯކިޔޯ އަށް ފަހު އެ ގައުމުގެ އެންމެ ބޮޑު މެޓްރޮޕޮލިސް ސަރަހައްދެވެ. އިމާރާތް ކުރުމާއި މެއިންޓެއިން ކުރުމާ ގުޅޭ ހަރުކަށި ގަވާއިދުތައް ތަންފީޒު ކުރާ ޖަޕާނުގައި ނުރައްކާތެރި އަލިފާނުގެ ހާދިސާތައް ހިނގަނީ ވަރަށް މަދުންނެވެ. ބޮޑެތި ކުށްތައް ވެސް ޖަޕާނުގައި ހިނގަނީ ވަރަށް މަދުންނެވެ.
ފަހުގެ ތާރީހެއްގެ ޖަޕާނުގައި ހިންގި މިފަދަ އެންމެ ނުރައްކާތެރި ކުށަކީ ކިޔޯޓޯގައި ހުންނަ އެނިމޭޝަން ސްޓޫޑިއޯއެއްގައި 2019 ވަނަ އަހަރު ރޯކުރި އަލިފާންގަނޑެވެ. އެ ފަހަރު 36 މީހުން މަރުވި އެވެ. އެ ހާދިސާއާ ގުޅިގެން މިދިޔަ އަހަރު މީހަކާ ދެކޮޅަށް ދައުވާ ކުރި އެވެ.
ފަހަކަށް އައިސް ޖަޕާނުގެ ރޭލު ނެޓްވޯކުގައި ވަޅި އާއި އަލިފާނުން ދޭ ހަމަލާތައް އިތުރުވެފައިވާކަން ފާހަގަވެ އެވެ. މިދިޔަ އޮކްޓޯބަރު މަހު، ޖޯކަރުގެ ކޮސްޓިއުމް ލައިގެން ހުރި 24 އަހަރުގެ ފިރިހެނަކު ޓޯކިޔޯގެ ރޭލެއް ތެރޭގައި ވަޅިން މީހަކަށް ހަމަލާދީ އަލިފާން ރޯކުރުމުން ހައްޔަރު ކުރި އެވެ.
އޭގެ ފަހުން އުމުރުން 69 އަހަރުގެ ފިރިހެނަކު ވަނީ ކިޔޫޝޫ ސަރަހައްދުން ދަތުރު ކުރަމުން ދިޔަ ބުލެޓް ރޭލެއް ތެރޭގައި ވެސް އަލިފާން ރޯކުރަން މަސައްކަތްކޮށްފަ އެވެ. އެ ފަހަރު އެއްވެސް މީހަކަށް އަނިޔާއެއް ނުވެ އެވެ.
