ޓެންޒޭނިއާގެ ޕެމްބާ ރަށުގައި ވިހަވެފައިވާ ވެލާ މަސް ކައިގެން ހަތް މީހުން މަރުވެއްޖެ އެވެ. އޭގެ ތެރޭގައި ތިން އަހަރުގެ ކުއްޖަކު ވެސް ހިމެނެ އެވެ.
އިތުރު ތިން މީހަކަށް ދަނީ ހޮސްޕިޓަލުގައި ފަރުވާދެމުންނެވެ.
ޓެންޒޭނިއާގެ ރަށްތަކާއި އައްސޭރިފަށުގެ ހިސާބުތަކުގައި ވަރަށް ގިނައިން ވެލާ މަސް ކައި ހަދަ އެވެ. ނަމަވެސް އެއީ މަނާކޮށްފައިވާ ކަމެކެވެ.
ބައެއް ފަހަރު ވެލާ މަސް ވިހަވެ، "ކެލޮނިޓޮކްސިޒަމް" ނަމަކަށް ކިޔާ ކާނާ ވިހަވާ ހާލަތެއް އިންސާނުންނަށް ދިމާވެ އެވެ. ވެލާ މަސް ވިހަވާ ސީދާ ސަބަބު ހޯދިފައި ނުވި ނަމަވެސް، އެކަން ގުޅިފައި ވަނީ ވެލާ ކައި އުޅޭ ވިހަގަދަ އަލްގޭއާ ކަމަށް ޓާޓަލް ފައުންޑޭޝަން ޖަމިއްޔާ އިން ބުނެ އެވެ.
މިދިޔަ ބުރާސްފަތި ދުވަހު ޕެމްބާ ރަށުގެ ފަސް އާއިލާއަކުން ވެލާ މަސް ކެޔެވެ. އޭގެ އަސަރު ކުރަން ފެށީ ހުކުރު ދުވަހު އެވެ. ފުރަތަމަ މަރުވީ ތިން އަހަރުގެ ކުއްޖާ އެވެ.
ހުކުރު ދުވަހުގެ ރޭ އިތުރު ދެ މީހުން މަރުވެ، އާދީއްތަ ދުވަހު އިތުރު ހަތަރު މީހުން މަރުވި އެވެ. ވިހަވުމުގެ އަސަރުކޮށްގެން 38 މީހަކަށް ފަރުވާދޭން ޖެހުނެވެ.
އޭގެ ތެރެއިން ތިން މީހުން ފިޔަވައި އެހެން އެންމެން ވެސް މިހާރު ވަނީ ދޫކޮށްލާފަ އެވެ. އެ ތިން މީހުންގެ ވެސް ހާލު ރަނގަޅު ކަމަށް ވެ އެވެ.
ވެލާ މަސް ކައިގެން ކާނާ ވިހަވުމުގެ އަސަރު އެންމެ ބޮޑަށް ކުރަނީ ކުޑަކުދިންނާއި އުމުރުން ދުވަސްވީ މީހުންނަށެވެ. އެކަމަކު ސިއްހަތު ރަނގަޅު ބޮޑެތި މީހުންނަށް ވެސް ބައެއް ފަހަރު އަސަރުކުރެ އެވެ.
މިދިޔަ މާޗް މަހު މަޑަގަސްކަރައިެ 19 މީހުން ވެލާ މަސް ކައިގެން މަރުވި އެވެ. އޭގެ ތެރޭގައި ނުވަ ކުޑަކުދިން ހިމެނެ އެވެ.
ވެލާ މަސް ކައިގެން ވިހަވުމުގެ ކޭސްތައް އިންޑޮނޭޝިއާ އާއި މައިކްރޯނޭޝިއާ އަދި އިންޑިއާ ކަނޑުގައި ހުންނަ އިންޑިއާގެ ރަށްތަކުން ވެސް ފެނިފައި ވެ އެވެ.
