ހުޅުމާލޭ ފޭސް 2ގައި ދިރިއުޅޭ މީހުންނަށް އަންނަ ހަފުތާގެ ބުދަ ދުވަހުން ފެށިގެން ސީދާ މާލެއަށް އައުމަށް ބަސް ދަތުރުތައް ފަށާނެ ކަމަށް އެމްޓީސީސީގެ މެނޭޖިން ޑިރެކްޓަރު އާދަމް އާޒިމް މިއަދު ވިދާޅުވެއްޖެ އެވެ.
ހުޅުމާލޭ ފޭސް 2ގައި އެމްޓީސީސީން ބަސް ދަތުރުތައް ފެށީ މިދިޔަ އޮކްޓޫބަރު މަހު އެވެ.
މިހާރު ދެވަނަ ފިޔަވަހީގައި ދިރިއުޅޭ މީހުން މާލެ ދާން ޖެހެނީ ހުޅުމާލެ ފޭސް 1 އަދި ފޭސް 2 ގުޅުވައިދޭ ބަސް ރޫޓުން ބަހެއް ނަގައިގެން ފޭސް 1 ގޮސް، ހުޅުމާލެ – ވެސްޓް ޕާކް ރޫޓު ނޫނީ ހުޅުމާލެ – ކާނިވަލް ރޫޓު ބަހެއް ނަގައިގެންނެވެ.
މިހެން ވުމުން ގިނަ އިރު މަޑުކުރަން ޖެހި، ދަތުރުމަތީގައި ހޭދަ ކުރަން ޖެހޭ ވަގުތު ދިގުވާ ކަމުގެ ޝަކުވާތައް ބޮޑެވެ.
މާލެއަށް ސީދާ ދަތުރުތައް ފަށާކަން އިއުލާނުކުރި ޓްވީޓުގައި އާޒިމް ވިދާޅުވީ، ދަތުރުތައް ފަށާއިރު ގަޑިއިރަކުން ގަޑިއިރަކުން ފޭސް 2އިން މާލެއަށް ބަހެއް އޮންނާނެ ކަމަށެވެ. އަދި ޖުލައި މަހުން ފެށިގެން ކޮންމެ 15 މިނިޓަކުން ބަހެއް ދަތުރުކުރާ ގޮތަށް ފްރިކުއެންސީ އިތުރު ކުރާނެ ކަމަށެވެ.
މިގޮތަށް މާލެއަށް ސީދާ ބަސް ދަތުރުތައް ފެށުން ވެގެން ދާނީ ފޭސް 2އިން މާލެއަށް ދަތުރުކުރާ ސްކޫލް ކުދިންނަށާއި އޮފީސްތަކަށް ދާ މީހުންނަށް ބޮޑު ލުޔެއް ލިބޭނެ އިންތިޒާމަކަށެވެ.
އެމްޓީސީސީން އަންނަނީ އެ ކުންފުނިން މާލެ ސަރަހައްދުގައި ފޯރުކޮށްދޭ ބަހުގެ ހިދުމަތް ފުޅާކުރަން އިތުރު ބަސްތައް ގަތުމުގެ މަސައްކަތް ކުރަމުންނެވެ. އަދި މި އަހަރުގެ ތެރޭގައި ބަސް ފްލީޓު އިތުރުކުރެވޭނެ ކަމަށް އެ ކުންފުނިން ބުނެފައި ވެ އެވެ.
އެމްޓީސީސީގެ ހިދުމަތް ފުޅާވެގެން ދާއިރު، މާލެ ސަރަހައްދުގައި މިނީ ބަހުގެ ހިދުމަތް ފަށާ ގޮތަށް ވެސް ވަނީ ހަމަޖެހިފަ އެވެ. އެ ހިދުމަތް ވެސް މި އަހަރުގެ ތެރޭގައި ތައާރަފުކުރާނެ ކަމަށް އެ ކުންފުނިން ބުނެ އެވެ.
