ނިޔޯން، ސްވިޒަލެންޑް (ޑިސެމްބަރު 13) - އެކާވީސް އަހަރު ތެރޭ ފުރަތަމަ ފަހަރަށް ޗެމްޕިއަންސް ލީގުގެ ގްރޫޕް ސްޓޭޖުން ކެޓި ބާސެލޯނާ، ޔުއެފާ ޔޫރޮޕާ ލީގުގެ ދެ ވަނަ ބުރުގައި އިޓަލީގެ ނަޕޯލީއާ ދެކޮޅަށް ކުޅެން ޖެހިއްޖެ އެވެ.
ބާސެލޯނާ މި ފަހަރު ޔޫރޮޕާ ލީގުގައި ކުޅެން ޖެހުނީ ޗެމްޕިއަންސް ލީގުގައި ވާދަކުރި ގްރޫޕްގެ ތިން ވަަނަ ދިއުމުންނެވެ. ބާސެލޯނާ އިން އެންމެ ފަހުން ޔޫރޮޕާ ލީގުގައި ކުޅުނުއިރު، މި މުބާރާތުގެ ނަމަކީ ޔުއެފާ ކަޕް އެވެ. އެއީ 2004 ވަނަ އަހަރު އެވެ. އޭރު ބާސެލޯނާގެ މިޑްފީލްޑަރަކަށް މިހާރު އެ ޓީމާ ހަވާލުވެ ހުރި ކޯޗު ޒަވީ ހެނާންޑޭޒް ކުޅުނެވެ.
ނަޕޯލީން ގްރޫޕް ސްޓޭޖުގެ ދެ ވަނަ ހޯދީ އިންގްލެންޑްގެ ލެސްޓާ ސިޓީ ކަޓުވާލުމަށް ފަހު އެވެ. ނަޕޯލީ އާއި ބާސެލޯނާ ވަނީ މީގެ ކުރިން ޗެމްޕިއަންސް ލީގުގައި ކުޅެފަ އެވެ. ނަޕޯލީ އާއި ބާސެލޯނާ ވަނީ 2019/2020 ވަނަ އަހަރުގެ ޗެމްޕިއަންސް ލީގުގެ ގަދަ 16 ޓީމުގެ ބުރުގައި ކުޅެފަ އެވެ. ނަޕޯލީ ދަނޑުގައި 1-1 އިން އެއްވަރުވިއިރު، ބާސެލޯނާ ދަނޑުގައި އެ ޓީމު މޮޅުވީ 3-1 އިންނެވެ.
މި ފަހަރުގެ ޔޫރޮޕާ ލީގުގެ ފައިނަލް ކުޅޭ ސެވިލް ސަރަަހައްދަށް ނިސްބަތްވާ ސެވިއްޔާ އިން ޗެމްޕިއަންސް ލީގުގެ ގްރޫޕް ސްޓޭޖުން ކެޓީ ތިން ވަނައިގެ ގޮތުގަ އެވެ. ހަ ފަހަރު ޔޫރޮޕާ ލީގު ކާމިޔާބު ކޮށްފައިވާ ސެވިއްޔާ ދެ ވަނަ ބުރުގައި ކުޅޭނީ ކްރޮއޭޝިއާގެ ޑިނަމޯއާ އެވެ. އިޓަލީގެ އެޓަލަންޓާ އިން ކުޅޭނީ ގްރީސްގެ އޮލިމްޕިއާކޯސްއާ އެެވެ.
ޖަރުމަނުގެ އާރްބީ ލައިޕްޒިގު ކުޅެން ޖެހޭނީ ސްޕެއިނުގެ ރެއާލް ސޮސިއެޑާޑާ އެވެ. ރަޝިއާގެ ޒެނިޓް ޕީޓާސްބާގް ކުޅޭނީ ސްޕެއިނުގެ ރެއާލް ބެޓިސްއާ އެވެ. ޖަރުމަނުގެ ބޮރޫޝިއާ ޑޯޓްމަންޑުން ސްކޮޓްލެންޑްގެ ޗެމްޕިއަން ރޭންޖާސްއާ ބައްދަލުކުރަން ޖެހުނުއިރު، މޮލްޑޯވާގެ ޝެރިފް ޓިރާސްޕޯލް ބައްދަލުކުރާނީ ޕޯޗުގަލްގެ ބްރާގާއާ އެވެ. އަދި ޕޯޗުގަލްގެ ޕޯޓޯ ކުޅޭނީ އިޓަލީގެ ލާޒިއޯއާ އެވެ.
ދެ ވަނަ ބުރުގެ މެޗުތައް އޮންނާނީ އަންނަ ފެބްރުއަރީ މަހުގެ 17 އާއި 24 ވަނަ ދުވަހު އެވެ.
