ފަލަސްތީނަށް 100 މިލިއަން ޑޮލަރުގެ އެހީ ދިނުމަށް އަލްޖީރިއާ އިން ނިންމައިފި އެވެ.
އެގޮތަށް ނިންމީ ފަލަސްތީނުގެ ރައީސް މަހްމޫދު އައްބާސް އަލްޖީރިއާ އަށް ހޯމަ ދުވަހު ކުރެއްވި ދަތުރުގެ ތެރެއިން އެ ގައުމުގެ ރައީސް އަބްދެލްމަޖްދީދް ތެބޫނޭ އެވެ.
ދެ ލީޑަރުން ގުޅިގެން ބޭއްވި ޕްރެސް ކޮންފެރެންސެއްގައި ތެބޫނޭ ވިދާޅުވީ ފައިސާ ފޯރުކޮށްދޭން ނިންމީ އަލްޖީރިއާ އާއި އެ ގައުމުގެ ރައްޔިތުން ފަލަސްތީނަށް ކުރާ ތާއީދު ދެއްކުމަށް ކަމަށެވެ.
ދެހާސް ބާވީސް ވަނަ އަހަރުގެ މާޗް މަހު އޮންނަ އަރަބި ލީގް ސަމިޓު ކުރިއަށް ދާނީ އަލްޖީރިއާގަ އެވެ. އެއީ މޮރޮކޯ އިން އިޒްރޭލާ އެކު ގުޅުން ގާއިމްކުރި ފަހުން ބާއްވާ ފުރަތަމަ އަރަބި ލީގް ސަމިޓެވެ.
ތެބޫނޭ ވިދާޅުވީ އަރަބި ލީގު ސަމިޓުގެ އެންމެ މުހިއްމު މައްސަލައެއްގެ ގޮތުގައި ފަލަސްތީނުގެ ހާލަތު އަލްޖީރިއާ އިން ހުށަހަޅާނެ ކަމަށެވެ.
އަލްޖީރިއާގެ ނޫސްތަކުން ރިޕޯޓުކުރާ ގޮތުގައި ފަލަސްތީނުގެ ރައީސް މަހްމޫދު އައްބާސްގެ އިތުރުން ފަލަސްތީނުގެ އެހެން ފެކްޝަންތަކުގެ އޮފިޝަލުންނާ ވެސް ތެބޫނޭ ބައްދަލުކުރައްވާނެ އެވެ.
ފަލަސްތީނުގެ ރައީސް އުތުރު އެފްރިކާގެ ދަތުރެއްގައި އަލްޖީރިއާ އަށް ވަޑައިގެންފައި ވާއިރު، ޓިއުނީޝިއާ އަށް ވަޑައިގެންނެވުމަށް ވެސް ވަނީ ހަމަޖެހިފަ އެވެ.
މީގެ ދެ ހަފުތާ ކުރިން އިޒްރޭލުގެ ޑިފެންސް މިނިސްޓަރު ބެނީ ގާންޓްޒް ވަނީ މޮރޮކޯ އަށް ވަޑައިގެން އެ ގައުމާ އެކު ދިފާއާ ގުޅޭ އެއްބަސްވުމެއްގައި ސޮއިކޮށްފަ އެވެ.
އެ އެއްބަސްވުމާ މެދު އަލްޖީރިއާ އިން ހިތްހަމައެއް ނުޖެހެ އެވެ. އަލްޖީރިއާ އިން ދެކޭ ގޮތުގައި އިޒްރޭލާއި މޮރޮކޯ އިން އެފަދަ އެއްބަސްވުމަކަށް ދިޔުމަކީ އެ ގައުމުގެ ސަލާމަތަށް އޮތް ނުރައްކަލެކެވެ.
އަލްޖީރިއާ އިން މިދިޔަ އޯގަސްޓު މަހު މޮރޮކޯއާ ގުޅުން ކަނޑާލުމަށް ފަހު ތުހުމަތު ކުރީ އެ ގައުމުން "ހަމަނުޖެހުމަށް މަގުފަހިވާ އަމަލު" ހިންގާ ކަމަށެވެ.
