ސްރީލަންކާ އަށް ފާޓިލައިޒާ އެކސްޕޯޓް ކުރަން ޗައިނާގެ ކުންފުންޏަކާ އެކު އެކުލަވާލި 49.7 މިލިއަން ޑޮލަރުގެ އެއްބަސްވުމެއްގެ މައްސަލައިގައި އެ ކުންފުނިން ސިންގަޕޫރުގެ އާބިޓްރޭޝަން ކޯޓަށް ހިނގައްޖެ އެވެ.
ޗައިނާގެ ޝަންޑޮންގްގައި ފާޓިލައިޒާ އުފައްދާ ސީވިން ބަޔޯޓެކް ކުންފުނީގެ ބޯޓެއް 20،000 ޓަނުގެ ފާޓިލައިޒާއާ އެކު ސްރީލަންކާ އަށް ދިޔުމަށް ފަހު މިހާރު ވަނީ އެނބުރި ސިންގަޕޫރަށް ގޮސްފަ އެވެ.
ޗައިނާގެ ގްލޯބަލް ޓައިމްސް ނޫހުން ރިޕޯޓު ކުރި ގޮތުގައި އެއްބަސްވުމުގެ މައްސަލަ ޖެހުނީ ނޮވެމްބަރު މަހުގެ ކުރީކޮޅު ފާޓިލައިޒާގެ ކޮލިޓީ ދަށް ކަމަށް ބުނެ، ސްރީލަންކާ އިން އެ ތަކެތި ބޭނުން ނުވުމުންނެވެ.
އެކަމުގެ މައްސަލަ ސިންގަޕޫރުގެ އާބިޓްރޭޝަން ކޯޓަށް ހުށަހަޅާފައި ވާއިރު، ސްރީލަންކާ ކޯޓުގައި އެ މައްސަލަ ވަކިން ކުރިއަށް ގެންދާނެ ކަމަށް އެ ނޫހުން ބުނެ އެވެ.
އެ ނޫހުން ބުނީ ފާޓިލައިޒާގެ ކޮލިޓީ ރަނގަޅުކަން ޔަގީންކޮށްދިނުމަށް ތިން ވަނަ ފަރާތެއްގެ ސެޓްފިކެޓު ހުށަހެޅުމުން ވެސް މަޝްވަރާ ކުރަން ސްރީލަންކާ އިން ބޭނުން ނުވި ކަމަށެވެ.
"ސިންގަޕޫރުގައި ކުރިއަށްދާ އާބިޓްރޭޝަން މައްސަލައާ ގުޅޭ ނޯޓިސް ސްރީލަންކާ އަށް ވާނީ ފޮނުވާފައި،" އެ ކުންފުނީގެ އޮފިޝަލަކު ގްލޯބަލް ޓައިމްސް ނޫހަށް ބުންޏެވެ.
ގްލޯބަލް ޓައިމްސް އަށް ފޯރުކޮށްދިން ބަޔާނެއްގައި ކުންފުނިން ތުހުމަތު ކުރީ ފާޓިލައިޒާ ސަޕްލައި ކުރުމުގެ ކޮންޓްރެކްޓް ހަވާލުކުރަށް ބީލަން ކުރިއަށް ގެންދިޔައީ ސިއްރުވެރި، ސުވާލު އުފެދޭ ގޮތަކަށް ކަމަށެވެ.
