ޒޫމް ކޯލެއްގެ ތެރެއިން އެއް ފަހަރާ 900 މުވައްޒަފުން ވަޒީފާއިން ވަކިކުރި އެމެރިކާ ކުންފުނީގެ ވެރިޔަކަށް ވަރަށް ބޮޑަށް ފާޑުކިޔުން އަމާޒުވެއްޖެ އެވެ.
"މި ކޯލުގައި ބައިވެރިވުމުގެ ދައުވަތު ލިބުނު ނަމަ، ތިއީ ވަޒީފާ އިން ވަކިކުރަން ނިންމާފައިވާ ބަދުނަސީބު ގްރޫޕުގެ މެމްބަރެއް،" މޯގޭޖް ކުންފުނި ބެޓާ ޑޮޓް ކޮމްގެ ޗީފް އެގްޒެކްޓިވް ވިޝާލް ގަރްގް އެހެން ބުނާ ކޯލުގެ ރިކޯޑިން ސޯޝަލް މީޑިއާގައި މިހާރު ދަނީ ދައުރުވަމުންނެވެ.
ސޯޝަލް މީޑިއާގައި އެ ވީޑިއޯ އަށް ކޮމެންޓު ކުރި ފަރާތްތަކުން ވަނީ އެކަމަށް ފާޑުކިޔާފަ އެވެ. އެގޮތުން މިއީ ކްރިސްމަސްއާ ދިމާކޮށް އެހެން މީހުންގެ އިހުސާސްތަކަށް ބަލައިލުމެއް ނެތި ކުރި ކަމެއް ކަމަށް ގިނަ ބަޔަކު ދަނީ ބުނަމުންނެވެ.
ގަރްގް ބުނެފައި ވަނީ އެހާ ގިނަ އަދަދެއްގެ މުވައްޒަފުން އެއް ފަހަރާ ވަފީޒާ އިން ވަކިކުރަން ޖެހުނީ މުވައްޒަފުންގެ ޕަފޯމަންސް ދަށްވެ، އުފެއްދުންތެރިކަން މަޑުޖެހި، މާކެޓަށް އައި ބަދަލުގެ ސަބަބުން ކަމަށެވެ. ވަފީޒާ އިން ވަކިކުރީ ކުންފުނީގެ މުވައްޒަފުންގެ 15 ޕަސެންޓެވެ.
ކުންފުނީގެ ހާލަތު ގޯސްކަމަށް ގަރްގް ބުނި ނަމަވެސް ބީބީސީ އިން ރިޕޯޓުކުރި ގޮތުގައި މިދިޔަ ހަފުތާގައި އިންވެސްޓަރުންގެ ފަރާތުން ލިބުނު 750 މިލިއަން ޑޮލަރުގެ ވާހަކަ އޭނާ މުވައްޒަފުންނާ ހިއްސާކޮށްފައެއް ނުވެ އެވެ.
ފޯޗޫން މެގެޒިން އިން ހަބަރު ފެތުރި ގޮތުގައި ވަޒީފާ އިން ވަކިކުރި މުވައްޒަފުންގެ އުފެއްދުންތެރިކަން ދަށްވެ، ދުވާލަކު އެންމެ ދެ ގަޑިއިރު މަސައްކަތް ކުރުމަކީ ކަސްޓަމަރުންގެ އަތުން ވައްކަން ކުރުން ކަމަށް ބުނެ ނަން ނުޖަހާ ލިޔެފައިވާ ބްލޮގް ޕޯސްޓެއްގެ ފަހަތުގައި ވަނީ ގަރްގް އެވެ.
ބެޓާ ޑޮޓް ކޮމް އަކީ ގެދޮރު ގަތުމުގެ ޕްރޮސެސް އަވަސްކޮށް "އެފިޝެންޓް ކުރުމަށް" ޓެކްނޮލޮޖީގެ އެހީ ބޭނުން ކުރާ ކުންފުންޏެކެވެ. ޖަޕާނުގެ ސޮފްޓްބޭންކްގެ އެހީއާ އެކު ކުރިއަށްދާ އެ ކުންފުނީގެ އަގަކީ ގާތްގަނޑަކަށް ހަ ބިލިއަން ޑޮލަރެވެ.
މީގެ ކުރިން ވެސް ގަރްގް މުވައްޒަފުންނާ މެދު އަމަލު ކުރާ ގޮތަށް ފާޑުކިޔުން އަމާޒުވި އެވެ. އެގޮތުން ފޯބްސް މެގެޒިން އިން މިދިޔަ އަހަރު އާއްމުކުރި އީމެއިލެއްގައި މުވައްޒަފުންގެ މަސައްކަތް ލަސްކަމަށް ބުނެ، އިހްތިރާމް ކުޑަކޮށް ވާހަކަދައްކާފައި ވެ އެވެ.
