ޓެސްލާ ކުންފުނީގެ ވެރިޔާ އަދި ޖައްވީ ވިޔަފާރީގެ ތެރެއަށް ވަދެފައިވާ ބިލިއަނަރު އީލޮން މަސްކް އަކީ މި އަހަރުގެ ޓައިމް މަޖައްލާގެ "ޕާސަން އޮފް ދަ އިޔާ" ކަމަށް އިއުލާނުކޮށްފި އެވެ.
އެމޭޒަން ކުންފުނީގެ ވެރިޔާ ޖެފް ބެޒޯސް ފަހަތަށް ވައްޓާލުމަށް ފަހު ދުނިޔޭގެ އެންމެ ބޮޑު މަހުޖަނުގެ ލަގަބު މި އަހަރު މަސްކް ހޯދި އެވެ. އަދި ޖައްވަށް އެންމެ ފުރަތަމަ ދާ ބިލިއަނަރަށް ވުމުގެ ރޭހުގައި ވެސް ބެޒޯސް ފަހަތައް ވައްޓާލައި ރިޗަޑް ބްރެންސަން ކުރި ހޯދި އިރު، މަސްކު އޭނާ އަށް ހިތްވަރު ދިނެވެ.
ޓައިމްގެ އެޑިޓާ އިން ޗީފް އެޑްވާޑް ފެލްސެންތަލް ލިޔުއްވި ގޮތުގައި ވަކިވަކި ފަރުދުންގެ މިނިވަންކަން ކުރިއަށް ނެރި، ސަރުކާރުތަކުގެ ނާގާބިލުކަމުން ވިޔަފާރިތަކަށް ލިބިފައިވާ ޒިންމާ އާއި ފުރުސަތުގެ ބޭނުން އެންމެ ރަނގަޅަށް ހިފަމުންދާ އެއް މަހުޖަނަކީ މަސްކް އެވެ.
މިދިޔަ އަހަރު ޓައިމް މަޖައްލާގެ "ޕާސަން އޮފް ދަ އިޔާ" ކަމަށް ހޮވުނީ އެމެރިކާގެ ރައީސް ޖޯ ބައިޑެން އާއި ނައިބު ރައީސް ކަމަލާ ހެރިސް އެވެ. އެ މަޖައްލާ އިން ކުރިން ބުނެފައި ވަނީ އެ ލަގަބު ލިބޭ ފަރާތެއް ހޮވަނީ އަހަރުގައި އެންމެ މުހިއްމު ކަމެއްގެ ގޮތުގައި ފާހަގަވާ ކަމަކާ ގުޅިފައިވާ ޝަހުސިއްޔަތަކަށް ކަމަށެވެ.
އޮކްޓޯބަރު މަހު، މަސްކްގެ އިލެކްޓްރިކް ކާރު ކުންފުނީގެ އަގު ޓްރިލިއަން ޑޮލަރަށް ވުރެ މައްޗަށް ދިޔަ އެވެ. އޭނާގެ ސްޕޭސްއެކްސް އިން ވަނީ ނާސާއާ އެކު ގިނަ ޖައްވީ މިޝަންތަކެއް ހިންގަން އެއްބަސްވެފަ އެވެ. އޭގެ ތެރޭގައި ގިނިހިލައަކުން ދުނިޔެ ސަލާމަތް ކުރުމަށް ހިންގާ "ޓެސްޓް ރަން" ވެސް ހިމެނެ އެވެ.
ފޯބްސް މަޖައްލާގެ ރިއަލް ޓައިމް ބިލިއަނަރުންގެ ލިސްޓުގައިވާ ގޮތުގައި ދެކުނު އެފްރިކާ އަށް އުފަން އުމުރުން 50 އަހަރުގެ މަސްކްގެ މުއްސަނދިކަން ކޮވިޑް ބަލިމަޑުކަމުގެ ތެރޭގައި 250 ބިލިއަން ޑޮލަރަށް ވުރެ އިތުރުވި އެވެ.
އޭގެ އިތުރުން މަސްކްގެ ޓްވިޓާ އަކީ ވެސް ގިނަ ބަޔެއްގެ ސަމާލުކަން ލިބޭ އެއްޗެކެވެ. އެގޮތުން މިދިޔަ ނޮވެމްބަރު މަހު އޭނާގެ ޓެސްލާ ކުންފުނީގެ ހިއްސާގެ 10 ޕަސެންޓު ވިއްކާލަންވީތޯ ސުވާލުކޮށް، އާއްމުންގެ ހިޔާލަށް ޕޯލް ހުޅުވާލި އެވެ.
ފަސްދޮޅަސް ހަ މިލިއަނަށް ވުރެ ގިނަ މީހުން ޓްވިޓާގައި އޭނާ ފޮލޯކުރެ އެވެ. އޭގެ އިތުރުން އެމެރިކާގެ މަޝްހޫރު ޓީވީ ޝޯ، ސަޓަޑޭ ނައިޓް ލައިވް މިދިޔަ މޭ މަހު ގެސްޓެއްގެ ގޮތުގައި ހުށަހަޅައިދިނެވެ.
މަސްކްގެ އެންމެ ބޮޑު އެއް ހުވަފެނަކީ މާސްގެ ބިމުގައި އިންސާނުން ދިރިއުޅެން ފެށުމެވެ. "ޕާސަން އޮފް އިޔާ" ކަން ލިބުމުން ޓައިމް މަޖައްލާ އަށް ދިން އިންޓަވުގައި ވެސް އޭނާ ބުނީ "އަމާޒަކީ ދިރިއުޅުމަކީ މަލްޓި ޕްލެނެޓަރީ ނުވަތަ ގިނަ ޕްލެނެޓުތަކުގައި ކުރިއަށްދާނެ އެއްޗަކަށް ހެދުން" ކަމަށެވެ.
މަސްކްގެ އެންމެ ޓްވީޓަކުން މާކެޓުތަކަށް ބޮޑެތި ބަދަލު އައިސް، ކްރިޕްޓޯކަރަންސީގެ އަގުތަކަށް ބަދަލު އާދެ އެވެ. ނަމަވެސް އޭނާގެ އެންމެ ބޮޑު ނުފޫޒެއް ހިނގަނީ އިލެކްޓިކް ކާރުގެ ސިނާއަތަށެވެ.
