ރާއްޖޭގެ ގައުމީ ފިރިހެން ވޮލީބޯޅަ ޓީމާއި ހައިދަރުއާބާދު ސްޕައިކާސް މިއަދު ހަވީރު ކުޅޭ މެޗުގައި ނަގާ ލަކީޑްރޯ އަކުން ހޮވޭ ދެ ސަޕޯޓަރަކަށް މި މަހު 23-29 އަށް ބަންގްލަދޭޝްގައި ކުރިއަށްދާ ސެންޓްރަލް ޒޯން ވޮލީބޯޅަ މުބާރާތުގެ މެޗެއް ބަލާލުމުގެ ފުރުސަތު ދޭން ނިންމާފައިވާ ކަމަށް ވޮލީބޯލް އެސޯސިއޭޝަނުން ބުނެފި އެވެ.
ހައިދަރުއާބާދު ޓީމާ ދެކޮޮޅަށް ގައުމީ ވޮލީ ޓީމުން ކުޅުނު ފުރަތަމަ ދެ މެޗުން ވަނީ 3-1 ސެޓުން މޮޅުވެފަ އެވެ. ފަހު މެޗު ކުޅޭނީ މިއަދު ހަވީރު އެވެ. މެޗު ފަށާނީ 16:30 ގަ އެވެ.
މެޗު ބަލަން ސަޕޯޓަރުން ޒުވާނުންގެ މަރުކަޒު އިންޑޯ ކޯޓަށް އައުމުން ވައުޗަރެއް ދޭނެ ކަމަށާއި އެ ވައުޗަރު އެ ތަނުގައި ބެހެއްޓިފައި ހުންނަ ފޮއްޓައް ލުމުން ގުރުއަތުލުމުގައި ބައިވެރިވެވުނީ އެވެ. އަދި މެޗު ނިމުމުން ގުރުއަތުލުން ބާއްވާނެ ކަމަށް ވީއޭއެމުން ބުނެފައިވެ އެވެ.
ގުރުއަތުލުމުން ހޮވޭ ދެ ސަޕޯޓަރަކު ސެންޓްރަލް ޒޯން ވޮލީބޯޅަ މުބާރާތުގައި ގައުމީ ޓީމު ކުޅޭ މެޗެއް ބަލާލުމަށް ބަންގްލަދޭޝަށް ދިއުމުގެ ދެކޮޅު ޓިކެޓް ދޭނެ ކަމަށް ވީއޭއެމުން ވަނީ ބުނެފަ އެވެ. މީގެ އިތުރުން ވެސް ގައުމީ ވޮލީބޯޅަ ޓީމުގެ ދެ ޖޯޒީ ދެ ސަޕޯޓަރަަކަށް ދޭން ވަނީ ނިންމައިފަ އެވެ.
ވީއޭއެމްގެ ރައީސް މުހައްމަދު ރަނޭޝް (ރަނޭ)، "އަދަދު" އަށް ވިދާޅުވީ ހައިދަރުއާބާދު ޓީމާ ދެކޮޅަށް މިއަދު ހަވީރު ގައުމީ ޓީމު ކުޅޭ މެޗަކީ ސެންޓްރަލް ޒޯންގެ އެންމެ ފަހުގެ ތައްޔާރީ ކަމަށާއި އެހެންވެ، އެންމެ ފަހު ވަގުތު ޓީމުގެ ފަަހަތުގައި ސަޕޯޓަރުން ތިބިކަން ދައްކައިދޭން މި މެޗު ވީހާވެސް ފޯރިގަދަކޮށް ކުރިއަށް ގެންދަން ބޭނުންވާ ކަމަށެވެ.
"ވީހާވެސް ގިނަ ސަޕޯޓަރުން މުބާރާތަށް ޓީމު ދިއުމުގެ ކުރިން ޓީމަށް ފެއާވެލްއެއްގެ ގޮތުގައި ވިސްނައިގެން ވެސް ސަޕޯޓް ދޭން މި މެޗަށް އައުމަކީ ޓީމަށް ލިބިގެންދާނެ ވަރަށް ބޮޑު ހިތްވަރެއް،" ރަނޭ ވިދާޅުވި އެވެ.
ސެންޓްރަލް ޒޯން މުބާރާތަށް ތައްޔާރުވުމުގެ ގޮތުން ގައުމީ ވޮލީ ޓީމުން ވަނީ މި މަހު ސްރީ ލަންކާގެ ގައުމީ ޓީމާ ދެކޮޅަށް ވެސް މާލޭގައި ތިން މެޗެއް ކުޅެފަ އެވެ. އެ މެޗުތައް ބަލަން ވެސް އައީ ނިސްބަތުން މަދު ސަޕޯޓަރުންނެވެ. އަދި ހައިދަރުއާބާދު ޓީމާ ދެކޮޅަށް ކުޅުނު ފުރަތަމަ ދެ މެޗު ބަލަން ވެސް ދިޔައީ މަދު ސަޕޯޓަރުންނެވެ. ވީއޭއެމްގެ އެދުމަކީ މިއަދު ހަވީރު ކުޅޭ މެޗަށް ވީހާވެސް ގިނަ ސަޕޯޓަރުން ދިއުމެވެ.
