ނުވަ އަހަރަށް ފަހު ޖަޕާނުގެ ބޮޑު ވަޒީރުގެ ރަސްމީ ގެކޮޅުގައި ފުރަތަމަ ފަހަރަށް ބޮޑު ވަޒީރަކު ދިރިއުޅެން ފައްޓަވައިފި އެވެ.
ބޮޑު ވަޒީރުގެ ރަސްމީ ގެކޮޅަކީ "ބިރުވެރި" ކަންތައްތަކެއް ހިނގާ ތަނެއްގެ ގޮތުގައި ޖަޕާނުގައި އޮންނަނީ އަޑު ފެތުރިފަ އެވެ.
ނަމަވެސް އާ ބޮޑު ވަޒީރު ފުމިއޯ ކިޝީޑާ ހޯމަ ދުވަހު ވިދާޅުވީ އެފަދަ އެއްވެސް ކަމެއް އެތަނުގެ ތެރެއިން ދިމާނުވާ ކަމަށެވެ.
ވެރިރަށް ޓޯކިޔޯގައި މެދުގައި އޮންނަ އަގުބޮޑު ބިމެއްގައި ބިނާކޮށްފައިވާ ބޮޑު ވަޒީރުގެ ރަސްމީ ގެކޮޅު ފާއިތުވި ނުވަ އަހަރު ހުރީ ފަޅުކޮށެވެ.
ޖަޕާން ބޮޑު ވަޒީރުގެ ރަސްމީ ގެކޮޅު. -- ފޮޓޯ: އެންއެޗްކޭ
އެންމެ ފަހުން ބޮޑު ވަޒީރުކަން ކުރެއްވި ޔޮޝިހިޑޭ ސޫގާ އާއި އޭގެ ކުރިން އެ މަގާމުގައި ހުންނެވި ޝިންޒޯ އަބޭ ވެސް އެ ގެކޮޅުގައި ދިރިނޫޅުއްވަ އެވެ.
އެ ގެކޮޅަކީ 1936 ވަނަ އަހަރު ޖަޕާނުގައި ސިފައިން ހިންގަން މަސައްކަތް ކުރި ބަގާވާތެއްގައި ގިނަ އަދަދެއްގެ އިސް އޮފިޝަލުން މަރުވި ތަނެކެވެ.
ޖަޕާނުގައި އަޑު ފެތުރިފައި އޮންނަ ގޮތުން ނަމަ، މަރުވި މީހުންގެ ސޫރައިގައި ތިބޭ "ގޯސްޓު" ގެކޮޅުގެ ތެރެއިން އަބަދުވެސް ފެނެ އެވެ.
ނަމަވެސް އެ ގެކޮޅުގައި ދިރިއުޅެން ފެއްޓެވި ކިޝީޑާ ވިދާޅުވީ އެފަދަ އެއްވެސް ކަމެއް ނުވާ ކަމަށާއި "ވަރަށް އަރާމުކޮށް ނިދާލެވޭ" ކަމަށެވެ.
"އަޅުގަނޑު ރޭގައި ވަރަށް ރަނގަޅަށް ނިދިން. އެއްވެސް ބިރުވެރިކަމެއް އަދި ދިމައެއް ނުވޭ،" ހޯމަ ދުވަހު ނޫސްވެރިން ކުރި ސުވާލުތަކަށް ޖަވާބުދެމުން އާ ބޮޑު ވަޒީރު ވިދާޅުވި އެވެ.
