އިޒްރޭލުގެ ބޮޑު ވަޒީރު ނަފްތާލީ ބެނެޓް ޔުނައިޓެޑް އަރަބް އެމިރޭޓްސް (ޔޫއޭއީ) އަށް ވަޑައިގެން އެ ގައުމުގެ ވަލީ އަހުދު ޝެއިހް މުހައްމަދު ބިން ޒަޔިދް އަލް ނަހްޔާންއާ ބައްދަލުކުރައްވައިފި އެވެ.
މިއީ ދެ ގައުމުން 2020 ވަނަ އަހަރު ޑިޕްލޮމެޓިކް ގުޅުން ގާއިމްކުރި ފަހުން އިޒްރޭލުގެ ބޮޑު ވަޒީރަކު ޔޫއޭއީ އަށް ކުރައްވާ ފުރަތަމަ ދަތުރެވެ. މީގެ ކުރިން އިޒްރޭލުގެ ފޮރިން މިނިސްޓަރު ޔޫއޭއީ އަށް ވަޑައިގެންނެވި އެވެ.
ބެނެޓް އާއި ޝެއިހް މުހައްމަދު ބިން ޒަޔިދު ބައްދަލުކުރެއްވީ އެމަނިކުފާނުގެ ރަސްމީ ގަނޑުވަރުގަ އެވެ. މަޝްވަރާގައި އިސްކަންދެއްވީ ވިޔަފާރި އަށް ކަމަށާއި މިއީ މެދުއިރުމައްޗަށް "މުޅިން އާ ހަގީގަތެއް" ގެނައުމުގެ ފެށުން ކަމަށް އިޒްރޭލުން ބުންޏެވެ.
ބެނެޓް ޔޫއޭއީ އަށް ވަޑައިގެންފައި ވާއިރު، އިޒްރޭލުން ދަނީ ވިއެނާގައި ކުރިއަށްދާ އިރާނުގެ ނިޔުކްލިއާ މަޝްވަރާ ހުއްޓުވަން ޑިޕްލޮމެޓިކް މަސައްކަތްތައް ކުރަމުންނެވެ.
އިރާނާއި ބާރުގަދަ ގައުމުތަކާ ދެމެދު 2015 ވަނަ އަހަރު ސޮއިކުރި ނިޔުކްލިއާ އެއްބަސްވުން އިއާދަކުރުމާ ގުޅޭ ގޮތުން ބާއްވާ މަޝްވަރާތައް ދާދި ފަހުން އަލުން ފެށި އެވެ. އެއްބަސްވުމުގެ ދަށުން އިރާނުގެ ބައެއް ނިޔުކްލިއާ ހަރަކާތްތައް މަޑުޖައްސާލުމުން، ދަތިކުރުމުގެ ފިޔަވަޅުތަކަށް ލުއިތަކެއް ދިނެވެ.
އިރާނުން އުޅެނީ ނިޔުކްލިއާ ހަތިޔާރު އުފައްދަން ކަމަށް ތުހުމަތު ކުރި ނަމަވެސް އެ ގައުމުން ބުނަނީ އެއީ ސުލްހަވެރި ބޭނުމަށް ހިންގާ ހަކަތަ އުފެއްދުމުގެ ޕްރޮގްރާމެއް ކަމަށެވެ.
އެމެރިކާ އިން 2018 ވަނަ އަހަރު ނިޔުކްލިއާ އެއްބަސްވުމަށް އަމަލު ކުރުން ހުއްޓާލުމުން އިރާނުން ވެސް އަލުން ޔުރޭނިއަމް މުއްސަނދި ކުރަން ފެށި އެވެ. މިހާރު ވިއެނާގައި ކުރިއަށްދާ މަޝްވަރާތަކުގެ އަމާޒަކީ އަލުން އެއްބަސްވުން ތަންފީޒު ކުރަން ނިންމުމެވެ.
ނަމަވެސް އިރާނުން "ނިޔުކްލިއާ ބްލެކްމެއިލް" ކުރާ ކަމަށް ތުހުމަތުކޮށް، މަޝްވަރާތައް ހުއްޓާލަން ބެނެޓް ވަނީ އެމެރިކާ އަށް ގޮވާލައްވާފަ އެވެ. ޔޫއޭއީގެ ނޭޝަނަލް ސެކިއުރިޓީ އެޑްވައިޒަރު ޝެއިހް ތަހްނޫން ބިން ޒަޔިދް އަލް ނަހްޔާން މި މަހުގެ ކުރީކޮޅު އިރާނަށް ވަޑައިގެން، ރައީސް އިބްރާހިމް ރައިސީއާ ބައްދަލުކުރެއްވި އެވެ.
އެއީ 2016 ވަނަ އަހަރު އިރާނާއި ޔޫއޭއީގެ ގުޅުން ޑައުންގްރޭޑް ކުރި ފަހުން ޔޫއޭއީގެ ވެރިޔަކު އިރާނަށް ކުރެއްވި ފުރަތަމަ ދަތުރެވެ.
އިޒްރޭލާ އެކު ފުރިހަމަ ޑިޕްލޮމެޓިކް ގުޅުން ގާއިމްކުރި ތިން ވަނަ އަރަބި ގައުމަކީ ޔޫއޭއީ އެވެ. އޭގެ ކުރިން މިސްރާއި އުރުދުން އިން ވަނީ ގުޅުން ގާއިމްކޮށްފަ އެވެ.
ޔޫއޭއީ އަށް ފަހު ބަހްރެއިން އާއި މޮރޮކޯ އިން ވެސް ގުޅުން ގާއިމްކުރި އެވެ. އެ ގައުމުތަކުން އިޒްރޭލާ އެކު ގުޅުން ގާއިމްކުރީ އެމެރިކާގެ ކުރީގެ ރައީސް ޑޮނަލްޑް ޓްރަމްޕް ހުށަހެޅުއްވި ޑީލްތަކެއްގެ ތެރެއިންނެވެ.
"އަބްރަހަމް އެކޯޑްސް"ގެ ގޮތުގައި މަޝްހޫރުވެފައިވާ ޑީލްތަކުގެ ތެރެއިން ސޫދާނުން ވެސް އިޒްރޭލާ އެކު ގުޅުން ގާއިމްކުރަން އެއްބަސްވި އެވެ. ނަމަވެސް މިހާތަނަށް ފުރިހަމަ ގުޅުން ގާއިމްކޮށްފައެއް ނުވެ އެވެ.
އެ ޑީލްތަކުގައި ސޮއިކުރި އިރު އިޒްރޭލުގެ ބޮޑު ވަޒީރަކަށް ހުންނެވި ބެންޖަމިން ނަތަންޔާހޫ ވިދާޅުވީ އޭގެ ސަބަބުން ވާދަވެރި އިރާނާ ދެކޮޅަށް ސަރަހައްދީ ބައިވެރިންތަކެއް ލިބޭނެ ކަމަށެވެ. އިރާނުގެ ނިޔުކްލިއާ މަޝްރޫއު ހުއްޓުވަން އިޒްރޭލުން ވަރަށް ބޮޑަށް ބޭނުންވެ އެވެ.
