އެމެރިކާގެ ކުރީގެ ރައީސް ޑޮނަލްޑް ޓްރަމްޕް އުފެއްދެވި އާ ސޯޝަލް މީޑިއާ ކުންފުންޏަށް އިންވެސްޓަރުންގެ ފަރާތުން އެއް ބިލިއަން ޑޮލަރު ލިބިއްޖެ އެވެ.
ޓްރަމްޕް މީޑިއާ އެންޑް ޓެކްނޮލޮޖީ ގްރޫޕުން މަސައްކަތް ކުރަމުން ދަނީ އަންނަ އަހަރުގެ ކުރީކޮޅި "ޓްރުތް ސޯޝަލް" ގެ ނަމުގައި މުޅިން އާ ސޯޝަލް މީޑިއާ އެޕެއް ލޯންޗު ކުރުމަށެވެ.
މިދިޔަ ޖެނުއަރީ މަހު ޓްރަމްޕްގެ ސަޕޯޓަރުން އެމެރިކާގެ ކެޕިޓަލް އިމާރާތަށް ވަދެގަނެ ހިންގި ހަމަނުޖެހުމަށް ފަހު ޓްރަމްޕް އަދިވެސް ހުންނެވީ ޓްވިޓާ އާއި ފޭސްބުކް އިން ސަސްޕެންޑުކޮށްފަ އެވެ.
"މި އެއް ބިލިއަން ޑޮލަރު ބޮޑެތި ޓެކް ކުންފުނިތަކަށް ފޮނުވައިދޭ މެސެޖަކީ ސެންސަރު ކުރުމާއި ސިޔާސީ ގޮތުން ތަފާތު ކުރުން ނިމުމަކަށް އަންނަން ވެއްޖެކަން،" ޓްރަމްޕް ވިދާޅުވި އެވެ.
"އަޅުގަނޑުމެންގެ ބެލެންސް ޝީޓު ފުޅާވަމުން ދާ ވަރަކަށް، ޓްރަމްޕް މީޑިއާ އެންޑް ޓެކްނޮލޮޖީ ގްރޫޕަށް ލިބޭނީ ބޮޑެތި ޓެކް ކުންފުނިތަކާ ދެކޮޅަށް ހަނގުރާމަ ކުރަން ވަރުގަދަ ޕޮޒިޝަނެއް."
"ޓްރުތް ސޯޝަލް" އުފައްދަން އުޅޭކަން ޓްރަމްޕް އިއުލާނު ކުރެއްވީ މި އަހަރުގެ ކުރީކޮޅު އެވެ. އެގޮތުން "ސިޔާސީ ފިކުރުގެ މައްޗަށް ބިނާކޮށް ތަފާތު ކުރުމެއް ނެތި" ހިޔާލު ފާޅުކުރަން އެ ޕްލެޓްފޯމުގައި ފުރުސަތު ލިބޭނެ ކަމަށް ވިދާޅުވި އެވެ.
މިދިޔަ އަހަރުގެ ރިޔާސީ އިންތިހާބުގައި ދެ ވަނަ ދައުރަކަށް ރައީސް ކަމަށް ކުރިމަތިލައިގެން ނާކާމިޔާބީއާ ކުރިމަތިވެވަޑައިގެންނެވި ޓްރަމްޕް ވަނީ 2024 ގައި ވެސް ރައީސް ކަމަށް ވާދަކުރައްވާނެކަމުގެ އިޝާރާތެއް ދެއްވައިފަ އެވެ.
