ހޮނިއަރާ، ސޮލޮމޮން އައިލެންޑްސް (ނޮވެމްބަރު 25) - ޕެސިފިކް ކަނޑުގައި އޮންނަ ސޮލޮމޮން އައިލެންޑްސްގައި ހަމަނުޖެހުން ހިނގާތާ ދެ ދުވަސްވެފައި ވަނިކޮށް ސުލްހަ ބަލަހައްޓައިން އޮސްޓްރޭލިއާ ސިފައިންނާއި ފުލުހުން ފޮނުވައިފި އެވެ.
ބޮޑު ވަޒީރު ސްކޮޓް މޮރިސް ސޮލޮމޮން އައިލެންޑްސް އަށް ސިފައިން ފޮނުވަން ނިންމެވީ އެ ގައުމުގެ ބޮޑު ވަޒީރު މަނަސޭ ސޮގަވަރޭގެ އެދިވަޑައިގެންނެވުމަށެވެ. ސޮލޮމޮން އައިލެންޑްސްގައި ހަމަނުޖެހުން އުފައްދަމުންދާ މީހުން ގޮވަނީ ބޮޑު ވަޒީރުގެ އިސްތިއުފާ އަށެވެ.
ބުރާސްފަތި ދުވަހު ސަރުކާރުން ލޮކްޑައުން އަމުރު ނެރުނު ނަމަވެސް، އެތައް ހާސް ބަޔަކު ވަނީ މަގުތަކަށް ނުކުމެ ވެރިރަށް ހޮނިއަރާގެ އިމާރާތްތަކުގައި ހުޅުޖަހާފަ އެވެ. ބުދަ ދުވަހު ހިނގި ހަމަނުޖެހުންތަކުގައި އާއްމުން ވަނީ ޕާލިމެންޓުގެ ތެރެއަށް ވަންނަން މަސައްކަތްކޮށްފަ އެވެ.
އޮސްޓްރޭލިއާ އިން ފޮނުވި ސިފައިން ސޮލޮމޮން އައިލެންޑްސްގައި ތިބޭނީ ހަފުތާތަކެއް ވަންދެން ކަމަށް މޮރިސް ވިދާޅުވި އެވެ. ނަމަވެސް މީގެ ކުރިން 2003 ވަނަ އަހަރު އޮސްޓްރޭލިއާ ސިފައިން އެ ގައުމަށް ދިޔުމަށް ފަހު ފޭބީ 14 އަހަރު ފަހުން 2017 ގަ އެވެ.
"އޮސްޓްރޭލިއާ ސަރުކާރުގެ ވިސްނުމެއް ނޫން އެއީ ދާހިލީ ކަންކަމަށް ނުފޫޒު ފޯރުވުން. އެކަން ހައްލު ކުރަން ޖެހޭނީ އެ މީހުން އަމިއްލަ އަށް. އަޅުގަނޑުމެންގެ ބޭނުމަކީ ސުލްހަ އާއި ރައްކާތެރިކަން ޔަގީންކޮށްދިނުން،" މޮރިސަން ވިދާޅުވި އެވެ.
މޮރިސަން ވިދާޅުވީ ސުލްހަ ބެލެހެއްޓުމަށް ފޮނުވާ ސިފައިންނާއި ފުލުހުންގެ އަދަދު 100 އަށް ވުރެ މަތިވާނެ ކަމަށެވެ.
މިހާރު ސޮލޮމޮން އައިލެންޑްސްގައި ހިނގާ ހަމަނުޖެހުމުގައި އެންމެ ބޮޑު ގެއްލުމެއް ވަނީ ޗައިނާގެ ވިޔަފާރިތަކަށެވެ. ސޮގަވަރޭ އަކީ ޗައިނާ އަށް ތާއީދުކުރައްވާ ލީޑަރަކަށް ވާއިރު، ޗައިނާ އެމްބަސީން ވަނީ ހަމަނުޖެހުންތަކާ މެދު ކަންބޮޑުވުން ފާޅުކޮށްފަ އެވެ.
ސޮގަވަރޭ ތަކުރާރުކޮށް ވިދާޅުވަމުން ދަނީ 660،000 މީހުންގެ އާބާދީއެއް އޮންނަ ސޮލޮމޮން އައިލެންޑްސްގެ ކޮންޓްރޯލް އަދިވެސް ސަރުކާރުގެ އަތުގައި އެބަ އޮތް ކަމަށެވެ.
