އެމެރިކާގެ ކެންޓަކީ ސްޓޭޓަށް ހުކުރު ދުވަހުގެ ދަންވަރު އެރި ނަގޫރޯޅިތަކެއްގައި 70 އަށް ވުރެ ގިނަ މީހުން މަރުވެއްޖެ އެވެ.
ސްޓޭޓުގެ ގަވަރުނަރު އެންޑީ ބެޝިއާ ވިދާޅުވީ އެ ސްޓޭޓުގެ ތާރީހުގައި ދިމާވި އެންމެ ނުރައްކާތެރި ނަގޫރޯޅިތަކުގައި މަރުވި މީހުންގެ އަދަދު 100 އިން މައްޗަށް އަރާނެ ކަމަށް ލަފާކުރެވޭ ކަމަށެވެ.
މޭފީލްޑް އަވަށުގައި އުއްބައްތި އުފައްދާ ފެކްޓްރީއެއް ތެރޭގައި ގިނަ އަދަދެއްގެ މީހުން މަރުވެފައިވާ ކަމަށް ބެލެވެ އެވެ.
މޭފީލްޑް އަވަށަށް ވަނީ ބޮޑެތި ގެއްލުންތަކެއް ލިބިފައި. -- ފޮޓޯ: އޭއެފްޕީ
ކެންޓަކީގެ އިތުރުން އެހެން ސްޓޭޓުތަކަށް ނަގޫރޯޅީގެ އަަރުކޮށް ފަސް މީހުން މަރުވި އެވެ. ކެންޓަކީގައި ވަނީ ކުއްލި ނުރައްކަލުގެ ހާލަތު އިއުލާނުކޮށްފަ އެވެ.
ގަވަރުނަރު ބެޝިއާ ވިދާޅުވީ ނަގޫރޯޅި އެރި އިރު 100 އަށް ވުރެ ގިނަ މީހުން މޭފީލްޑްގެ އުއްބައްތި ފެކްޓްރީ ތެރޭގައި ތިބި ކަމަށެވެ.
"އަޅުގަނޑުމެންނަށް ގަބޫލުކުރެވެނީ އޭގެ ތެރެއިން ގިނަ ބަޔަކު މަރުވެފައިވާ ކަމަށް،" އޭނާ ވިދާޅުވި އެވެ.
ރައީސް ޖޯ ބައިޑެން ކުރެއްވި ޓްވީޓެއްގައި ވިދާޅުވީ ނަގޫރޯޅިއާ ބެހޭ ގޮތުން ހޮނިހިރު ދުވަހުގެ ހެނދުނު އިދާރާތަކުން ތަފްސީލް މައުލޫމާތު ފޯރުކޮށްދިން ކަމަށެވެ.
"މިފަދަ ތޫފާނެއްގެ ތެރޭގައި ލޯބިވާ މީހަކު ވަކިވެގެން ދިޔުމަކީ ހިތަށް ގެނެވޭވަރުގެ ކަމެއް ނޫން. ލިބުނު ގެއްލުންތައް ބަލައި، މީހުން ސަލާމަތް ކުރުން ކުރިއަށް ދާއިރު، އާއިލާތަކަށް ހުރިހާ އެހީއެއް ފޯރުކޮށްދޭން އަޅުގަނޑުމެން މި ދަނީ ގަވަރުނަރުންނާ އެކު މަސައްކަތް ކުރަމުން،" ބައިޑެން ވިދާޅުވި އެވެ.
