އިރާނުގެ ނިޔުކްލިއާ އަދި މިސައިލް މަޝްރޫއާ މެދު އަމަލު ކުރާނެ "ސީރިއަސް ގޮތެއް" ހޯދަމުންދާ ކަމަށް ސައުދީ އަރަބިއްޔާގެ ވަލީ އަހުދު މުހައްމަދު ބިން ސަލްމާން ވިދާޅުވެއްޖެ އެވެ.
"ސަރަހައްދީ އަދި ބައިނަލްއަގްވާމީ ސަލާމަތާއި ހަމަޖެހުން ޔަގީންކުރެވޭނެ ފަދަ ގޮތަކަށް އިރާނުގެ ނިޔުކްލިއާ އަދި މިސައިލް ޕްރޮގްރާމާ މެދު ސީރިއަސް ގޮތްތަކަކަށް ވިސްނުމުގެ މުހިއްމުކަން ފާހަގަކުރަން،" ގަލްފް ސަމިޓުގައި ވަލީ އަހުދު ވިދާޅުވި އެވެ.
"އޭގެ އިތުރުން އަވައްޓެރިންނާ މެދު ރަނގަޅަށް އަމަލު ކުރުމުގެ އުސޫލާއި، އދ. ގެ ގަރާރުތަކަށް އިހްތިރާމް ކުރުމުގެ މުހިއްމުކަމާ އެކު ސަރަހައްދަށް ހަމަނުޖެހުން އަންނަ ހަރަކާތްތަކުން ދުރުވުމުގެ މުހިއްމުކަން ފާހަގަކުރަން."
އެ ސަމިޓުގައި ވާހަކަދައްކަވަމުން ސައުދީ ފޮރިން މިނިސްޓަރު އަމީރު ފައިސަލް ބިން ފަރްހާން ވެސް ނިޔުކްލިއާ މަޝްރޫއާ ގުޅޭ މަޝްވަރާގައި އިރާނުން ގެންގުޅޭ "ގޮތްދޫނުކުރުމުގެ ވިސްނުމާ" މެދު ކަންބޮޑުވާ ކަމަށް ވިދާޅުވި އެވެ.
އިރާނާ އެކު ފުރިހަމަ ނިޔުކްލިއާ އެއްބަސްވުމެއް އޮންނަން ގަލްފު ގައުމުތަކުން އެދޭ ކަމަށާއި މަޝްވަރާތައް ކާމިޔާބުވުމަށް އުއްމީދު ކުރައްވާ ކަމަށް ވެސް ފައިސަލް ވިދާޅުވި އެވެ.
އޭގެ އިތުރުން ބާރުގަދަ ގައުމުތަކާއި އިރާނާ ދެމެދު ކުރިއަށްދާ މަޝްވަރާތަކުގައި ގަލްފުގެ ބައިވެރިވުން އޮންނަން ޖެހޭ ކަމަށް ސައުދީ އަރަބިއްޔާ އިން ދެކޭ ކަމަށް ވިދާޅުވި އެވެ.
ގަލްފް ސަމިޓު ނިންމާލުމުގެ ކުރިން ގައުމުތަކުން ވަނީ އެ ސަރަހައްދުގައި އިރާނުން ހިންގާ "ނުރައްކާތެރި ހަރަކާތްތައް" ކުށްވެރިކޮށްފަ އެވެ. އެގޮތުން ޔަމަނުގައި ސައުދީ އަރަބިއްޔާއާ ދެކޮޅަށް ހަމަލާ ދިނުމަށް ހޫތީ ހަނގުރާމަވެރިންނަށް އެހީވުމާއި، އިރާގާއި، ލުބްނާން އަދި ސީރިއާގެ ޝިއައީ ހަނގުރާމަވެރިންނަށް އެހީވާ ކަމަށް ތުހުމަތު ކުރި އެވެ.
