އެފްއޭއެމް ޔޫތު ޗެމްޕިއަންޝިޕް ފުޓްބޯޅަ މުބާރާތުގައި ބައިވެރިވުމުގެ މުއްދަތު ހަމަވިއިރު، ފުރަތަމަ ޑިވިޝަންގެ އަށް ޓީމުގެ އިތުރުން މުބާރާތުގައި ބައިވެރިވީ ދެ ވަނަ ޑިވިޝަނުގައި ވާދަކުރާ މަހިބަދޫ ސްޕޯޓްސް ކްލަބް ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ބުނެފި އެވެ.
މިއާ އެކު ޔޫތު ޗެމްޕިއަންޝިޕްގައި ވާދަކުރާނީ މަހިބަދޫގެ އިތުރުން އީގަލްސް، މާޒިޔާ، ވެލެންސިއާ، ގްރީން ސްޓްރީޓްސް، ޓީސީ، ޔުނައިޓެޑް ވިކްޓްރީ (ޔޫވީ)، ސުޕަ ޔުނައިޓެޑް ސްޕޯޓްސް (ސަސް) އަދި ދަ ގްރާންޑޭ ސްޕޯޓްސް ކްލަބް އެވެ.
ޔޫތު ޗެމްޕިއަންޝިޕްގައި ބައިވެރިވުމުގެ ފުރުސަތު އަތޮޅު ތެެރެއިން ދެ ޓީމަކަށް ދޭން އެފްއޭއެމުން ނިންމި އެވެ. އެކަމަކު، މުއްދަތު ހަމަވިއިރު ބައިވެރިވީ މަހިބަދޫ އެކަންޏެވެ. މުބާރާތުގައި ބައިވެރިވާން ޝައުގުވެރިވާތީ ކ.ގުރައިދޫ އާއި ބ. އޭދަފުށިން ވެސް މަޝްވަރާތަކެއް ކުރި އެވެ. އެކަމަކު، ބަޖެޓްގެ ދަތިތަކާއި އެހެނިހެން ސަބަބުތަކާ ހުރެ އެންމެ ފަހުން ގުރައިދޫ އާއި އެދަފުށްޓައް ބައިވެރިނުވެ އެވެ.
މި ފަހަރުގެ މުބާރާތުގެ ފޯމެޓް ރޭވިފައިވާ ގޮތުން ނުވަ ޓީމު ދެ ގްރޫޕަކަށް ބަހައިލާނެ އެވެ. ގްރޫޕް އެކެއްގައި ފަސް ޓީމު ކުޅޭއިރު، ގްރޫޕް ދޭއްގައި ހަތަރު ޓީމެއް ވާދަކުރާނެ އެވެ. ގްރޫޕް ސްޓޭޖުގެ މެޗުތައް އޮތީ އަންނަ މަހު 24 އިން ފެބްރުއަރީ މަހު ފަސް ވަނަ ދުވަހާ ހަމައަށެވެ. ދެ ގްރޫޕުން ހަތަރު ޓީމެއް ސެމީ ފައިނަލަށް ހޮވޭއިރު، ސެމީގެ މެޗުތައް ކުޅޭނީ ފެބްރުއަރީ އަށް ވަނަ ދުވަހު އެވެ. ފައިނަލް މެޗު އޮންނާނީ ފެބްރުއަރީ 13 ވަނަ ދުވަހު އެވެ.
މި ފަަހަރުގެ ޔޫތު ޗެމްޕިއަންޝިޕްގައި ބައިވެރިވެވޭނީ 2003، 2004 އަދި 2005 ގައި އުފަންވެފައިވާ ކުދިންނަށް ކަމަށް އެފްއޭއެމުން ވަނީ ކަނޑައަޅައިފަ އެވެ.
އެފްއޭއެމުން އެންމެ ފުރަތަމަ ޔޫތު ޗެމްޕިއަންޝިޕެއް ބޭއްވީ 2011 ވަނަ އަހަރު އެވެ. އޭރުން ފެށިގެން މުބާރާތް ބާއްވަމުން އައީ 21 އަހަރުން ދަށުގެ މުބާރާތެއްގެ ގޮތުގަ އެވެ. އޭރު ފެށި އެ މުބާރާތް މެދުކެނޑުނީ 2014 ވަނަ އަހަރު ބޭއްވުމަށް ފަހު އެވެ. އަލުން 2016 ވަނަ އަހަރު ފަށައި، 2018 ވަނަ އަހަރު މުބާރާތް ކުރިއަށްގެންދާ އުސޫލަށް ބަދަލެއް ގެނަ އެވެ. އެއީ އެއް އަހަރު 19 އަހަރުން ދަށަށް ބޭއްވުމަށް ފަހު ޖެހިގެން އަންނަ ފަހަރަކު 21 އަހަރުން ދަށަށް ބާއްވައި ކުޅުންތެރިން ޑިވެލޮޕްވެވޭ މުބާރާތަކަށް ޔޫތު ޗެމްޕިއަންޝިޕް ހެދުމަށެވެ.
އެންމެ ފަހުން 2019 ވަނަ އަަހަރު ޔޫތު ޗެމްޕިއަންޝިޕް ބޭއްވިއިރު، ޗެމްޕިއަނަކީ މުބާރާތުގެ އެންމެ ކާމިޔާބު ޓީމު އީގަލްސް އެވެ. މިހާތަނަށް 19 އަހަރުން ދަށަށް ހާއްސަކޮށްގެން ޔޫތު ޗެމްޕިއަންޝިޕް ބޭއްވީ އެންމެ ފަހަރަކު އެވެ. އެއީ 2018 ވަަނަ އަހަރު އެވެ. އެ ފަހަރު މުބާރާތުގެ ތަށި އުފުލާލީ ގްރީން ސްޓްރީޓްސް އިންނެވެ.
ގިނަ ކްލަބްތަކަކުން އަންނަނީ ޔޫތު ޗެމްޕިއަންޝިޕަށް ކުޅުންތެރިން ހޯދުމުގެ މަަސައްކަތް ކުރަމުންނެވެ. އެ ގޮތުން ބައެއް ކްލަބްތަކުން މާލޭގައި އޯޕަން ޓްރަޔަލްތަކެއް ބާއްވައިގެން ކުޅުންތެރިން ނަގަ އެވެ. އަނެއްކޮޅުން ބައެއް ކްލަބްތަކުން ރަށްރަށުން ރަނގަޅު ކުޅުންތެރިން ހޯދުމުގެ މަސައްކަތް އަންނަނީ ކުރަމުންނެވެ.
