އެމްއެމްޕީއާރުސީގެ ބޮޑު ހިޔާނާތާއި ގުޅިގެން ކްރިމިނަލް ކޯޓުން ކުރީގެ ރައީސް އަބްދުﷲ ޔާމީން އަށް އިއްވި ހުކުމް ސުޕްރިމް ކޯޓުން ބާތިލް ކުރުމާއި ހަމަ އަށް، ޖަލުގައި ހޭދަކުރަން ޖެހުނު ދޮޅު އަހަރުގައި ދިރާސާ ކުރުމުގެ ފުރުސަތު ނުދިނުމުން އެކަމާއި ހިންހަމަ ނުޖެހުން ފާޅުކޮށްފި އެވެ.
ޔާމީން މިނިވަންވުމާއި އެކު، މަރުހަބާ ކިޔުމަށްޓަކައި، އިދިކޮޅު ކޯލިޝަނުން ރޭ ބޭއްވި "މަރުހަބާ ރައީސް ޔާމީން" ޖަލްސާގައި ވާހަކަދައްކަވަމުން އެމަނިކުފާނު ވަނީ ޖަލުތަކާއި ގުޅޭ ކަންބޮޑުވުންތައް ފާޅުކޮށް، ގައިދީންނަށް ދިރާސާ ކުރުމުގެ ފުރުސަތު ދިނުމަށް ގޮވާލައިފަ އެވެ.
ޔާމީން ވިދާޅުވީ އެންމެ ތަހުޒީބީ ގައުމުތަކުގައި ވެސް ދިރާސާ ކުރުމުގެ ފުރުސަތު ލިބޭ ކަމަށާއި މަރުގެ ހުކުމް ތަންފީޒު ކުރަމުންދާ މީހުން ވެސް އެ ހައްގުން މަހުރޫމް ނުކުރާ ކަމަށެވެ.
އެގޮތުން ޖަލު ތަކުގައި ބަންދުގައި ތިބޭ މީހުންނަށް، ކުރެވޭ ތުހުމަތުތަކުން ބަރީއަވެ، ދިފާއުވުމަށްޓަކައި، އިންޓަނެޓް ބޭނުންކޮށް ދިރާސާ ކުރުމުގެ ފުރުސަތު ދޭން ޖެހޭ ކަމަށް އެމަނިކުފާނު ވިދާޅުވި އެވެ.
"ކީއްވެތޯ އަޅުގަނޑަށް އިންޓަނެޓަށް ވަދެ، އަޅުގަނޑުގެ މައްސަލައާ ގުޅުންހުރި މައްސަލަތައް ކަމަށް ހީވާ މައްސަލަތައް ރީސާޗުކުރުމުގެ ފުރުސަތު އަޅުގަނޑަށް ނުލިބޭންވީ؟" ޔާމީން ވިދާޅުވި އެވެ.
އޭރުން އެ މައްސަލައެއްގެ ވަށައިގެންވާ ކަންކަމާއި ގުޅޭ މައުލޫމާތުތައް ހޯދައި، އިތުރަށް ތައްޔާރުވުމުގެ ފުރުސަތު ދައުވާ ރައްދުވާ ފަރާތަށް ލިބިގެންދާނެ ކަމަށް ޔާމީން ގަބޫލުކުރައްވަ އެވެ.
އެމަނިކުފާނު ދެކެވަޑައިގަންނަވާ ގޮތުގައި ކުށަކަށް މީހަކު ކޯޓަށް ހާޒިރުކޮށްފިނަމަ، އެ ތުހުމަތުން އެމީހެއް ދިފާއުކޮށް، ވާހަކަދައްކާނީ އޭނާގެ ވަކީލުން ކަމަށް އެކަނި ކަމަށް ގަބޫލުކޮށްގެން ނުވާނެ އެވެ. އޭގެ ބަދަލުގައި އަމިއްލަ ނަފްސު ދިފާއުކޮށް، އޭނާ އަކީ ކުއްވެރިއެއް ނޫންކަން ސަބަބުތަކާއި އެކު ކޯޓުގައި ބުނަން ކެރެންވާނެ ކަމަށް ޔާމީން ވިދާޅުވި އެވެ. އަދި އެފަދަ އިން ބުނެވޭނީ ދިރާސާ ކުރުމުގެ ފުރުސަތު ގައިދީންނަށް ލިބިގެންކަން ފާހަގަކުރި އެވެ.
"އަޅުގަނޑުގެ ލޯޔަރުންގެ ޓީމަށް ބަރޯސާވަން. އިތުބާރުކުރަން. އެހެން ނަމަވެސް އަޅުގަނޑު ވެސް ބޭނުންވާނެ ދެއްތޯ، ހަގީގަތުގައި އަޅުގަނޑުގެ ނަފްސު ދެއްތޯ މިއުޅެނީ ކަތިލެވިގެން. އެހެންވީމަ އަޅުގަނޑު ބޭނުންވާނެ ރީސާޗުކޮށްގެން މިކަންކަމުގަ އަޅުގަނޑު ވެސް އަޅުގަނޑަށް ލިބޭ އިލްމެއްގެ އަލީގައި ރީސާޗުކޮށްގެން ވަކާލާތުކުރަން،" ޔާމީން ވިދާޅުވި އެވެ.
މި ކަންބޮޑުވުންތައް ފާޅުކުރުމަށްފަހު ޔާމީން ވިދާޅުވީ ޖަލު ބަންދުގައި ހުންނެވިއިރު ކުކުޅު ބިރިޔާނީ ކާން ލިބޭ ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވި ނަމަވެސް ގައިދީންނަށް މުހިންމީ އެފަދަ ކެއުންތައް ނޫން ކަމަށެވެ.
"ކާކުތޯ ކުކުޅު ބިރިޔާނީ ކާން ބޭނުންވަނީ؟ މިއީތޯ ޖަލު ބަންދުގައި ހުންނަ މީހާ ބޭނުންވާ އެއްޗަކީ؟ އަޅުގަނޑު މިއުޅެނީ ކުކުޅު ބިރިޔާނީ ކާން ނުލިބިގެންނެއް ނޫނޭ. ވަރަށް ހަމަޖެހިގެންނޭ، ވަރަށް ރަނގަޅު އެއްޗެހި ކައިގެންނޭ ހުންނަނީ، މާތް ކަލާކޯއޭ އެ ކާކަށް ނޫނޭ، އަޅުގަނޑުމެން ކާން ނުލިބިގެންނެއް ނޫނޭ ޖަލަށް ދިޔައީ، އަނެއްކާ އަޅުގަނޑަށް އިންޑިއާގެ ފަރާތުން ރިޒްގު ނުލިބިދާނެތީކީ ވެސް ނޫނޭ ޖަލަށް ލައިގެން މިއުޅެނީކީ،" ޔާމީން ވިދާޅުވި އެވެ.
ދަށު ކޯޓުން ކުރި ހުކުމުގައި ރައީސް ޔާމީން ދެ އަހަރާއި ދެ ދުވަސް ހޭދަކުރެއްވިއިރު، އެމަނިކުފާނަކީ އެންމެ ގިނަ ދުވަހު ޖަލުގައި ހުރި ސިޔާސީ ލީޑަރެވެ.
