އިރާނާއި ބާރުގަދަ ގައުމުތަކާ ދެމެދު ފަށާފައިވާ ނިޔުކްލިއާ މަޝްވަރާތައް "ވަގުތުން ހުއްޓާލަން" އިޒްރޭލުގެ ބޮޑު ވަޒީރު ނަފްތާލީ ބެނެޓް އެމެރިކާ އަށް ގޮވާލައްވައިފި އެވެ.
އެމެރިކާގެ ސެކެޓްރީ އޮފް ސްޓޭޓް އެންޓޮނީ ބްލިންކެން އަށް ފޯނުން ގުޅުއްވައި، ބެނެޓް ވިދާޅުވީ ނިޔުކްލިއާ ޑީލް އިއާދަކުރުމުގެ ބަދަލުގައި އިރާނާ ދެކޮޅަށް އަޅަންވީ "ކޮންކްރީޓް ފިޔަވަޅު" ކަމަށެވެ.
ބެނެޓް ވިދާޅުވީ މަޝްވަރާގެ ޓެކްޓިކްއެއްގެ ގޮތުގައި "އިރާނުން ދަނީ ނިޔުކްލިއާ ބްލެކްމެއިލް" ކުރަމުން ކަމަށާއި ރައްދުގައި ވަގުތުން މަޝްވަރާތައް ހުއްޓާލަން ޖެހޭނެ ކަމަށެވެ.
ބެނެޓްގެ އޮފީހުން ނެރުނު ބަޔާނެއްގައި ބުނީ ފަސް މަހުގެ މެދުކެނޑުމަކަށް ފަހު ހޯމަ ދުވަހު އަލުން ފެށި މަޝްވަރާގައި ކުރިއަށް ދިޔަ ކަންކަމުގެ ތަފްސީލް ބްލިންކެން ކިޔައިދެއްވި ކަމަށެވެ.
މަޝްވަރާތައް ފެށި ފަހުން އދ. ގެ ނިޔުކްލިއާ ހަކަތައާ ބެހޭ އެޖެންސީން ނެރުނު ރިޕޯޓަކާ ގުޅޭ ގޮތުން ބެނެޓް ކަންބޮޑުވުން ފާޅުކުރެއްވި ކަމަށް ބަޔާނުގައި ވެ އެވެ.
"އިރާނުން ބިމުއަޑީގައި ހިންނާ ފޯޑޯ ފެސިލިޓީގައި އެޑްވާންސްޑް ސެންޓްރިފިއުޖްގެ އެހީގައި 20 ޕަސެންޓަށް ޔުރޭނިއަމް މުއްސަނދި ކުރަން ފަށާފައިވާކަން" އެ ރިޕޯޓުން ހާމަވާ ކަމަށް ބެނެޓް ވިދާޅުވި އެވެ.
އިރާނުން ޔުރޭނިއަމް މުއްސަނދި ކުރަން ފެށީ އެމެރިކާ އިން 2018 ވަނަ އަހަރު ނިޔުކްލިއާ އެއްބަސްވުމަކަށް އަމަލު ނުކުރާނެ ކަމަށް ބުނިތާ އަހަރެއް ފަހުންނެވެ.
ހުޅަނގުގެ ގައުމުތަކުން ތުހުމަތު ކުރާ ގޮތުގައި ޔުރޭނިއަމް މުއްސަނދި ކުރަނީ ނިޔުކްލިއާ ހަތިޔާރު އުފެއްދުމަށެވެ. ނަމަވެސް އިރާނުން ބުނާ ގޮތުގައި އެއީ ހަކަތަ އުފެއްދުމަށް ކުރާ މަސައްކަތެކެވެ.
އިރާނުން ދެކޭ ގޮތުގައި ނިޔުކްލިއާ އެއްބަސްވުމުގައިވާ ފަދައިން ޔުރޭނިއަމް މުއްސަނދި ކުރުމާ ގުޅޭ ހަރަކާތްތައް މަޑުޖައްސާލެވޭނީ 2018 ވަނަ އަހަރުގެ ފަހުން އެ ގައުމާ ދެކޮޅަށް އެމެރިކާ އިން އަޅާފައިވާ ހުރިހާ ދަތިކުރުމުގެ ފިޔަވަޅުތަކެއް އުވާލުމުންނެވެ.
ނިޔުކްލިއާ މަޝްވަރާތަކުގައި އިރާނާ އެކު ބައިވެރިވަނީ އިނގިރޭސިވިލާތް، ޗައިނާ، ފްރާންސް، ޖަރުމަނުވިލާތް އަދި ރަޝިއާ އެވެ. އެމެރިކާ އިން ވެސް ދަނީ ނުސީދާކޮށް މަޝްވަރާތަކުގައި ބައިވެރިވަމުންނެވެ.
