ލަންޑަން (ޑިސެމްބަރު 11) - ޔުއެފާ ކޮންފަރެންސް ލީގުގައި ފްރާންސްގެ ރެނެސްއާ ދެކޮޅަށް އިންގްލެންޑްގެ ޓޮޓެންހަމް ހޮޓްސްޕާސް ކުޅެން އޮތް މެޗު ފަސްކުރުމަށް ފަހު އަލުން ކުޅެވޭނެ ތާރީހާ މެދު ގޮތެއް ކަނޑަނޭޅި އެ މެޗާ މެދު ގޮތެއް ނިންމަން ޔުއެފާ އެތިކްސް ކޮމިޓީ އަށް ފޮނުވައިފި އެވެ.
ބުރާސްފަތި ދުވަހުގެރޭ ޓޮޓެންހަމް ދަނޑުގައި ރެނެސްއާ ދެކޮޅަށް ކުޅެން އޮތް މެޗު ފަސްކުރީ މެޗު ފެށެން 12 ގަޑިއިރަށް ވުރެ ކުޑަ ވަގުތު ކޮޅަކަށްވެފައި ވަނިކޮށެވެ. އެއީ ޓޮޓެންހަމްގެ އަށް ކުޅުންތެރިންނާއި ހަތަރު ޓީމު އޮފިޝަލަކު ކޮވިޑް-19 އަށް ޕޮޒިޓިވްވެފައިވާއިރު، އެ ކްލަބްގެ ހާލަތާ މެދު ސީދާކޮށް ކަންތައްތަކެއް ސާފުނުވާތީ އެވެ.
މެޗު ކުޅެން އޮތް ދުވަހު ޔުއެފާ އިން މެޗު ފަސްކުރަން ނިންމުމުން ރެނެސް އިން ހިތްހަމަ ނުޖެހުނެވެ.
ޔުއެފާގެ ގަވާއިދު ބުނާގޮތުން މި މަސް ނިމުމުގެ ކުރިން ޔޫރަޕްގެ ކްލަބް މުބާރާތްތަކުގެ ގްރޫޕް ސްޓޭޖުގެ މެޗުތައް ފުރިހަމަ ކުރަން ޖެހޭނެ އެވެ. ކޮންފަރެންސް ލީގަކީ ޔުއެފާގެ ތިން ވަނަ ފަންތީގެ ކްލަބް ފުޓްބޯޅަ މުބާރާތެވެ.
ޔުއެފާ އިން ބުނީ ރެނެސް އާއި ޓޮޓެންހަމާ މަޝްވަރާކުރި ނަމަވެސް އަލުން މެޗު ކުޅެން ތާރީހަކާ މެދު ގޮތެއް ނުނިންމުނު ކަމަށެވެ. އެންމެ ބޮޑު ސަބަބަކަށް ދިމާވީ މި މަހު ޓޮޓެންހަމްގެ ގިނަ މެޗުތަކެއް ކުޅެން ޝެޑިއުލްކޮށްފައިވުމެވެ.
ޔުއެފާ އިން މިހާރު ޓޮޓެންހަމް އާއި ރެނެސް ބައްދަލުކުރާ މެޗާ މެދު ގޮތެއް ނިންމަން ވަނީ ޔުއެފާ އެތިކްސް ކޮމިޓީއާ ހަވާލުކޮށްފަ އެވެ.
ރެނެސް ވަނީ ގްރޫޕް އެއް ވަަނައިގެ ގޮތުގައި އަނެއް ބުރުން ފުރުސަތު ހޯދައިފަ އެވެ. ޓޮޓެންހަމް އޮތީ ތިން ވަނައިގަ އެވެ. އެއީ ނެދަލެންޑްސްގެ ވިޓޭސީ އަށް ވުރެ ތިން ޕޮއިންޓް މަދުން ހޯދައިގެންނެވެ. ރެނެސް އަތުން ޓޮޓެންހަމް މޮޅުވެއްޖެނަމަ އެ ޓީމަށް ދެ ވަނަ ލިބޭނެ އެވެ.
ކޮވިޑް-19ގެ ހާލަތުގެ ސަބަބުން ޓޮޓެންހަމުން އިނގިރޭސި ޕްރިމިއާ ލީގުގައި މާދަމާރޭ ބްރައިޓަންއާ ކުޅެން އޮތް މެޗު ވެސް ވަނީ ފަސްކޮށްފަ އެވެ.
މިހާރު އޮތްގޮތުން ޓޮޓެންހަމް ދެން އެންމެ އަވަހަށް ކުޅޭނެ މެޗަކީ އަންނަ ބުރާސްފަތި ދުވަހު ލެސްޓާ ސިޓީއާ ކުޅޭ މެޗެވެ. އަދި 19 ވަނަ ދުވަހު ޓޮޓެންހަމުން އަމިއްލަ ދަނޑުގައި ލިވަޕޫލާ ކުޅޭނެ އެވެ. އޭގެ ފަހުން މި މަހު ޓޮޓެންހަމުން ލީގު ކަޕްގެ ކުއާޓާ ފައިނަލުގައި ވެސްޓް ހޭމްއާ ކުޅުމުގެ އިތުރުން އިނގިރޭސި ޕްރިމިއާ ލީގުގައި ކްރިސްޓަލް ޕެލަސް އާއި ސައުތެމްޓަންއާ ކުޅޭނެ އެވެ.
