މިއުނިކް (ޑިސެމްބަރު 8) - ޗެމްޕިއަންސް ލީގުގައި މިރޭ ބަޔާން މިއުނިކް ދަނޑުގައި އެ ޓީމު ބަލިކޮށް ބާސެލޯނާ އިން ތާރީހީ ކާމިޔާބަކަށް ޓާގެޓް ކުރާ ކަމަށް އެ ޓީމުގެ ކޯޗު ޒަވީ ހެނާންޑޭޒް ބުނެފި އެވެ.
ޗެމްޕިއަންސް ލީގުގެ މެޗަކުން ބަޔާން އެންމެ ފަހުން އަމިއްލަ ދަނޑުގައި ބަލިވީ 2013 ވަނަ އަހަރު އެވެ. މިރޭ ބަޔާން ދަނޑުގައި ބާސެލޯނާ އަށް ނަތީޖާއެއް ނުނެރެވިއްޖެނަމަ 20 އަހަރު ތެރޭ ފުރަތަމަ ފަހަރަށް ޗެމްޕިއަންސް ލީގުގެ ގްރޫޕް ސްޓޭޖުން އެ ޓީމު ކަޓާނެ އެވެ.
ޗެމްޕިއަންސް ލީގުގެ ގްރޫޕް އީގެ އެއް ވަނައިގައި ބަޔާން އޮތީ ސައްތަ އިން ސައްތަ ރެކޯޑަކާ އެކު ކުޅުނު ފަސް މެޗުން ވެސް މޮޅުވެ، 15 ޕޮއިންޓް ހޯދައިގެންނެވެ. ދެ ވަނައިގައި ބާސެލޯނާ އޮތީ ފަސް މެޗުން ހަތް ޕޮއިންޓާ އެކު އެވެ. ތިން ވަނައިގައި އޮތް ބެންފީކާ އަށް ފަސް މެޗުން ފަސް ޕޮއިންޓް ލިބިފައިވާއިރު، ފުލުގައި އޮތް ޑިނަމޯ ކިއޭވަށް ވަނީ ފަސް މެޗުން ޕޮއިންޓެއް ލިބިފަ އެވެ.
ބާސެލޯނާ މިރޭ ބަޔާން އަތުން މޮޅުވެއްޖެނަމަ ބެންފީކާ އާއި ޑިނަމޯ ކުޅޭ މެޗުގެ ނަތީޖާ އަށް ނުބަލައި އަނެއް ބުރުގެ ޖާގަ ލިބޭނެ އެވެ. ބަޔާން ދަނޑުގައި ބާސެލޯނާ އަށް މޮޅުނުވެވި ބެންފީކާ އިން އަމިއްލަ ދަނޑުގައި ޑިނަމޯ ބަލިކޮށްފިނަމަ ބާސެލޯނާ ގްރޫޕް ސްޓޭޖުން ކަޓާނެ އެވެ.
"ބާސެލޯނާ އަށް ކޮންމެ ޓީމެއް ވެސް ބަލިކުރެވިދާނެ. އަހަރެމެން (ބާސެލޯނާ) ބަޔާން ދަނޑުގައި މޮޅުވެއްޖިއްޔާ އެ ވާނީ ބަޔާން ދަނޑުގައި މި ކްލަބަށް ހޯދޭނެ ފުރަތަމަ މޮޅަށް. އެހެންވީމަ އަހަރެމެންނަށް މި އޮތީ ތާރީހީ ކާމިޔާބެއް ހޯދުމުގެ ފުރުސަތު،" މެޗުގެ ކުރިން އޮތް ނޫސްވެރިންގެ ބައްދަލުވުމުގައި ޒަވީ ބުންޏެވެ.
ބަޔާނުން ބާސެލޯނާއާ ދެކޮޅަށް އެންމެ ފަހުން ކުޅުނު ދެ މެޗުގައި ވެސް ވަނީ ރަނގަޅު މޮޅެއް ހޯދައިފަ އެވެ. އެ ގޮތުން މި ފަހަރުގެ ގްރޫޕް ސްޓޭޖުގައި ބާސެލޯނާ ދަނޑުގައި 3-0 އިން ބަޔާން މޮޅުވިއިރު، މިދިޔަ އަހަރު ކުއާޓާ ފައިނަލުގައި ވަނީ 8-2 އިން ބާސެލޯނާ ބަލިކޮށްފަ އެވެ.
ބާސެލޯނާގެ ޑިފެންޑަރު ޖެރާޑް ޕީކޭ ބުނީ ކުރިން ވެފައި ހުރި ކަމަކަށް ނުބަލައި ކުރިއަށް އޮތް މެޗަށް ފޯކަސް ކުރަން ބޭނުންވާ ކަމަށެވެ.
ބަޔާންގެ ކޯޗު ހޫލިއަން ނާގަލްސްމަން ބުނީ ގްރޫޕް ސްޓޭޖު ނިންމާލަން ބޭނުންވަނީ ފުރިހަމަ ރެކޯޑަކާ އެކު ކަމަށާއި އެކަން ކުރެވެން އޮތީ ބާސެލޯނާ ބަލިކޮށްގެން ކަމަށެވެ. އެހެންވެ، ބަޔާނުން ބާސެލޯނާ މެޗަށް ނުކުންނާނީ މި ވަގުތު ނެރެވެން އޮތް އެންމެ ވަރުގަދަ ފުރަތަމަ އެގާރައެއް ނަގައިގެން ކަމަށް ނާގަލްސްމަން ވަނީ ބުނެފަ އެވެ.
ކޮވިޑް ޕޮޒިޓިވް ކޭސްތަކާއި އަނިޔާގެ މައްސަަލަތަކާ ހުރެ، ބަޔާންގެ މުހިއްމު ކުޅުންތެރިންތަކަކަށް މިރޭގެ މެޗުގައި ބާސެލޯނާއާ ދެކޮޅަށް ނުކުޅެވޭނެ އެވެ. އޭގެ ތެރޭގައި ބަޔާންގެ މުހިއްމު ކުޅުންތެރިން ކަމަށްވާ ޔޯސުއާ ކިމިކް، ލެއޯން ގޮރެޓްޒްކާ އަދި ސާޖް ގްނަބްރީ ވެސް ހިމެނެ އެވެ.
ބަޔާން އާއި ބާސެލޯނާ ކުޅޭ މެޗު ފަށާނީ މިރޭ ރާއްޖެ ގަޑިން 1 ޖަހާއިރު އެވެ.
