ސުޕްރީމް ކޯޓުން ކުށް ސާބިތުނުވާކަމަށް ކަނޑައެޅުމާއެކު އިއްޔެ މިނިވަންވެވަޑައިގަތުމަށްފަހު ކުރީގެ ރައީސް އަބްދުﷲ ޔާމީން އަބްދުއްގައްޔޫމް އެންމެ ފުރަތަމަ ވެސް އިދިކޮޅު ކޯލިޝަނަށް އިރުޝާދު ދެއްވީ އިދިކޮޅުގެ ސިޔާސީ ހަރަކާތްތައް ފުޅާކޮށް ވަރުގަދަކުރަން ކަމަށް އެ ކޯލިޝަނުން ބުނެފި އެވެ.
އެ ކޯލިޝަނުގެ ތަރުޖަމާނު ހީނާ ވަލީދު "އަދަދު"އަށް މިއަދު ވިދާޅުވީ، އިއްޔެ މިނިވަންވެވަޑައިގަތުމާއެކު ޔާމީން ދެ އަހަރަށްފަހު ރޭގެ ވަގުތެއްގައި ޕީޕީއެމް އޮފީހަށް ވަޑައިގެންނެވި ކަމަށެވެ.
އަދި ކޯލިޝަނުގެ އިސް ލީޑަރުންނާއި ޕާޓީ މެމްބަރުންނާ ބައްދަލުކުރައްވައި، އެމަނިކުފާނު ނެތް ދަނޑިވަޅުގައި ޕާޓީ ހަރަކާތްތައް ނުހުއްޓި ކުރިއަށް ގެންދިޔަކަމަށްޓަކައި، އަދި މެމްބަރުން ދެއްކި ހިތްވަރަށް ޝުކުރު އަދާކުރެއްވިކަމަށް ހީނާ ވިދާޅުވި އެވެ.
"އޭގެ ފަހުން އިދިކޮޅުގެ މިހާރުގެ މަޖިލިސް މެމްބަރުންނާއި ކުރީގެ މެމްބަރުންނާ ވެސް ބައްދަލުކުރައްވައި، އެބޭފުޅުން ދެއްކެވި ހިތްވަރާއި، ޕާޓީ ކުރިއަށް ގެންދަން އެބޭފުޅުން ހަރަކާތްތެރިވެ ކުރެއްވި މަސައްކަތްތަކަށް އެމަނިކުފާނު ޝުކުރު އަދާކުރެއްވި،" ހީނާ ވިދާޅުވި އެވެ.
ހީނާ ވިދާޅުވީ ރޭގެ ބައްދަލުވުމުގައި ޔާމީންގެ ފަރާތުން ޕާޓީ މެމްބަރުންނަށް ދެއްވި އެންމެ ފުރަތަމަ އިރުޝާދަކީ ވެސް ސިޔާސީ ހަރަކާތްތައް އިތުރަށް ފުޅާކުރުން ކަމަށެވެ.
"އަންނަ ހުކުރު ދުވަހު އޮންނަ ޖަލްސާއަށް ފަހު ވެސް އިތުރު އެހެން ޖަލްސާތައް ބާއްވައި، ސިޔާސީ ހަރަކާތްތައް ފުޅާކުރުމަށް މަޝްވަރާކޮށް އެމަނިކުފާނު އިރުޝާދު ދެއްވި. އެގޮތުން އަތޮޅުތެރޭ ރަށްތަކަށް ދަތުރުތަކެއް ފެށުމާއި، ރާއްޖޭގައި އިންޑިއާ ސިފައިން ތިބޭ ތިބުމާއި ދެކޮޅަށް ވެސް ސިޔާސީ ހަރަކާތްތައް އިތުރުކުރަން އެމަނިކުފާނު މަޝްވަރާކުރެއްވި،" ހީނާ ވިދާޅުވި އެވެ.
ހުކުރު ދުވަހު އޮންނަ އިދިކޮޅުގެ ޖަލްސާގައި ރައީސް ޔާމީން ވާހަކަދައްކަވަން ހަމަޖެހިފައިވާއިރު، އެ ޖަލްސާއަށްފަހު އިދިކޮޅުން ސިޔާސީ ހަރަކާތްތައް އިތުރަށް ވަރުގަދަކުރާނޭކަމަށް ހީނާ ވިދާޅުވި އެވެ.
ރައީސް ޔާމީން މިނިވަންވީ މަނީ ލޯންޑަރިން މައްސަލައިގައި 700 އަށް ވުރެ ގިނަ ދުވަހު ހުކުމް ތަންފީޒުކުރެއްވުމަށްފަހު އިއްޔެ އޮތް ސުޕްރީމް ކޯޓުގެ ޝަރީއަތުގައި އެމަނިކުފާނުގެ މައްޗަށް ކުށް ސާބިތުނުވާކަމަށް އެ ކޯޓުން ކަނޑައެޅުމާއެކުގަ އެވެ.
