އަހަރުން އަހަރަށް ފުޅާވަމުން އަންނަ މެރިން އެކްސްޕޯގައި މި ފަހަރު އަލަށް މެރިން ފުޑްގެ ބައި ގެނެސްދޭއިރު، އެ ބައި ވަރަށް ތަފާތުވާނެ ކަމަށް އެކްސްޕޯ އިންތިޒާމުކުރާ ކުންފުނިން ބުނެފި އެވެ.
އެކްސްޕޯގެ އޮގަނައިޒަ، މީޑިއަމް ޕްރައިވެޓްގެ މެނޭޖިން ޑިރެކްޓަރު ޝާމް މުހައްމަދު ވިދާޅުވި ގޮތުގައި މެރިން ފުޑްގެ ބައި ކުރިއަށް ގެންދަނީ ރެސްޓޯރެންޓް އެސޯސިއޭޝަން އާއި ޝެފް ގިލްޑްއާ ގުޅިގެންނެވެ.
"ހަމައެކަނި އޮންނާނީ ފުޑްގެ ބާވަތްތައް ދައްކާލުމެއް ނޫން،"އޭނާ ވިދާޅުވި އެވެ.
މަސްމަހާމެހި އަދި ކަނޑުގެ އެހެން ބާވަތްތަކުން ކާތަކެތި ތައްޔާރުކުރުމާއި އެތަކެތި ދައްކާލުމާއި ރަހަ ދެއްކުމުގެ އިތުރުން ކާބޯތަކެތީގެ ރައްކާތެރިކަމާ ގުޅޭ މައުލޫމާތު ވެސް ދޭނެ އެވެ.
ރޯމަހުގެ ބާވަތްތަކުން ފެށިގެން، ހިކި މަސް، އަދި ދަޅުމަސް ބޭނުން ކޮށްގެން ކާތަކެތި ތައްޔާރުކުރާނޭ ގޮތް ކިޔައިދޭނެ އެވެ.
"އަޅުގަނޑުމެން މިފަހަރު މި ދައްކާލަނީ ޕްރޮފެޝަނަލް ޝެފުން، ކަނޑުމަހުގެ ބާވަތްތަކާއި މެރިން ފުޑްގެ އެހެން ބާވަތްތަކުން ތަކެތި ތައްޔާރުކުރާ ގޮތްތައް. އޭރުން ވަރަށް ގިނަ ބަޔަކަށް ދަސްވެގެންދާނެ،" ޝާމް ވިދާޅުވި އެވެ.
ރާއްޖޭގެ ބޯޓިން ސިނާއަތަށް ހާއްސަ ކޮށްގެން ބާއްވާ ހަމައެކަނި އިވެންޓް، މެރިން އެކްސްޕޯ ކުރިއަށް ދާނީ މި މަހުގެ 11 އިން 13 ގެ ނިޔަލަށް ހުޅުމާލޭ ސެންޓްރަލް ޕާކްގަ އެވެ. މިފަހަރު 50 އަށް ވުރެ ފަރާތްތަކުން އެކްސްޕޯގައި ބައިވެރިވެ އެވެ.
މި ފަހަރުގެ އެކްސްޕޯގެ މެއިން ސްޕޮންސަރަކީ އެމްޓީސީސީ އެވެ.
އެކްސްޕޯގައި ބޯޓް ބިލްޑަރުންނާއި ފިނޭންސް އަދި އިންޝުއަރެންސް ވިޔަފާރިތަކާއި، ބޯޓުތަކަށާއި މަސްވެރިކަމަށް ބޭނުންވާ ސާމާނާއި މެރިން ފުޑްސް ސަޕްލަޔަރުންނާއި ލޮޖިސްޓިކްސް، މެރިން ޓެކްނޮލޮޖީ، ފަޔާ ސޭފްޓީގެ ހިދުމަތްދޭ ވިޔަފާރިތަކާއި ދާއިރާއާ ގުޅޭ ސަރުކާރުގެ އިދާރާތަކާއި އަމިއްލަ ޖަމިއްޔާތައް އަދި އެހެނިހެން ގުޅުންހުރި ވިޔަފާރިތައް ބައިވެރިވެ އެވެ.
