ކްލަބް މޯލްޑިވްސް ކަޕްގެ އަންހެން ޑިވިޝަން، 18/30 ފުޓްސަލް ފިއެސްޓާގެ ފުރަތަމަ ސެމީ ފައިނަލުގައި ފަހަތުން އަރައި 7-5 އިން ދިވެހި ސިފައިންގެ ކްލަބް ބަލިކޮށް ކްލަބް ވެމްކޯ އިން ފައިނަލުގެ ފުރަތަމަ ޖާގަ ހޯދިއިރު، ދެ ވަނަ ސެމީ ފައިނަލުގައި ޕޮލިސް ކްލަބްގެ މައްޗަށް 3-0 އިން ކުރިހޯދައި އެންމެ ފަހުން ދެ ފަހަރުގެ ޗެމްޕިއަން އެމްޕީއެލް ފައިނަލަށް ދަތުރުކޮށްފި އެވެ.
މި ފަހަރުގެ މުބާރާތުގެ އެއް ގްރޫޕެއްގައި ހިމެނުނު އެމްޕީއެލް އާއި ވެމްކޯ ވަނީ ގްރޫޕް ސްޓޭޖުގައި ދެ ފަހަރު ބައްދަލުކޮށްފަ އެވެ. އެއް މެޗު 1-1 އިން އެއްވަރުވިއިރު، އަނެއް މެޗުން އެމްޕީއެލް މޮޅުވީ 5-1 އިންނެވެ. ފައިނަލް މެޗުގައި ދެ ޓީމު ބައްދަލުކުރާނީ ހުކުރު ދުވަހުގެރޭގަ އެވެ.
މުބާރާތުގެ ގްރޫޕް ސްޓޭޖުގައި ކުޅުނު ހަތަރު މެޗުން ވެސް މޮޅުވި ސިފައިން މިރޭ ވަނީ މެޗުގެ ފަސް ވަނަ މިނިޓްގައި ބަންގްލަދޭޝްގެ މަތުސުޝިމާ ސުމައްޔާގެ ގޯލުން ލީޑުނަގައިފަ އެވެ. އެކަމަކު، ޖެހިގެން އައި މިނިޓްގައި ވެމްކޯގެ ތައިލެންޑް ކުޅުންތެރިޔާ, ވަނަޕޯން ކަސޭސީ ވަނީ އެ ޓީމަށް އެއްވަރުކޮށްދީފަ އެވެ. ސުމައްޔާ އަލުން ސިފައިންގެ ޓީމަށް ލީޑުނަގައިދިންއިރު، އޭގެ ފަހުން ސިފައިންގެ ޓީމުގެ ކެޕްޓަން މަރިޔަމް ރިފާ ދެ ގޯލު ޖަހައި އެ ޓީމުގެ ލީޑު ތިން ގޯލަށް ފުޅާކޮށްދިނެވެ.
ދެ ވަނަ ހާފްގެ ކުރީކޮޅުގައި ބަދަލުތަކެއް ގެނެސްގެން ވެމްކޯ އިން ދެ ގޯލު ޖަހައި ސިފައިންގެ ލީޑު އެއް ގޯލަށް ކުޑަކުރި އެވެ. ވެމްކޯގެ ދެ ވަނަ ގޯލު ޖެހީ ބަދަލެއްގެ ގޮތުގައި އެރި މަރިޔަމް ނޫރާގެ ގޯލުންނެވެ. އަދި ނޫރާގެ ބައިވެރިވުން އޮވެގެން ވެމްކޯގެ ތައިލެންޑް ކުޅުންތެރިޔާ ޑަރިކާ ވަނީ މޮޅު ގޯލެއް ޖަހައިފަ އެވެ. އެކަމަކު، އެ ގޯލު ޖެހިތާ އިރުކޮޅެއް ފަހުން ސިފައިންގެ ރިފާ އިތުރު ގޯލެއް ޖަހައި އޭނާގެ ހެޓްރިކް ފުރިހަމަކުރި އެވެ. އޭގެ ފަހުން އިތުރު ގޯލުތަކެއް ޖަހަން ސިފައިންގެ ސުމައްޔާ އާއި ރިފާ އަދި ސަބީނާ ކަތުން އަށް ލިބުނު ފުރުސަތުތަކުން ގޯލެއް ނުޖެހުނު އެންމެ ބޮޑު ސަބަބަކީ ވެމްކޯގެ ކީޕަރު ހަދީޖާ އިބްރާހިމް ދެއްކި މޮޅު ކުޅުމެވެ. ހަދީޖާ ވަނީ ސިފައިންގެ ގިނަ ހަމަލާތަކެއް ހުއްޓުވައިފަ އެވެ.
