ކޮވިޑު ބަލިމަޑުކަމާ ގުޅިގެން ފުލުހުންގެ ހިދުމަތުން ކުރި ހަރަދުތަކުގެ ތެރެއިން ބޮޑު ބައެއް ހޭދަވީ ކުރީ ސަފުގައި ހަރަކާތްތެރިވި ފުލުހުންނަށް ފްރަންޓްލައިން އެލަވަންސް ދިނުމަށް ކަމަށް އެ ހަރަދުތަކުގެ އޮޑިޓް ރިޕޯޓުން ދައްކައިފި އެވެ.
ކޮވިޑާ ގުޅިގެން މިދިޔަ އަހަރު ފުލުހުން ކުރި ހަރަދުތައް އޮޑިޓު ކުރުމަށްފަހު އޮޑިޓާ ޖެނެރަލް އޮފީހުން މިއަދު އާންމުކުރި ރިޕޯޓުގައިވާ ގޮތުގައި، ބަޖެޓުކުރި 31.5 މިލިއަން ރުފިޔާގެ ތެރެއިން ހަރަދުވީ 29.7 މިލިއަން ރުފިޔާ އެވެ.
ހަރަދުކުރި ފައިސާގެ ތެރެއިން 27.4 މިލިއަން ރުފިޔާ ހަރަދުވީ ކޮވިޑާ ގުޅިގެން އެޅުނު ފިޔަވަޅުތައް ތަންފީޒުކުރަން ނުކުމެ އުޅުނު ފުލުހުންނަށާއި ބަލި މީހުން އުފުލުމުގައި ހަރަކާތްތެރިވި ފުލުހުންނަށް ފްރަންޓްލައިން އެލަވަންސް ދިނުމަށެވެ. އެއީ ޖުމްލަ ހަރަދުގެ 92 ޕަސެންޓެވެ.
ބާކީ 2.3 މިލިއަން ރުފިޔާ ހަރަދުކުރީ ދަތުރުފަތުރަށާއި، އެކޮމޮޑޭޝަންގެ އިތުރުން މަރާމާތަށާއި އެހެނިހެން ކަންކަމަށެވެ. ފްރަންޓްލައިން އެލަވަންސް ނަގާފައި ދެން އެންމެ ބޮޑު ހަރަދެއް ކުރީ އެކޮމޮޑޭޝަންއަށެވެ.
ކޮވިޑާ ގުޅިގެން ފުލުހުންގެ ހިދުމަތުން ކުރި ހަރަދުތައް
ފްރަންޓްލައިން އެލަވަންސް - 27،419،004ރ.
އެކޮމޮޑޭޝަން - 1،331،107ރ.
މަރާމާތު - 617،050ރ.
އެހެނިހެން ހަރަދު - 356،990ރ.
ދަތުރުފަތުރުކުރުމުގެ ހަރަދު - 29،900ރ.
ޖުމްލަ ހަރަދު - 29،754،051ރ.
އޮޑިޓު ރިޕޯޓުގައި ފާހަގަކުރި ގޮތުގައި ފުލުހުން މި ހަރަދުތައް ކުރީ ދައުލަތުގެ މާލިއްޔަތު ގާނޫނާއި، މާލިއްޔަތު ގަވާއިދާއި، ފިނޭންސް މިނިސްޓްރީން ކަނޑައަޅާފައިވާ އުސޫލުތަކާ އެއްގޮތަށެވެ.
އޭގެ އިތުރުން ފްރަންޓްލައިން އެލަވަންސް ދިނުމާ ގުޅިގެން އޮޑިޓުން ފާހަގަކުރެވުނު ކަންކަން، ފްރައިންޓްލައިން އެލަވަންސާ ދިނުމާ ގުޅިގެން އެކުލަވާލާ ވަކި ރިޕޯޓެއްގައި ހިމަނާނެ ކަމަށް އޮޑިޓު އޮފީހުން ބުންޏެވެ.
