އެމެރިކާގެ މިޒޫރީ ސްޓޭޓުގައި ކަޅު ނަސްލުގެ މީހަކު ޖަލުގައި 43 އަހަރު ހޭދަކުރި ފަހުން އޭނާގެ ކުށެއް ނެތް ކަމަށް ނިންމައިފި އެވެ.
މިހާރު އުމުރުން 62 އަހަރުގެ ކެވިން ސްޓްރިކްލޭންޑުގެ މައްޗަށް ތިން މީހުން މެރިކަމަށް ސާބިތުވީ 1979 ވަނަ އަހަރު އެވެ. އޭނާ އަށް ހުކުމް ކުރީ އުމުރަށް ޖަލަށެވެ.
ނަމަވެސް މި ހަފުތާގައި ފަނޑިޔާރު ޖޭމްސް ވެލްޝް ނިންމެވީ ސްޓްރިކްލޭންޑުގެ ކުށެއް ނެތް ކަމަށާއި އޭނާ ވަގުތުން މިނިވަން ކުރަން ޖެހޭނެ ކަމަށެވެ.
"އަޅުގަނޑު ކޮންމެހެން ރުޅިއެއް ނާދޭ. އެކަމަކު އެހެން އެކަކަށް ވެސް ނޭނގޭ ފަދަ އިހުސާސްތަކެއް އުފެދިއްޖެ،" މިޒޫރީ ކަރެކްޝަނަލް ސެންޓާ ޖަލުން ނުކުމެ، ސްޓްރިކްލޭންޑް ނޫސްވެރިންނަށް ބުންޏެވެ.
"އުފަލާއި، ހިތާމަ އާއި ބިރު. އަޅުގަނޑު މި މަސައްކަތް ކުރަނީ އެ ހުރިހާ އިހުސާސެއް ރަނގަޅަށް ފަހުމްކުރަން."
ސުވާލު އުފެދޭ ހެކި
ސްޓްރިކްލޭންޑުގެ މައްޗަށް ތުހުމަތު ކުރި މަރުތައް ހިނގި އިރު އޭނާގެ އުމުރުން 18 އަހަރެވެ. އޭނާއާ ދެކޮޅަށް ހުރި ހެކިތައް ލިބުނީ މަރުގެ ހަމަލާ އިން ސަލާމަތްވި ސިންތިއާ ޑަގްލަސް ދިން ބަޔާނުންނެވެ.
ޑަގްލަސް ކޯޓުގައި ފުރަތަމަ ބުނީ ސްޓްރިކްލޭންޑް ހަމަލާ ދިން މަންޒަރު ފެނުނު ކަމަށެވެ. ނަމަވެސް ފަހުން ބުނެފައި ވަނީ އެގޮތަށް ހެކިބަސް ދިނީ ފުލުހުންގެ ޕްރެޝަރާ ހެދި ކަމަށެވެ.
މަރުގެ ހާދިސާ ހިނގި ވަގުތު ޑަގްލަސް ހުރީ އެހެން ތަނެއްގައި ކަން އޭނާ ސާބިތުކޮށްދިން އަދި އޭނާއާ މަރުގެ ސީންއާ ގުޅޭ އެއްވެސް ހެއްކެއް ފެނިފައެއް ނުވޭ.
ޑަގްލަސް ވަނީ އެ މައްސަލަ އަށް ސަމާލުކަން ހޯދަން ގިނަ މަސައްކަތްތަކެއް މެދުނުކެނޑި ކޮށްފަ އެވެ. ނަމަވެސް 2015 ވަނަ އަހަރު އޭނާ މަރުވި އެވެ.
އެ މަރުތަކާ ގުޅިގެން ކުށް ސާބިތުވި އިތުރު ދެ ފިރިހެނުން ވެސް ބުނެފައި ވަނީ އެކަމުގައި ސްޓްރިކްލޭންޑުގެ އެއްވެސް ބައިވެރިވުމެއް ނުވާ ކަމަށެވެ. އޭގެ ބަދަލުގައި އެ މީހުން ދެއްކީ އެހެން ދެ ފިރިހެނުންގެ ވާހަކަ އެވެ. ނަމަވެސް އެ މީހުންނަށް ދައުވާ އުފުލާފައެއް ނުވެ އެވެ.
ސްޓްރިކްލޭންޑުގެ ފުރަތަމަ ޝަރީއަތުގައި ޖޫރީ ޓީމުގައި ހިމެނޭ ކަޅު ނަސްލުގެ ހަމައެކަނި މެމްބަރު އޭނާގެ ކުށެއް ނެތް ކަމަށް ބުންޏެވެ. ނަމަވެސް ދެ ވަނަ ޝަރީއަތުގެ ހުސް ދޮން ނަސްލުގެ ޖޫރީ މެމްބަރުންނާ އެކު ކުށް ސާބިތުވާ ކަމަށް ނިންމި އެވެ.