ވެމްކޯ ކުޅުންތެރިން ގޯލު ޖެހުމަށް ފަހު އުފާފާޅުކުރަނީ.-- ފޮޓޯ: އިމޭޖަސް.އެމްވީ
ސިފައިން ދެ ގޯލުގެ ލީޑެއްގައި އޮވެ، އިތުރު ގޯލު ޖަހަން ލިބުނު ފުރުސަތުތައް ނަގާލުމުގެ ގެއްލުން ދެއްކީ ފަހު ހަ ވަރަކަށް މިނިޓްގަ އެވެ. އެ ވަގުތުގެ ތެރޭ ވެމްކޯ ވަނީ ހިތްވަރުގަދަ ކުޅުމެއް ދައްކައި ހަތަރު ގޯލު ޖަހައި، ނަތީޖާ އަނބުރާލައިފަ އެވެ. ދެ މިނިޓް ތެރޭގައި ޑަރިކާ އާއި ކެޕްޓަން ޝަހުލާ ތައުފީގު އޭރިއާބޭރުން ޖެހި ޝޮޓްތަކުން ކާމިޔާބުކުރި ގޯލުތަކާ އެކު ނަތީޖާ ހަަމަހަމަކުރި އެވެ. ފުރަތަމަ ފަހަރަށް ލީޑުނެގީ މެޗު ނިމެން ތިން މިނިޓަށް ވެފައި ހުއްޓައި މެޗުގެ މޮޅު ކުޅުންތެރިޔާ ޑަރިކާ ޖެހި ގޯލުންނެވެ. ފައިނަލުގެ ޖާގަ އެއްކޮށް ޔަގީންކޮށްދިން ގޯލު ޖެހީ ކެޕްޓަން ޝަހުލާ އެވެ.
ދެ ވަނަ ސެމީ ފައިނަލް މެޗު ފަށައިގެން ތިން ވަނަ މިނިޓްގައި އެމްޕީއެލްގެ ތަޖިކިސްތާން ކުޅުންތެރިޔާ މަދީނާ ފަޒިލޯވާ ވަނީ އެ ޓީމަށް ލީޑުނަގައިދީފަ އެވެ. ޕޮލިހުން މެޗުގެ ތެރެއަށް ވަދެ، ގިނަ އެޓޭކްތަކެއް ކުރި ނަމަވެސް ގޯލެއް ޖެހޭ ގޮތެއްނުވި އެވެ. ޕޮލިހުގެ ފާތިމަތު ތީބާ އާއި ފަދުވާ ޒާހިރު ފޮނުވާލި ހަމަލާތައް އެމްޕީއެލްގެ ކީޕަރު އަޒާމް ވަނީ މަތަކޮށްފަ އެވެ. އަދި އެ ޓީމުގެ ހިމެނޭ ލެބަނަންގެ ދެ ކުޅުންތެރިން ކަމަށްވާ ނޭންސީ އާއި ސެލީން އަށް ވެސް އެންމެ ރަނގަޅަށް ލިބުނު ފުރުސަތުތަކުގެ ބޭނުމެއް ނުހިފުނެވެ.
އެމްޕީއެލް އިން ފަހު ދެ ގޯލު ޖެހީ މެޗުގެ ފަހު ހަ މިނިޓް ތެރޭގަ އެވެ. ދެ ވަނަ ގޯލު ޖެހީ އެމްޕީއެލްގެ ކެޕްޓަން ފާތިމަތު ޝާލިޔާ އެވެ. މެޗުގެ މޮޅު ކުޅުންތެރިއަކަށް ހޮވުނު ޝާލިޔާ އަމިއްލަ ހާފުގެ ތެރެއިން ބޯޅަ ހިފައިގެން ދުވެފައި ގޮސް ޕޮލިހުގެ ހާފުގެ މެދެއްހާ ހިސާބުން ފޮނުވާލި ބޯޅަ އަމާޒުވީ ގޯލުގެ މަތީ ކަނަށެވެ. އޭގެ ފަހުން މަދީނާ ހުސްކޮށްލާފައި ދިން ބޯޅައަކުން ޖޫޒާން ޒަރީރް ވަނީ އެމްޕީއެލްގެ ތިން ވަނަ ގޯލު ޖަހައިފަ އެވެ.
މުބާރާތުގައި މާދަމާރޭ ކުރިއަށްދާނީ ކްލަބް މޯލްޑިވްސް ކަޕްގެ ފިރިހެން ޑިވިޝަންގެ ސެމީ ފައިނަލް ދެ މެޗެވެ. ފުރަތަމަ ސެމީގައި ޕްރިޒަން ކްލަބާއި އެފްއެސްއެމް ބައްދަލުކުރާއިރު، ދެ ވަނަ ސެމީގައި އާރްއާރްސީ ކުޅޭނީ ޓީމު ފެނަކައާ ދެކޮޅަށެވެ.
