ގުދުސް (ނޮވެމްބަރު 29) - ހަނގުރާމައިގެ ސަބަބުން ހާލުގައި ޖެހިފައިވާ އިތިއޯޕިއާގެ 3،000 ޔަހޫދީންނަށް އިޒްރޭލުގައި ވަޒަންވެރިވުމުގެ ހުއްދަ ދީފި އެވެ.
"އާލިޔާ" ގެ ނަމުގައި އިޒްރޭލުން ތަންފީޒު ކުރާ ސިޔާސަތެއްގެ ދަށުން ދުނިޔޭގެ ކޮންމެ ތަނެއްގައި ދިރިއުޅޭ ޔަހޫދީއަކަށް ވެސް އިޒްރޭލުގައި ވަޒަންވެރިވުމުގެ ހައްގު ލިބެ އެވެ.
މިހާރު ވެސް އިތިއޯޕިއާގެ 140،000 ޔަހޫދީން އިޒްރޭލުގައި ދިރިއުޅެ އެވެ. އިތިއޯޕިއާގައި ތިބި އެ މީހުންގެ އާއިލާތަކަށް ވެސް އިޒްރޭލުގައި ވަޒަންވެރިވުމުގެ ހުއްދަ ދިނުމަށް ގޮވާލައި ދާދި ފަހުން މުޒާހަރާ ކުރި އެވެ.
ބޮޑު ވަޒީރު ނަފްތާލީ ބެނެޓްގެ އޮފީހުން ނެރުނު ބަޔާނެއްގައި ބުނީ އިތިއޯޕިއާގެ 3،000 މީހުންނަށް އިޒްރޭލަށް ހިޖުރަ ކުރުމުގެ ހުއްދަ ދޭން ކެބިނެޓުން ނިންމާފައިވާ ކަމަށެވެ.
އެއީ "ފުރަތަމަ ޑިގްރީގެ" ތިމާގެ މީހުން އިޒްރޭލުގައި ތިބި މީހުންނެވެ. "ފުރަތަމަ ޑިގްރީގެ" ތިމާގެ މީހުންގެ ގޮތުގައި މާނަކޮށްފައި ވަނީ މައިންބަފައިން، ދަރިން ނުވަތަ އެއްބަނޑު އެއްބަފާ މީހުންނެވެ.
"ހިޖުރަ ކުރުމަށް ޝަރުތު ހަމަވާ ފަރާތްތައް އެ މީހުންގެ އަނބިންނާއި ފިރިން އަދި ދަރިން ގޮވައިގެން އިޒްރޭލަށް އެތެރެވުމުގެ ހުއްދަ އެބަ އޮތް،" ބަޔާނުގައި ވެ އެވެ.
އޭގެ އިތުރުން އިޒްރޭލަށް އެތެރެވުމަށް ފަހު އެ ތަނުގައި މަރުވި މީހެއްގެ ދަރިންނަށް ވެސް ހިޖުރަ ކުރުމުގެ ހުއްދަ ލިބޭނެ ކަމަށް ވަނީ ކަނޑައަޅާފަ އެވެ.
އިމިގްރޭޝަން މިނިސްޓަރު ނީނާ ޓަމާނޯ ޝާތާ ވަނީ އެ ނިންމުމަށް މަރުހަބާ ކިޔައިފަ އެވެ. އޭނާ އަކީ އިޒްރޭލުގެ ޕާލިމެންޓަށް އިންތިހާބުވި ތިއޯޕިއާ ދަރިކޮޅުގެ ފުރަތަމަ ޔަހޫދީ އަންހެން މީހާ އެވެ.
"މިއީ އިޒްރޭލުގައި ދިރިއުޅޭ އިތިއޯޕިއާގެ ކޮމިއުނިޓީ އާއި އެ މީހުންގެ އާއިލާތަކަށް މުހިއްމު ނިންމުމެއް،" އަހަރުތަކަކަށް ފަހު އާއިލާތަކަށް އަލުން ބައްދަލުވެވޭނެކަން ފާހަގަކޮށް އޭނާ ވިދާޅުވި އެވެ.
އިތިއޯޕިއާގެ ޓިގްރޭ ހަނގުރާމަވެރިންނާއި ސަރުކާރުގެ ފައުޖާ ދެމެދު ހަނގުރާމަ ކުރާތާ އަހަރެއް ވެއްޖެ އެވެ. އޭގެ ސަބަބުން އެތައް ލައްކަ ބަޔަކު ވަނީ ހާލުގައި ޖެހިފަ އެވެ.
