ވިލްމިންގްޓަން، އެމެރިކާ (ޑިސެމްބަރު 12) - ހުކުރު ދުވަހުގެ ދަންވަރު އެމެރިކާގެ އެކި ހިސާބުތަކަށް އެރި ބާރުގަދަ ނަގޫރޯޅިތަކަކީ "ގައުމުގެ ތާރީހުގައި ދިމާވި އެންމެ ބޮޑު ނަގޫރޯޅިތަކަށް ވެދާނެ" ކަމަށް ރައީސް ޖޯ ބައިޑެން ވިދާޅުވެއްޖެ އެވެ،
"މިއީ ބޮޑު ހިތާމައެއް. މަރުވީ ކިހާ އަދަދެއްގެ މީހުން ކަމެއް އަދިވެސް ޔަގީންކޮށް ބުނަން ނޭނގޭ އަދި ލިބުނީ ކިހާ ގެއްލުމެއް ކަމެއް ވަޒަން ކުރަން ނޭނގޭ،" ޓީވީ މެދުވެރިކޮށް ގައުމާ މުހާތަބު ކުރައްވަމުން ހޮނިހިރު ދުވަހު ބައިޑެން ވިދާޅުވި އެވެ.
މިހާތަނަށް އެނގިފައިވާ ގޮތުގައި މަދުވެގެން 78 މީހުން މަރުވި އެވެ. އޭގެ ތެރެއިން 70 މީހުން މަރުވީ ކެންޓަކީ ސްޓޭޓުންނެވެ. ގިނަ އަދަދެއްގެ ނަގޫރޯޅިތައް އެއް ފަހަރާ އެރުމުން ފަސް ސްޓޭޓަކަށް ވަނީ ބޮޑެތި ގެއްލުންތައް ލިބިފަ އެވެ.
މަރުވި މީހުންގެ އަދަދު ވަރަށް ބޮޑަށް އިތުރު ވާނެ ކަމަށް ލަފާކުރެވެ އެވެ.
"ރައްޔިތުންނަށް ބޭނުންވާ ކޮންމެ ކަމެއް އަދި ކޮންމެ އެއްޗެއް ފޯރުކޮށްދޭން ވެސް އަޅުގަނޑު މަސައްކަތް ކުރާނަން،" ނޫސްވެރިންނަށް ސުވާލު ކުރުމުގެ ފުރުސަތު ދީގެން ގައުމާ މުހާތަބު ކުރުމަށް ބޭއްވި ޕްރެސް ކޮންފެރެންސްގައި ބައިޑެން ވައުދުވެވަޑައިގެންނެވި އެވެ.
މޫސުމީ ބަދަލުގެ އަސަރު ނަގޫރޯޅިތަކަށް ކޮށްފައި ވޭތޯ ސުވާލު ކުރުމުން އެމަނިކުފާނު ވިދާޅުވީ "ޔަގީންކޮށް ބުނަން ނޭނގޭ" ކަމަށެވެ. ނަމަވެސް އެ ސުވާލާ ގުޅޭ ދިރާސާތައް ކުރަން އެންވާރަމެންޓަލް ޕްރޮޓެކްޝަން އެޖެންސީ އަށް އަންގަވާނެ ކަމަށް ވިދާޅުވި އެވެ.
"އެކަމަކު އަޅުގަނޑުމެން އެންމެންނަށް ވެސް ސާފުވާ ހަގީގަތަކީ ދުނިޔެ ހޫނުވާ ވަރަކަށް ހުރިހާ ކަމެއްގެ އަސަރު ވެސް މާ ބޮޑަށް ކުރަމުންދާކަން،" ބައިޑެން ވިދާޅުވި އެވެ.
"ބެލެވެނީ މިކަމުގައި ވެސް އޭގެ ސަބަބުން އަސަރުތަކެއް ހިމެނޭނެ ކަމަށް. އެކަމަކު އެއީ އަޅުގަނޑަށް ގޮތް ކިޔަން އެނގޭ ދާއިރާއެއް ނޫން."
