ތެހްރާން، އިރާން (ނޮވެމްބަރު 27) - ފެން ކޯރެއް ހިކުނު މައްސަލައިގައި ބާއްވަމުންދާ ސިލްސިލާ މުޒާހަރާތަކުގެ ތެރެއިން އިސްފަހާން ސިޓީގައި ހުކުރު ދުވަހު ބޮޑެތި ހަމަނުޖެހުންތައް ހިނގައި، ބަޔަކު ހައްޔަރުކޮށްފި އެވެ.
ޒަޔަދްނޭހް ރޫދް ކޯރު ކައިރި އަށް މީހުން ޖަމާވެ ގަލާއި ހިލަ އުކަން ފެށުމުން ފުލުހުން ކަރުނަ ގޭސް ބޭނުންކުރި އެވެ. ފުލުހުން ބުނީ ބަޔަކު ހައްޔަރު ކުރި ކަމަށެވެ. ނަމަވެސް ހައްޔަރު ކުރީ ކިހާ އަދަދެއްގެ މީހުން ކަމެއް ހާމަކޮށްފައެއް ނުވެ އެވެ.
ހުކުރު ދުވަހުގެ އެއްވުމަކީ މިހާތަނަށް ބޭއްވި އެންމެ ބޮޑު އެއްވުމެވެ. މުޒާހަރާތައް ކުރަމުންދާ އިސްފަހާން ސިޓީ އަކީ ރީތި މިސްކިތްތަކާއި ހެރިޓޭޖް ސައިޓުތައް ހިމެނޭ ފަތުރުވެރިން ގިނަ އަދަދަކަށް ގޮސް އުޅޭ މުހިއްމު ސިޓީ އެކެވެ.
ސިލްސިލާ މުޒާހަރާތަކުގެ ތެރެއިން މިހާތަނަށް ހަމަނުޖެހުން އުފެދުނީ ހަމައެކަނި ހުކުރު ދުވަހުގެ އެއްވުމުގަ އެވެ.
މުޒާހަރާ ކުރާ މީހުން ހިތްހަމަނުޖެހިގެން އުޅެނީ ކޯރެއް ހިކި ފެން ނުލިބޭ މައްސަލައިގަ އެވެ. އެ ކޯރު ހިކިފައި ވަނީ އާދަޔާ ހިލާފަށް ހޫނުގަދަވުމުގެ އިތުރުން، ކޯރުގެ ފެން ދައުރު ކުރާ ރޫޓު ބަދަލުކުރުމުގެ ސަބަބުން ކަމަށް ރިޕޯޓުތައް ބުނެ އެވެ.
ހުކުރު ދުވަހުގެ މުޒާހަރާގައި ހަމަނުޖެހުން ހިނގައި ގިނަ ބަޔަކަށް އަނިޔާވި އެވެ. އޭގެ ތެރެއިން ދެ މީހެއްގެ ހާލު ސީރިއަސް ކަމަށް އިސްފަހާން ޔުނިވާސިޓީ އޮފް މެޑިކަލް ސައިންސަސް އިން ބުންޏެވެ.
އާދަޔާ ހިލާފަށް ހޫނުވުމުގެ އަސަރު އެންމެ ބޮޑަށް ކުރަމުންދާ އިސްފަހާންގައި މި މަހުގެ ކޮންމެ ދުވަހަކު ވެސް އެއްވުމެއް ބާއްވަ އެވެ. އެގޮތުން ނޮވެމްބަރު 19 ވަނަ ދުވަހު އޮތް ބޮޑު އެއްވުމުގައި އެތައް ހާސް ބަޔަކު ބައިވެރިވި އެވެ.
ފާއިތުވި 10 އަހަރުގެ ތެރޭގައި އާދަޔާ ހިލާފަށް ހޫނުގަދަވުމާ ހެދި ތަފާތު އެކި މައްސަލަތައް އިރާނަށް ވަނީ ދިމާވެފަ އެވެ. ހަމަ އެގޮތަށް ބައެއް ހިސާބުތަކަށް މާ ގިނައިން ވާރޭވެހި ފެންބޮޑުވުމުގެ މައްސަލަ ވެސް ފަހަކަށް އައިސް ދިމާވެފައި ވެ އެވެ.
ސައިންސްވެރިން ބުނާ ގޮތުގައި އާދަޔާ ހިލާފަށް ހޫނުގަދަވުމުގެ މައްސަލަ އަހަރުން އަހަރަށް ގޯސްވަމުން ދަނީ މޫސުމީ ބަދަލާ ހެދި އެވެ. މާ ގިނައިން ހޫނުވާ މައްސަލަ ދިމާވާން ފެށުމުން ފެނުގެ އިތުރުން ކާބޯތަކެތީގެ ސެކިއުރިޓީ ވެސް ނުރައްކަލަށް ހުށަހެޅެ އެވެ.
ދައުލަތުގެ ޓީވީން ބުނީ ޗަހަރް މަހަލް ބަހްތިއާރީ ޕްރޮވިންސްގެ ޒަގްރޯސް ފަރުބަދަތަކުން އިސްފަހާން ސިޓީ ތެރެއިން ދައުރުވާ ޒަޔަދްނޭހް ރޫދް ކޯރުގެ ފެންގަނޑު ހިކުމާ އެކު ކައިރި ހިސާބުތަކުގައިވާ ވަޅުތަކުން ވެސް ފެން ނުލިބޭ ކަމަށެވެ.
މި މަހުގެ ކުރީކޮޅު ރައީސް އިބްރާހިމް ރައިސީ ވިދާޅުވީ ފެނުގެ މައްސަލަ ހައްލު ކުރައްވާނެ ކަމަށާއި ފެން ހިކިގެން އުޅޭ ކޯރު އަލުން އާރޯކުރުމަށް ހާއްސަ ކޮމިޓީއެއް އުފައްދަވާނެ ކަމަށެވެ.
