ވިލާ ހަކަތާއިގެ އަމިއްލަ ބެޓެރީ ބްރޭންޑް "ވިލާ ފިއުޝަން" ލޯންޗުކޮށް، އެ ބްރޭންޑުގެ ކަނޑުގައި ދުއްވާ އުޅަނދުފަހަރަށް ހާއްސަ މެރިން ބެޓެރީ ރޭންޖު މިއަދު ބާޒާރަށް ނެރެފި އެވެ.
މިހާރު ކުރިޔަށްދާ މެރިން އެކްސްޕޯގައި ނެރުނު މެރިން ބެޓެރީ ރޭންޖުގެ ދަށުން ކަނޑުގައި ދުއްވާ އުޅަނދުފަހަރަށް ހާއްސަ އަދި އާންމުކޮށް ބޭނުންކުރާ ހަތަރު ސައިޒެއްގެ ބެޓެރީ ވިލާ ހަކަތައިން ދައްކާލި އެވެ.
މިއީ ދިވެހި ކުންފުންޏަކުން އަމިއްލަ ބެޓެރީ އުފައްދައިގެން ބާޒާރަށް ނެރުނު ފުރުތަމަ ފަހަރެވެ. މި ބެޓެރީތައް އެސެމްބަލް ކުރަނީ އިންޑިއާގަ އެވެ.
ވިލާ ފިއުޝަން މެރިން ބެޓެރީ ރޭންޖު
- 100 އެމްޕަޔަރު
- 120 އެމްޕަޔަރު
- 150 އެމްޕަޔަރު
- 200 އެމްޕަޔަރު
މި ބެޓެރީތަކާ ގުޅިގެން މައުލޫމާތު ދެމުން ވިލާ ހަކަތައިގެ ސޭލްސް މެނޭޖަރު ބާސިލް ނަފީޒް ވިދާޅުވީ މިއަދު ބާޒާރަށް ނެރުނު ހަތަރު ސައިޒުގެ ބެޓަރިއަކީ ލޯންޗާއި ދޯނިފަހަރަށް އާންމުކޮށް ބޭނުންވާ ސައިޒުގެ ބެޓެރީ ކަމަށެވެ. މިއީ މެއިންޓެނަންސް-ފްރީ ބެޓެރީ ކަމަށް ވެސް އޭނާ ވިދާޅުވި އެވެ.
"މި އިވެންޓުގައި އަޅުގަނޑުމެން މި ލޯންޗު ކުރަނީ މެރިން މާކެޓަށް އެންމެ އެކަށީގެންވާ ހަތަރު ސައިޒު" އޭނާ ވިދާޅުވީ އެވެ.
މެރިން ބެޓެރީ ރޭންޖުގެ އިތުރުން، ވިލާ ފިއުޝަން ބްރޭންޑުގެ ދަށުން ކައިރި މުސްތަގުބަލުގައި އެއްގަމު އުޅަނދުތަކަށް ހާއްސަ ލޭންޑް ބެޓެރީ ރޭންޖެއް ނެރޭނެ އެވެ.
ބާސިލް ވިދާޅުވީ އެއްގަމު އުޅަނދުތަކަށް ހާއްސަ ބެޓެރީ ސައިޒުތައް ވިލާ ފިއުޝަންގެ ތެރެއިން ބާޒާރަށް އަންނާނެ ކަމަށެވެ. މި ރޭންޖުގެ ތެރޭގައި ކަރަންޓުން ދުވާ ބަގީއަށް ހާއްސަ ބެޓެރީ އާއި ކުދި ޕިކަޕަށާއި ސައިކަލަށް ހާއްސަ ބެޓެރީތައް ހިމެެނެ އެވެ.
މެރިން ބެޓެރީތަކެއް ވިޔަސް 100 އެމްޕަޔަރު ބެޓެރީ ބޭނުން ކުރެވޭނެ ޕިކަޕުތަކުގައި. އަދި ބޮޑެތި ސައިޒުތައް ބޭނުންކުރެވޭނެ ހެވީ ވެހިކަލްތަކުގައި" ބާސިލް ވިދާޅުވި އެވެ.
މެރިން އެކްސްޕޯގައި ހުރި "ވިލާ ހަކަތަ" ސްޓޯލް -- ފޮޓޯ: މުހައްމަދު ޝާބިން / އަދަދު
titledesc
ވިލާ ފިއުޝަންގެ ބެޓެރީތަކުގެ އަގާ ގުޅިގެން ބާސިލް ވިދާޅުވީ، މި ރޭންޖުގެ ބެޓެރީތަކުގެ އަގު ބާޒާރުގައި ހުރި އަގުތަކަށް ވުރެ ހެޔޮ ވާނެ ކަމަށެވެ.
މި ބެޓެރީތައް މިހާރު ވިލާ ހަކަތައިގެ އައުޓްލެޓްތަކުން ލިބޭނެ އެވެ. އަދި އޯޑަރުކޮށްލުމުން މާލެއިން ދޯންޏާ ހަމައަށް ޑެލިވަރީކޮށްދެ އެވެ.
ވިލާ ހަކަތައިން ބުނި ގޮތުގައި ވިލާ ފިއުޝަންއާ ގުޅިގެން އެއްވެސް މައުލޫމާތެއް ބޭނުންވާނަމަ، މެރިން އެކްސްޕޯގައި ހުރި ވިލާ ހަކަތައިގެ ސްޓޯލުން އެ މައުލޫމާތު ލިބޭނެ އެވެ.
މެރިން އެކްސްޕޯ އޮންނާނީ މިއަދުން ފެށިގެން ބުދަ ދުވަހާ ހަމައަށް، ކޮންމެ ދުވަހެއްގެ މެންދުރު 2:00 އިން ފެށިގެން ގޮސް ރޭގަނޑު 10:00 އާ ހަމައަށް ހުޅުމާލޭ ސެންޓްރަލް ޕާކުގަ އެވެ.
