ގުދުސް (ނޮވެމްބަރު 27) - ޔަހޫދީންގެ ހަނުކާ ފެސްޓިވަލުގައި އިޒްރޭލުގެ ރައީސް ހުޅަނގު އައްސޭރީގެ ހިސާބަކަށް ޒިޔާރަތް ކުރާނެކަން އިއުލާނު ކުރުމާ އެކު ހަމާސް އިން އިންޒާރު ދީފި އެވެ.
ހުކުރު ދުވަހު ރައީސް އައިސަކް ހެރްޒޮގްގެ އޮފީހުން ބުނީ ހިބްރޫންގެ "ކޭވް އޮފް ޕެޓްރިއާކްސް" ގައި އާދީއްތަ ދުވަހު ރައީސް އުއްބަތި ރޯކުރައްވާނެ ކަމަށެވެ.
ޔަހޫދީން "ކޭވް އޮފް ޕެޓްރިއާކްސް" ގެ ނަން ދީގެން އުޅެނީ އިބްރާހިމީ މިސްކިތަށެވެ. އެހެންވެ، އެއީ މުސްލިމުންނަށް މުހިއްމު ތަނެކެވެ.
ހުޅަނގު އައްސޭރީގައި އޮންނަ އެންމެ ބޮޑު ސިޓީއަކީ ހިބްރޫން އެވެ. އެ ތަނުގައި ފަލަސްތީނުގެ 200،000 މީހުން އުޅޭ އިރު، 1،000 އެއްހާ ޔަހޫދީން ގަވާއިދާ ހިލާފަށް އާބާދުކޮށްފައި ވެ އެވެ.
ހިބްރޫންގައި ޔަހޫދީން ދިރިއުޅެނީ އިޒްރޭލް ސިފައިންގެ ހިމާޔަތް ހޯދައިގެންނެވެ. އިޒްރޭލުން ހުޅަނގު އައްސޭރި ވެރިކޮށްގެން އުޅުނު ނަމަވެސް ބައިނަލްއަގްވާމީ މުޖުތަމައިން އެކަން ބަލައި ނުގަނެ އެވެ.
ހަމާސް އިން ހުކުރު ދުވަހު ނެރުނު ބަޔާނެއްގައި އިސް އޮފިޝަލް އިސްމާއިލް ރަދްވާން ވިދާޅުވީ "އިޒްރޭލުގެ މި ހަމަލާގެ ޒިންމާ އުފުލަން ޖެހޭނީ އަޅުވެތިކޮށްގެން އުޅޭ ސަރުކާރު" ކަމަށެވެ.
"މިސްކިތުގައި އުއްބަތި ރޯކުރުމަކީ ގަސްތުގައި ފަލަސްތީނު ރައްޔިތުން ރުޅި އެރުވުމަށް މިސްކިތުގެ ހުރުމަތް ކަނޑާލުމުގެ އަމަލެއް" ކަމަށް އޭނާ ސިފަކުރެއްވި އެވެ.
ހިބްރޫންގައި ވަރަށް ގިނައިން ހަމަނުޖެހުން ހިނގަ އެވެ. އިބްރާހިމްގެފާނު ފަސްދާނުލާފައިވާ ކަމަށް ބެލެވޭ އިބްރާހިމީ މިސްކިތް ކައިރި އަކީ އެންމެ ގިނައިން ހަމަނުޖެހުން ހިނގާ އެއް ސަރަހައްދެވެ.
ނަވާރަ ސަތޭކަ ނުވަދިހަ ހަތަރު ވަނަ އަހަރު ބަރުޗް ގޯލްޑްސްޓެއިން ނަމަކަށް ކިޔާ ޔަހޫދީއަކު މިސްކިތް ތެރޭގައި ބަޑި ޖަހައި 29 މުސްލިމުން މަރާލި އެވެ. އެއާއެކު މިސްކިތުގައި ސަލާމަތުން ތިބި މީހުން ވަނީ އޭނާ ހިފަހައްޓައި ގަނެ، އަނިޔާކޮށް މަރާލާފަ އެވެ.
