އޭވީސީ ސީނިއާ މެންސް ސެންޓްރަލް ޒޯން މުބާރާތަށް ތައްޔާރުވާން ރާއްޖޭގެ ގައުމީ ވޮލީބޯޅަ ޓީމުން ސްރީލަންކާއާ ދެކޮޅަށް ކުޅޭ ތިން މެޗުގެ ތެރެއިން ފުރަތަމަ މެޗުގައި ރޭ ސީދާ ތިން ސެޓުން ރާއްޖެ ބަލިވިއިރު، ޓީމުގެ ފަރާތުން ބޭނުންވި ލެވަލްގެ ކުޅުމެއް ނުފެނުނު ކަމަށް ޓީމުގެ ކޯޗު މުހައްމަދު ސާޖިދު (ކާއްޓެ) ބުނެފި އެވެ.
ރޭގެ މެޗަކީ 2019 ވަނަ އަހަރު ޑިސެމްބަރު މަހު ނޭޕާލްގެ ކަތުމަންްޑޫގައި ކުރިއަށްދިޔަ ސައުތު އޭޝިއަން ގޭމްސްގައި ލަންކާ އަތުން ސީދާ ތިން ސެޓުން ބަލިވި ފަހުން ރާއްޖޭގެ ވޮލީ ޓީމުން ކުޅުނު ފުރަތަމަ މެޗެވެ. އެހެންވެ ރޭގެ މެޗަކީ ދެ އަހަރު ތެރޭ ގައުމީ ޓީމުން ކުޅުނު ފުރަތަމަ މެޗެވެ. ކޮވިޑް-19ގެ ސަބަބުން ގައުމީ ޓީމުގެ ފަރިތަކުރުންތައް ދިގު މުއްދަތަކަށް ހުއްޓިފައި އޮތެވެ. އެ އަށް ފަހު ޕްރެކްޓިސްތައް ފެށޭގޮތްވީ މީގެ މަހެއްހާ ދުވަސް ކުރިންނެވެ.
ރާއްޖެ ރޭގެ މެޗުން ބަލިވިއިރު، ސެޓުތައް ދިޔައީ 25-13، 25-14 އަދި 25-18 އިންނެވެ. ކާއްޓޭ ބުނީ ދެ އަހަރު ދުވަސް ވަންދެން އެއްވެސް މުބާރާތެއް އެއްޗެއް ނުކުޅެ ފުރަތަމަ މެޗު ކުޅުނުއިރު، ފެނުނީ ރާއްޖެ ޓީމަށް ވުރެ ލަންކާ ޓީމު ތަފާތު މޮޅުކޮށް ކަމަށެވެ.
ރޭގެ މެޗުގައި ރާއްޖެ ޓީމުގެ ފަރާތުން ގިނަ ގޯސްތަކެއް ފެނިގެންދިޔަ މި މެޗުގައި ކޯޗު ކާއްޓޭގެ އެންމެ ބޮޑު ކަންބޮޑުވުމަކީ ކުޅުންތެރިންގެ ފަރާތުން ފެނިގެންދިޔަ އާދައިގެ ގޯސްތަކެވެ. އެއީ ކިތަންމެ ގިނަ ދުވަހު ކުޅުމާ ދުރުގައި ތިބެފައި އައުމަށް ފަހު ވެސް ހަދައިގެން ނުވާނެ ފަދަ މިސްޓޭކްތަކެއްކަން ކާއްޓޭ ވަނީ ފާހަގަކޮށްފަ އެވެ.
"ރާއްޖެ ޓީމު މިރޭ (ރޭ) މި ކުޅުނު ވަރަށް ވުރެ މޮޅުކޮށް ކުޅޭނެ ކަމަށް ގަބޫލުކުރަނީ. ފުރަތަމަ މެޗު ކަމަށް ވެސް ވެފައި ގައުމުގައި ސަޕޯޓަރުން ކުރިމަތީގައި ކުޅުނީމަ ކުޅުންތެރިން މާ ބޮޑަށް މޮޅުވާން ބޭނުންވެ، އެ ޕްރެޝަރު އިން ކަމަށް ފާހަގަކުރެވެނީ. ވަރަށް ބައިވަރު އަމިއްލަ މިސްޓޭކްތަކެއް ފެނުނު. މި އަށް ވުރެ ރަނގަޅު ނަތީޖާއެއް ލަންކާ ޓީމު ކައިރިން ހޯދޭނެ،" ކާއްޓެ ބުންޏެވެ. "ފަސް ސެޓަށް ވެސް ދުއްވާލެވިދާނެ. ލަންކާ ޓީމު ޕްރެޝަރަށް ދުއްވާލެވޭ ވަރުގެ ކުޅުމެއް ދައްކަން ޖެހޭ،"
ކާއްޓޭ ބުނީ އަމާޒަކީ މިރޭ ކުޅޭ މެޗާއި އާދިއްތަ ދުވަހުގެރޭ ލަންކާއާ ދެކޮޅަށް ކުޅޭ މެޗުން ރަނގަޅު ކުރިއެރުންތަކެއް ހޯދައި މި މަހު 22-29 އަށް ކުޅޭ އޭވީސީ ސެންޓްރަލް ޒޯން މުބާރާތުގެ ކުރިން ޓީމު ރަނގަޅު ލެވަލަކަށް ގެނައުމަށް ކަމަށެވެ.
ކާއްޓޭގެ ކޯޗުކަމުގައި ރާއްޖޭން ވަނީ 2019 ވަނަ އަހަރު އޮގަސްޓް މަހު މާލޭގައި ލަންކާއާ ދެކޮޅަށް ތިން މެޗެއް ކުޅެފަ އެވެ. ފުރަތަމަ މެޗުން ލަންކާ ސީދާ ތިން ސެޓުން މޮޅުވިއިރު، ދެން ކުޅުނު ދެ މެޗުން ލަންކާ ފަހަތުން އަރައި މޮޅުވީ ރާއްޖޭން ފުރަތަމަ ސެޓު ގެންގޮސްފައި އޮއްވަ އެވެ.
ލަންކާގެ ކޯޗު ޗަންނަ ޖަޔަސޭކަރަ ބުނީ ސީނިއާ ހަތަރު ވަރަކަށް ކުޅުންތެރިންނާއި ޖޫނިއާ ގިނަ ކުޅުންތެރިންތަކެއް ގޮވައިގެން މި ފަހަރު ލަންކާ އިން މެޗުތަކަށް އައިސް ފުރަތަމަ މެޗުން މޮޅުވުމުން ބޭނުންވި ފުރަތަމަ ކަން ހާސިލްވީ ކަމަށެވެ. އަދި މެޗު ކުޅެން މާލެ އައިސް އެކަށީގެންވާ ވަގުތުގައި އަރާމެއް ނުކޮށް، އެއް ޕްރެކްޓިސް ކޮށްލައިގެން ރޭގެ މެޗަށް އައިސް ކުޅުންތެރިން ދެއްކި ހިތްވަރަށް ތައުރީފު ހައްގު ކަމަށް ޗަންނަ ވަނީ ބުނެފަ އެވެ.
ޒުވާނުންގެ މަރުކަޒު އެތެރެ ކޯޓުގައި ލަންކާއާ ދެކޮޅަށް ކުޅޭ ދެ ވަނަ މެޗު ފަށާނީ މިރޭ ރާއްޖެ ގަޑިން 9 ޖަހާއިރު އެވެ.
