ޕެންޓެގަންގެ ކުރީގެ ވެރިޔާ މާކް އެސްޕާ ލިޔުއްވައި ޝާއިއު ކުރަން ތައްޔާރުވެފައިވާ ފޮތަކުން ބައެއް ބައިތައް އުނިކުރި މައްސަލައިގައި ޕެންޓެގަންއާ ދެކޮޅަށް ދައުވާ އުފުލައިފި އެވެ.
އާދީއްތަ ދުވަހު ހުށަހެޅި މައްސަލައިގައި އެސްޕާ ތުހުމަތު ކުރެއްވީ "މައުލޫމާތު ހިފެހެއްޓުމުގެ ނަމުގައި" ލިޔުމުގެ ބައިތައް ސެންސަރު ކުރި ކަމަށެވެ.
ހިޔާލު ފާޅުކުރުމުގެ މިނިވަންކަމަށް ހުރަސް އެޅޭ އެ އަމަލާ މެދު "ހިތްހަމަނުޖެހޭ" ކަމަށް އެސްޕާ ވިދާޅުވި އެވެ.
އެމެރިކާގެ ޑިފެންސް ސެކެޓްރީގެ މަގާމަށް 2019 ވަނަ އަހަރު އެސްޕާ އައްޔަނުކުރެއްވީ ކުރީގެ ރައީސް ޑޮނަލްޑް ޓްރަމްޕެވެ. ނޮވެމްބަރު 2020 ގައި އޮތް ރިޔާސީ އިންތިހާބު ނިމުނުތާ ކުޑަ ދުވަސްކޮޅެއް ފަހުން ޓްރަމްޕް ވަނީ އެސްޕާ މަގާމުން ވަކިކުރައްވާފަ އެވެ.
ކޯޓަށް ހުށަހެޅި ލިޔުންތަކުގައިވާ ގޮތުން މޭ 2022 ގައި ނެރެން ހަމަޖެހިފައިވާ ފޮތަކީ އެސްޕާ ވައިޓް ހައުސްގައި ހޭދަކުރެއްވި ވަގުތުތަކާ ގުޅޭ "ހާމަކަންބޮޑު މެމޮޔާ" އެކެވެ.
އެސްޕާ ވިދާޅުވީ "އަ ސޭކްރެޑް އޯތު" ފޮތުގައިވާ "މުހިއްމު ވާހަކަތައް ކިޔައިދިނުމަށް" ކޮންމެހެން ބޭނުންވާ ބައިތައް "އެއްވެސް ސަބަބެއް ނެތި" ޕެންޓެގަން އިން ވަނީ އެޑިޓުކޮށްފަ އެވެ.
"އެކަން ސާފުކޮށްދޭން ލިޔުމުން އަޅުގަނޑަށް އެއްވެސް އެއްޗެއް އަންގާފައެއް ނުވޭ،" އެސްޕާ ވިދާޅުވި އެވެ. އޭގެ އިތުރުން އެއީ ސިއްރު މައުލޫމާތު ހިމެނޭ ބައިތައްކަން ޕެންޓެގަން އަށް ސާބިތުކޮށްނުދެވޭ ކަމަށް ވިދާޅުވި އެވެ.
އެމެރިކާގެ އަމަލު ކުރާ އުސޫލުގެ ދަށުން ޕެންޓެގަންގެ ކުރީގެ ވެރިން ލިޔާ ފޮތްތައް ޝާއިއު ކުރުމުގެ ކުރިން ޕެންޓެގަން އަށް ހުށަހަޅަން ޖެހެ އެވެ. އޭގެ ބޭނުމަކީ ދައުލަތުގެ ސިއްރުތައް ހާމަނުވާނެކަން ކަށަވަރު ކުރުމެވެ.
