ލަންޑަން (ޑިސެމްބަރު 1) - ފްރާންސް ފުޓްބޯލް އިން ދޭ ބެލޮންޑިއޯ އެވޯޑާ ބެހޭގޮތުން ތަފްސީލްކޮށް ވާހަކަ ދައްކަން ބޭނުންނުވާ ކަމަށް ޗެލްސީގެ ކޯޗު ތޯމަސް ޓުޗެލް ބުނެފި އެވެ.
ޔޫރަޕްގެ މޮޅު ކުޅުންތެރިޔާގެ މަގާމު ހޯދި ޗެލްސީގެ މިޑްފީލްޑަރު ޖޯޖީނިއޯ އަކީ ބެލޮންޑިއޯ ހޯދާނެ ކަމަށް ބެލެވުނު ކުޅުންތެރިއެކެވެ. އެކަމަކު، އޭނާ ދިޔައީ ތިން ވަނަ އަށެވެ. ބެލޮންޑިއޯ ގެންދިޔައީ ލިއޮނަލް މެސީ އެވެ. ދެ ވަނަ އަށް ދިޔައީ ރޮބަޓް ލެވަންޑޯސްކީ އެވެ.
އިނގިރޭސި ޕްރިމިއާ ލީގުގައި މިރޭ ވަޓްފޯޑާ ދެކޮޅަށް ޗެލްސީ ކުޅޭ މެޗުގެ ކުރިން ނޫސްވެރިއަކު ޓުޗެލް ގާތުގައި ސުވާލުކުރީ ބެލޮންޑިއޯ އެވޯޑް، ޖޯޖީނިއޯ އަށް ނުލިބުމުން އެކަމާ ބެހޭގޮތުން ދެކެނީ ކިހިނެއްތޯ އެވެ. ޓުޗެލް ބުނީ އޭނާ އަކީ އިންޑިވިޖުއަލް އެވޯޑްތަކާ ބެހޭގޮތުން އެހާ ތަފްސީލްކޮށް ވާހަކަ ދައްކަން ބޭނުންވާ މީހެއް ނޫން ކަމަށެވެ.
"އިންޑިވިޖުއަލްކޮށް ދޭ މި ފަދަ އެވޯޑްތަކާ މެދު އަހަރެން އަބަދުވެސް ގެންގުޅެނީ ތަފާތު ވިސްނުންތަކެއް. އެހެންވެ، އަހަރެން އެ ވާހަކަ ދައްކަން ބޭނުން ވެސް ނުވަނީ. ފުރަތަމަ ކަމަކަށް ފުޓްބޯޅަ އަކީ ޓީމު ގޭމެއް. އެއް ކުޅުންތެރިއަކު އެކަނި ހުރެގެން ހުރިހާ ފަހަރަކު މޮޅެއް ނުވާނެ. އަދި މޮޅުވާ ޓީމެއްގެ ހުރިހާ ކްރެޑިޓެއް އެކަކަން ދިނުން ވެސް އެންމެ ރަނގަޅު ނުވެދާނެ،" ޓުޗެލް ބުންޏެވެ.
"އަހަންނަށް ހީނުވޭ ޖޯޖީނިއޯ ވެސް ބެލޮންޑިއޯ ނުލިބިގެން އެހާ މާޔޫސްވާނެ ހެން. އެއީ ބެލޮންޑިއޯ ނުލިބުނަސް ޖޯޖީނިއޯ އަކީ ޔޫރަޕްގެ އިތުރުން ދުނިޔޭގައި ވެސް ފާހަގަކޮށްލެވޭ ކުޅުންތެރިއެއް،"
ޖޯޖީނިއޯ ވަނީ ޗެލްސީއާ އެކު މިދިޔަ ސީޒަނުގައި ޗެމްޕިއަންސް ލީގު ކާމިޔާބު ކުރުމުގެ އިތުރުން އިޓަލީއާ އެކު ޔޫރޯގެ ތަށި ވެސް އުފުލާލައިފަ އެވެ. އަދި ޔުއެފާ ސުޕަ ކަޕްގެ ތަށި ހޯދީ ވެސް ޗެލްސީންނެވެ.
ފާއިތުވި ދެ އަހަރު ބަޔާން މިއުނިކްގައި ލެވަންޑޯސްކީ ދެއްކި ކުޅުމަށް ބަލާއިރު، އޭނާ އަށް ބެލޮންޑިއޯ ލިބެންޖެހޭ ކަމަށް ދެކެވޭ ވާހަކަތަކާ މެދު ދެކެނީ ކިހިނެއްތޯ އެހުމުން ޓުޗެލް ބުނީ އެ މައުލޫއަށް އޭނާ ވާހަކަ ނުދައްކާނެ ކަމަށެވެ.
"އެއީ ވޯޓަކުން ކުރާ ކަމެއް. ވޯޓު ނިމުނީމަ އެ ނިމުނީ. އޭގެ ވަކި މީހަކަށް ކަމުދާ ގޮތެއް ނޫނީ ކަމުނުދާ ގޮތެއް އޮވެގެން ވާނެ ކަމެއް ނެތް. ދިރިއުޅުމައިގެން ކުރިއަށް ދާންވީ،" ޓުޗެލް ބުންޏެވެ.
ބެލޮންޑިއޯ އެވޯޑަށް އެންމެ ގިނަ ކުޅުންތެރިން ނޮމިނޭޓްވި ކްލަބްގެ ހައިސިއްޔަތުން އެންމެ މޮޅު ކްލަބްގެ އެވޯޑް ދިނީ ޗެލްސީ އަށެެވެ. ޗެލްސީގެ ކީޕަރު އެޑޮއާޑް މެންޑީ ފަހަތަށް ޖައްސާލުމަށް ފަހު އެންމެ މޮޅު ކީޕަރަށްދޭ ޔަސީން ޓްރޮފީ ހާސިލްކުރީ އިޓަލީއާ އެކު ޔޫރޯ ފުޓްބޯޅަ މުބާރާތް ކާމިޔާބުކުރި ގޯލްކީޕަރު ޖިއަންލުއީޖީ ޑޮންނަރުންމާ އެވެ.
