ރާއްޖޭގެ ބޯޓިން ސިނާއަތަށް ހާއްސަ ކޮށްގެން ބާއްވާ ހަމައެކަނި އިވެންޓު، މޯލްޑިވްސް މެރިން އެކްސްޕޯ 2021 ގެ ސްޕޮންސަރުންނާއި ޕާޓްނަރުންނާއެކު މިއަދު ސޮއިކޮށްފި އެވެ.
ޑިސެމްބަރު 11 އިން 13 އަށް، ހުޅުމާލޭ ސެންޓްރަލް ޕާކުގައި ބާއްވާ މެރިން އެކްސްޕޯގެ މެއިން ސްޕޮންސަރަކީ އެމްޓީސީސީ އެވެ. އެ ކުންފުންޏަކީ މެރިން އިކްއުމެންޓް ވިއްކައި ހިދުމަތް ފޯރުކޮށް ދޭ، އަދި އަދި ބާރު ދުވެލީގެ ލޯންޗް ފަހަރާއެކު އެތެރޭގެ ދަތުރުތަކަށް އިންގިލާބީ ބަދަލެއް ގެނައުމުގެ އަމާޒަށް މަސައްކަތް ކުރަމުން އަންނަ ކުންފުންޏެކެވެ. އަދި ބިން ހިއްކުމާއި ބަނދަރު ހެދުމުން ފެށިގެން ބިޔަ މަޝްރޫއުތައް ކުރިއަށް ގެންދިއުމުގައި ވެސް އެންމެ ވަރުގަދަ އެއް ކުންފުންޏެވެ.
މެރިން އެކްސްޕޯގެ ކޯ ސްޕޮންސަރު ޖަލްބޫތާއެކު ސޮއިކުރުމަށް ފަހު އެއްބަސްވުން ދައްކާލަނީ -- ފޮޓޯ: އާއިމް ޒަމީރު / އަދަދު
މި ފަހަރުގެ މެރިން އެކްސްޕޯގެ ކޯސްޕޮންސަރުންނަކީ ކްރޮސްރޯޑްގެ މެރީނާ މެނޭޖުކުރަމުން އަންނަ ޔޫއޭއީގެ މެރިން ސޮލިއުޝަން ކުންފުނި، ޖަލްބޫތު އަދި ރާއްޖޭގައި ލޯންޗް ފަހަރު ބަނދެ ވިއްކާ ގަލްފް ކްރާފްޓް އެވެ.
ސްޕޮންސަރުން
- މެއިން ސްޕޮންސަރު: އެމްޓީސީސީ
- ކޯ-ސްޕޮންސަރު: ޖަލްބޫތު، ގަލްފް ކްރާފްޓު
- އޮފިޝަލް ބޯޓް ބިލްޑަރު: އަލްޝާ މެރިން
- އޮފިޝަލް ޕްރޮޑަކްޓް: ހޮންޑާ މެރިން
- އޮޮފިޝަލް ސަޕްލަޔަރު: އިލެކްޓްރިފައި މޯލްޑިވްސް
- މެރިން ލައިފްސްޓައިލް ޕާޓްނަރު: ސީގިއާ
- ޑައިވިން ސޮލިއުޝަން ޕާޓްނަރު: އެމްއޭ ސާވިސަސް
- އޮފިޝަލް ފިއުލް ސަޕްލަޔަރު: ވިލާ ފިއުލް
- އޮފިޝަލް ލިޖިސްޓިކް ޕާޓްނަރު: ގޯ ލޮޖިސްޓިކްސް
މެރިން އެކްސްޕޯގެ ކޯ ސްޕޮންސަރު ގަލްފް ކްރާފްޓާއެކު ސޮއިކުރުމަށް ފަހު -- ފޮޓޯ: އާއިމް ޒަމީރު / އަދަދު
ޕާޓްނަރުން
- ލޯކަލް މީޑިއާ ޕާޓްނަރު: އަދަދު
- ޓްރެވަލް މީޑިއާ ޕާޓްނަރު: ކޮރަލް ގްލާސް
- ޓެބްލޮއިޑް ޕާޓްނަރު: އައިލެންޑް ޗީފް
- ކޭޓަރިން ޕާޓްނަރު: ސެމިލީސް ކެފޭ އެންޑް ބިސްޓްރޯ
- ކޮފީ ޕާޓްނަރު: ކެފޭޔަ
- ވީޑިއޯ ޕާޓްނަރު: ބްރޭންޑްއެން
- ޕްރިންޓް ޕާޓްނަރު: ޕްރިންޓް ލެބް
މެރިން އެކްސްޕޯގެ މީޑިއާ ޕާޓްނަރުގެ އެއްބަސްވުމުގައި އަދަދުގެ ފަރާތުން ސީއީއޯ ހުސައިން ފިޔާޒު (ކ) ސޮއިކުރުމަށް ފަހު ފޮޓޯއަކަށް ހުއްޓިގެން
ސްޕޮންސަރުންނާއި ޕާޓްނަރުންނާއެކު ސޮއިކުރުމުގެ ހަފުލާ އޮތީ ކްރޮސްރޯޑްސްގައި ހުންނަ ސަންސޭޝަން ބީޗް ކްލަބުގަ އެވެ.
މިއީ މި އެކްސްޕޯގެ ހަތް ވަނަ އެޑިޝަން އެވެ. ކޮވިޑް ފެތުރަމުން ދިއުމާއެކު 2020 ގެ އެޑިޝަން ބޭއްވީ އޮންލައިން ކޮށެވެ.
"ކޮވިޑަށް ފަހު ބާއްވާ އެންމެ ބޮޑު އެކްސްޕޯއަށް މި އެކްސްޕޯ ވާނެ. ވަރަށް ބޮޑު ތަރުހީބެއް ލިބެމުން އެބަދޭ. ވަރަށް ގިނަ ވިޔަފާރިތައް، ޕްރޮޑަކްޓްތައް ފެނިގެންދާނެ،" އެކްސްޕޯގެ އޮގަނައިޒަ، މީޑިއަމް ޕްރައިވެޓްގެ މެނޭޖިން ޑިރެކްޓަރު ޝާމް މުހައްމަދު ވިދާޅުވި އެވެ.
މެރިން އެކްސްޕޯއަކީ ކޮބާ؟
މެރިން އެކްސްޕޯއަކީ ސަފާރީ ސިނާއަތުގެ ވިޔަފާރިވެރިންގެ ޖަމިއްޔާ ނޭޝަނަލް ބޯޓިން އެސޯސިއޭޝަން އޮފް މޯލްޑިވްސް (އެންބީއޭއެމް) ގެ ރަސްމީ އިވެންޓެވެ.
ހަމައެކަނި ލިވްއެބޯޑާއި، ޔޮޓާއި، މެރިން ޓްރާންސްފޯޓަށް ހާއްސަ ވެގެން 2016 ގައި ފެށި މި އިވެންޓު ފުޅާވަމުން ގޮސް، މިހާރު މެރިން ސިނާއަތާ ގުޅުންހުރި ހުރިހާ ބަޔަކަށް ހާއްސަ ބައިތައް އެކްސްޕޯގައި ހިމެނެ އެވެ. މިހާރު އެކްސްޕޯގައި އިސްކަންދޭ ދާއިރާތަކުގެ ތެރޭގައި ލިވްއެބޯޑުތަކާއި ޔޮޓުތަކާއި، މަސްވެރިކަމުގެ އިތުރުން ވޯޓަރ ސްޕޯޓްސްއާއި ލޮޖިސްޓިކްސް ހިމެނެ އެވެ.
