ވިޔަފާރި ބަނދަރުތައް ހިންގާ މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ ޗެއާމަނަކަށް ކެޕްޓަން މުހައްމަދު ޝަރީފް (ސެންކޯ ޝަރީފް)، ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑުން އައްޔަންކޮށްފި އެވެ.
މިހާރު ވެސް އެމްޕީއެލްގެ ބޯޑުގައި ހުންނަވާ ޝަރީފް އެ ކުންފުނީގެ ޗެއާމަނަކަށް ހަމަޖެއްސީ، އެ މަގާމުގައި ކުރިން ހުންނެވި އަހުމަދު ޒަކީ (ނަޒާކީ ޒަކީ) އެ މަގާމުން އިސްތިއުފާ ދެއްވިތާ އަހަރަކަށް ވުރެ ގިނަ ދުވަސް ފަހުންނެވެ.
އެމްޕީއެލްގެ ޗެއާމަންކަމުން މިދިޔަ އަހަރުގެ ނޮވެމްބަރުގައި ޒަކީ އިސްތިއުފާދެއްވީ، ކޮވިޑުގެ ފުރަތަމަ ލޮކްޑައުން ދުވަސްވަރު ވިޔަފާރި ބަނދަރުގައި ހިނގި ތެލުގެ ވައްކަމެއްގެ މައްސަލައެއްގައި ބޯޑާއި މެނޭޖްމަންޓާ އުފެދުނު ދެބަސްވުންތަކަށް ފަހު އެވެ.
ޝިޕިން ދާއިރާގެ ތަޖުރިބާކާރެއް ކަމުގައިވާ ޝަރީފް، ކުރިން ހިންގި ގައުމީ ޝިޕިން ލައިން މޯލްޑިވްސް ނޭޝަނަލް ޝިޕިން ލައިން (އެމްއެންއެސްއެލް)ގެ ޗެއާމަނުގެ މަގާމު އަދާކުރެއްވި އެވެ.
އެމްޕީއެލްގެ ބޯޑު މެމްބަރުން
- މުހައްމަދު ޝަރީފް - ޗެއާމަން
- ޝާހިދު އަލީ - ސީއީއޯ
- އިބްރާހިމް އަބްދުﷲ - ޑެޕިއުޓީ ސީއީއޯ
- ޖާދުﷲ ނާޒިމް - ޑިރެކްޓާ
- އަހުމަދު ލައިޝަމް - ޑިރެކްޓާ
- އިބްރާހިމް އާރިފް - ޑިރެކްޓާ
އެމްޕީއެލްއަކީ ދިވެހި ސަރުކާރުގެ ސައްތައިންސައްތަ ހިއްސާ އޮންނަ ކުންފުންޏެކެވެ. އެހެންކަމުން މި ކުންފުނީގެ ބޯޑުގައި ތިބޭ ހުރިހާ އެންމެންނަކީ ވެސް ސަރުކާރުން ޕީސީބީ މެދުވެރިކޮށް އެ މަގާމުތަކަށް އައްޔަނުކޮށްފަ ތިބޭ ބަޔެކެވެ.
އެމްޕީއެލްއަށް ޗެއާމަނަކު ހަމަޖެއްސުމުގެ އިތުރުން ޕީސީބީން ވަނީ ވެލާނާ އިންޓަނޭޝަނަލް އެއާޕޯޓު ހިންގާ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ ބޯޑަށް ވިލާ ކުންފުނީގެ ސިޔާދު ގާސިމް އިއްޔެ ހަމަޖައްސާފަ އެވެ.
ޖުމްހޫރީ ޕާޓީގެ ލީޑަރު އަދި ވިލާ ކުންފުނީގެ ބާނީ ގާސިމް އިބްރާހިމްގެ ދަރިކަލުން، ސިޔާދު އެމްއޭސީއެލްގެ ބޯޑަށް ހަމަޖެއްސީ ނަން އެގްޒެކެޓިވް ބޯޑު މެމްބަރެއްގެ ގޮތުގަ އެވެ.
ސިޔާދު ބޯޑަށް ހަމަޖެއްސިއިރު، މިދިޔަ މަހު އެމްއޭސީއެލްގެ ސީއީއޯ ގޯޑޮން އެންޑްރޫ ސްޓުވާޓު ވަނީ މަގާމުން ވަކިކޮށްފަ އެވެ. އެފަހުން އެ މަގާމު ހުރީ ހުހަށެވެ.
އެކަމަކު ގޯޑޮން ވަކިކުރުމުގެ ދުވަސްތަކެއް ކުރިން ކުންފުނީގެ އޮޕަރޭޝަންސް ހިންގަން ސީއޯއޯގެ މަގާމަށް ޑެރެން ވިލިއަމްސް ވަނީ ހަމަޖައްސާފަ އެވެ. އާންމުކޮށް ކުންފުނިތަކުގެ ސީއޯއޯ ބޯޑުގައި ހުންނެވި ނަމަވެސް، ވިލިއަމްސް ބޯޑުގައި ހުންނަކަމެއް ކަށަވަރެއް ނޫނެވެ.
އެމްއޭސީއެލްގެ ބޯޑު މެމްބަރުން
- މުހައްމަދު އުމަރު މަނިކު (އެމްޔޫ މަނިކު) - ޗެއާމަން
- އިބްރާހިމް ނޫރައްދީން - ޑިރެކްޓާ
- ޑރ. އިބްރާހިމް މަހަފޫޒް - ޑިރެކްޓާ
- އައިޝަތު އަރުޝާ - ޑިރެކްޓާ
- އަހުމަދު އިމާން މޫސާ - ޑިރެކްޓާ
- ސިޔާދު ގާސިމް - ޑިރެކްޓާ
އެމްއޭސީއެލްއަކީ ވެސް ސައްތައިންސައްތަ ސަރުކާރު ހިއްސާވާ ކުންފުންޏެކެވެ. އެހެންކަމުން މި ކުންފުނީގެ ބޯޑުގައި ތިބޭ ހުރިހާ އެންމެންނަކީ ވެސް ސަރުކާރުން ހަމަޖައްސާ ބަޔެކެވެ.
