ހުޅުމާލެ ދެވަނަ ފިޔަވަހީގައި ސަރުކާރުން ބިނާކުރި ވަގުތީ މިސްކިތް ހުޅުވައިފި އެވެ.
ޔެސް މޯލްޑިވްސް ޕްރައިވެޓް ލިމިޓެޑާއި ހަވާލުކޮށްގެން، އިމާރާތްކުރި މި މިސްކިތަށް ކިޔަނީ މަސްޖިދު އަބީ ބަކްރިއްސިއްދީގް އެވެ.
ގާތްގަނޑަކަށް 600 މީހުންނަށް އެއްފަހަރާ ނަމާދުކުރެވޭނެ އިންތިޒާމް ހަމަޖެހިފައިވާ މި މިސްކިތް ހުޅުވައިދެއްވާފައި ވަނީ އިސްލާމިކް މިނިސްޓަރު ޑރ. އަހްމަދު ޒާހިރު އަލީ އެވެ.
ދައުލަތުގެ ބަޖެޓުން 4.3 މިލިއަން ރުފިޔާ ހަރަދުކޮށް، ހެދި މި މިސްކިތް ހުޅުވުމަށް ބޭއްވި ރަސްމިއްޔާތުގައި މިނިސްޓަރު ވަނީ މިސްކިތްތައް ޒީނަތްތެރިކޮށް ބެލެހެއްޓުމުގައި ހާއްސަ އަހައްމިއްޔަތު ކަމެއް ދިނުމަށް އެދިވަޑައިގެންފަ އެވެ.
އަދި މިސްކިތްތައް އަޅަނީ ރައްޔިތުންނަށް ފަސޭހަކަމާއެކު ނަމާދުކުރެވޭނެ އިންތިޒާމް ހަމަޖެއްސުމަށް ކަމަށް ފާހަގަކޮށް، މިނިސްޓަރު ވަނީ ހުރިހާ ރައްޔިތުން ވެސް ގަވައިދުން ނަމާދު ގާއިމް ކުރުމަށް ނަސޭހަތްތެރިވެފަ އެވެ.
އިސްލާމިކް މިނިިސްޓްރީއިން ބުނީ މި މިސްކިތުގައި އަންހެނުންނަށް ވަކިން ވުލޫކޮށް، ނަމާދުކުރެވޭނެ އިންތިޒާމްތައް ހަމަޖައްސާފައި ވާނެ ކަމަށެވެ.
