ގުދުސް (ޑިސެމްބަރު 12) - ތާރީހީ ދަތުރެއްގައި އިޒްރޭލުގެ ބޮޑު ވަޒީރު ނަފްތާލީ ބެނެޓް އާދީއްތަ ދުވަހު ޔުނައިޓެޑް އަރަބް އެމިރޭޓްސް (ޔޫއޭއީ) އަށް ވަޑައިގެންފި އެވެ.
އެއީ އިޒްރޭލާއި ޔޫއޭއީއާ ދެމެދު 2020 ވަނަ އަހަރު ޑިޕްލޮމެޓިކް ގުޅުން ގާއިމްކުރި ފަހުން އިޒްރޭލުގެ ބޮޑު ވަޒީރަކު ޔޫއޭއީ އަށް ކުރައްވާ ފުރަތަމަ ދަތުރެވެ.
ބެނެޓް ޔޫއޭއީ އަށް ކުރައްވާ ދަތުރުގައި ހޯމަ ދުވަހު އަބޫ ދާބީގެ ވަލީ އަހުދު ޝެއިހް މުހައްމަދު ބިން ޒަޔިދު އަލް ނަހްޔާންއާ ބައްދަލުކުރައްވައި، "އިޒްރޭލާއި ޔޫއޭއީގެ ގުޅުން ވަރުގަދަކޮށް، އިގްތިސާދީ އަދި ސަރަހައްދީ މައްސަލަތަކުގައި މަޝްވަރާ ކުރައްވާނެ" ކަމަށް ބެނެޓް އޮފީހުން ބުންޏެވެ.
"މިއީ އިޒްރޭލުގެ ބޮޑު ވަޒީރަކު ޔޫއޭއީ އަށް ކުރައްވާ ފުރަތަމަ ރަސްމީ ދަތުރު،" އެ ބަޔާނުގައި ބުންޏެވެ.
އިޒްރޭލާ އެކު ފުރިހަމަ ޑިޕްލޮމެޓިކް ގުޅުން ގާއިމްކުރި ތިން ވަނަ އަރަބި ގައުމަކީ ޔޫއޭއީ އެވެ. އޭގެ ކުރިން މިސްރާއި އުރުދުން އިން ވަނީ ގުޅުން ގާއިމްކޮށްފަ އެވެ.
ޔޫއޭއީ އަށް ފަހު ބަހްރެއިން އާއި މޮރޮކޯ އިން ވެސް ގުޅުން ގާއިމްކުރި އެވެ. އެ ގައުމުތަކުން އިޒްރޭލާ އެކު ގުޅުން ގާއިމްކުރީ އެމެރިކާގެ ކުރީގެ ރައީސް ޑޮނަލްޑް ޓްރަމްޕް ހުށަހެޅުއްވި ޑީލްތަކެއްގެ ތެރެއިންނެވެ.
"އަބްރަހަމް އެކޯޑްސް"ގެ ގޮތުގައި މަޝްހޫރުވެފައިވާ ޑީލްތަކުގެ ތެރެއިން ސޫދާނުން ވެސް އިޒްރޭލާ އެކު ގުޅުން ގާއިމްކުރަން އެއްބަސްވި އެވެ. ނަމަވެސް މިހާތަނަށް ފުރިހަމަ ގުޅުން ގާއިމްކޮށްފައެއް ނުވެ އެވެ.
އެ ޑީލްތަކުގައި ސޮއިކުރި އިރު އިޒްރޭލުގެ ބޮޑު ވަޒީރަކަށް ހުންނެވި ބެންޖަމިން ނަތަންޔާހޫ ވިދާޅުވީ އޭގެ ސަބަބުން ވާދަވެރި އިރާނާ ދެކޮޅަށް ސަރަހައްދީ ބައިވެރިންތަކެއް ލިބޭނެ ކަމަށެވެ. އިރާނުގެ ނިޔުކްލިއާ މަޝްރޫއު ހުއްޓުވަން އިޒްރޭލުން ވަރަށް ބޮޑަށް ބޭނުންވެ އެވެ.
އިރާނާއި ބާރުގަދަ ގައުމުތަކާ ދެމެދު 2015 ވަނަ އަހަރު ސޮއިކުރި ނިޔުކްލިއާ އެއްބަސްވުން އިއާދަކުރުމާ ގުޅޭ ގޮތުން ބާއްވާ މަޝްވަރާތައް ދާދި ފަހުން އަލުން ފެށި އެވެ. އެއްބަސްވުމުގެ ދަށުން އިރާނުގެ ބައެއް ނިޔުކްލިއާ ހަރަކާތްތައް މަޑުޖައްސާލުމުން، ދަތިކުރުމުގެ ފިޔަވަޅުތަކަށް ލުއިތަކެއް ދިނެވެ.
އިރާނުން އުޅެނީ ނިޔުކްލިއާ ހަތިޔާރު އުފައްދަން ކަމަށް ތުހުމަތު ކުރި ނަމަވެސް އެ ގައުމުން ބުނަނީ އެއީ ސުލްހަވެރި ބޭނުމަށް ހިންގާ ހަކަތަ އުފެއްދުމުގެ ޕްރޮގްރާމެއް ކަމަށެވެ.
އެމެރިކާ އިން 2018 ވަނަ އަހަރު ނިޔުކްލިއާ އެއްބަސްވުމަށް އަމަލު ކުރުން ހުއްޓާލުމުން އިރާނުން ވެސް އަލުން ޔުރޭނިއަމް މުއްސަނދި ކުރަން ފެށި އެވެ. މިހާރު ވިއެނާގައި ކުރިއަށްދާ މަޝްވަރާތަކުގެ އަމާޒަކީ އަލުން އެއްބަސްވުން ތަންފީޒު ކުރަން ނިންމުމެވެ.
ނަމަވެސް އިރާނުން "ނިޔުކްލިއާ ބްލެކްމެއިލް" ކުރާ ކަމަށް ތުހުމަތުކޮށް، މަޝްވަރާތައް ހުއްޓާލަން ބެނެޓް ވަނީ އެމެރިކާ އަށް ގޮވާލައްވާފަ އެވެ.
ޔޫއޭއީގެ ނޭޝަނަލް ސެކިއުރިޓީ އެޑްވައިޒަރު ޝެއިހް ތަހްނޫން ބިން ޒަޔިދް އަލް ނަހްޔާން މި މަހުގެ ކުރީކޮޅު އިރާނަށް ވަޑައިގެންނެވި އެވެ.
އެއީ 2016 ވަނަ އަހަރު އިރާނާއި ޔޫއޭއީގެ ގުޅުން ޑައުންގްރޭޑް ކުރި ފަހުން ޔޫއޭއީގެ ވެރިޔަކު އިރާނަށް ކުރެއްވި ފުރަތަމަ ދަތުރެވެ.
މިދިޔަ އަހަރު "އަބްރަހަމް އެކޯޑްސް" ގައި ސޮއިކުރި ފަހުން އިޒްރޭލާއި ޔޫއޭއީ އިން ވަނީ ގިނަ އެއްބަސްވުންތަކެއްގައި ސޮއިކޮށްފަ އެވެ.
