މިއުނިކް (ޑިސެމްބަރު 11) - ޖަރުމަނު ލީގުގައި މިރޭ ފަހަތުން އަރައި މައިންޒް އަތުން 2-1 އިން މޮޅުވެ، ބަޔާން މިއުނިކުން ލީގުގެ އެއް ވަނައިގައި ލީޑުފުޅާކޮށްފި އެވެ.
ބަޔާނަށް ލީޑުފުޅާކުރެވުނީ ދެ ވަނައިގައި އޮތް ބޮރޫޝިއާ ޑޯޓްމަންޑް ކުޅުނު މެޗުން ވީއެފްއެލް ބޯކުމް ދަނޑުގައި 1-1 އިން އެއްވަރުވުމުންނެވެ. ބަޔާން އެއް ވަނައިގައި އޮތީ 15 މެޗުން 37 ޕޮއިންޓާ އެކު އެވެ. ދެ ވަނައިގައި އޮތް ޑޯޓްމަންޑަށް ވަނީ 15 މެޗުން 31 ޕޮއިންޓް ލިބިފަ އެވެ.
މިރޭގެ ނަތީޖާއާ އެކު ބަޔާންގެ ކޯޗު، އުމުރުން 34 އަހަރުގެ ހޫލިއަން ނާގަލްސްމަން ވަނީ ޖަރުމަނު ލީގުގައި 100 މޮޅު ހަމަކޮށްފަ އެވެ. ނާގަލްސްމަން ބަޔާނާ ހަވާލުވުމުގެ ކުރިން ކޯޗުކޮށްދިނީ ހޮފެންހައިމާއި އާރްބީ ލައިޕްޒިގަށެވެ.
ބަޔާންގެ ކޯޗު ހޫލިއަން ނާގަލްސްމަން: އޭނާ އަކީ ޖަރުމަނު ލީގުގައި އެންމެ ހަގު އުމުރުގައި 100 މޮޅު ހަމަކުރި ކޯޗު.
ބަޔާންގެ އަލިއާންޒް އެރީނާގައި މިރޭ ކުޅުނު މެޗު ފަށައިގެން 22 ވަނަ މިނިޓްގައި މައިންޒުން ވަނީ ލީޑުނަގައިފަ އެވެ. އޭރިއާތެރެއަށް ޖޮނަތަން ބާކާޑްޓް ނަގައިދިން ހުރަހަކުން މައިންޒްގެ ކަރީމް އޮނިސީވޯ ވަނީ ބޮލުން ގޯލުގެ ތެރެއަށް ބޯޅަ ފޮނުވާލައިފަ އެވެ.
ފުރަތަމަ ހާފުގައި ނަތީޖާ ހަމަހަމަކުރަން ބަޔާނުން ކުރި މަސައްކަތް ކާމިޔާބެއް ނުވި އެވެ. އެކަމަކު، ދެ ވަނަ ހާފްގެ ކުޅުން ފެށިގެން އަށް މިނިޓް ތެރޭ ބަޔާނުން ވަނީ ނަތީޖާ ހަމަަހަމަކޮށްދީފަ އެވެ.
މެޗުގެ 53 ވަނަ މިނިޓްގައި ބަޔާންގެ ފްރާންސްގެ ދެ ކުޅުންތެރިން ގުޅިގެން ކުރި އެޓޭކެއްގައި ވަނީ އެ ޓީމުގެ ފުރަަތަމަ ގޯލު ޖަހައިފަ އެވެ. ކިންގްސްލީ ކޯމަން މި ގޯލު ޖެހީ ކޮރެންޓިން ޓޮލީސޯ ދިން ބޯޅައަކުންނެވެ.
ބަޔާން މޮޅުވާން ކުރި މަސައްކަތް ކާމިޔާބު ކޮށްދިނީ ޒުވާން މިޑްފީލްޑަރު ޖަމާލް މުސިއާލާ އެވެ. މެޗުގެ 74 ވަނަ މިނިޓްގައި ބެންޖަމިން ޕަވާޑް ދިން ބޯޅަ މުސިއާލާ ވަނީ ގޯލުގެ ކަނަށް ފޮނުވާލައިފަ އެވެ. މައިންޒްގެ މޫސާ ނިއަކާޓޭ އެ ޓީމަށް އެއްވަރުކޮށްދޭން ފޮނުވާލި ބޯޅަ ބަޔާން ކީޕަރު މެނުއަލް ނޯޔާ ވަނީ މަތަކޮށްފަ އެވެ.
އަމިއްލަ ދަނޑުގައި ކުޅުނު މެޗުގައި ބޯކުމް އަށް ލީޑުނަގައިދިނީ ޕެނަލްޓީ އަކުން ސަބެސްޓިއަން ޕޯލްޓާ އެވެ. ޑޯޓްމަންޑަށް އެއްވަރުކޮށްދިނީ އާލިން ބްރައުޓް ހާލަންޑް ނަގައިދިން ހުރަހަކުން ހޫލިއަން ބްރަންޑްޓް އެވެ. ބްރަންޑް އެ ގޯލު ޖެހުމުގެ ކުރިން ޑޯޓްމަންޑުން ޖެހި ގޯލެއް ވަނީ އޮފްސައިޑް ކަމަށް ނިންމައިފަ އެވެ.
