ވ. އާރަށް ވިއްކާލައިގެން ލިބުނު ފައިސާ ލޯންޑަރކުރިކަމަށް ތުހުމަތު ކުރެވޭ މައްސަލާގައި ކުރީގެ ރައީސް އަބްދުﷲ ޔާމީންގެ މައްޗަށް މަނީލޯންޑްރިންގެ ދައުވާ އުފުލައިފި އެވެ.
ޕްރޮސިކިއުޓާ ޖެނަރަލްގެ އޮފީހުން ޔަގީންކޮށް ދިން ގޮތުގައި މިއަދު ވަނީ ޔާމީންގެ މައްސަލަ ކުރިމިނަލް ކޯޓަށް ހުށަހަޅާފަ އެވެ. ޔާމީންގެ މައްޗަށް އުފުލާފައިވަނީ މަނީލޯންޑްރިންގެ ދައުވާގެ އިތުރުން ރިޝްވަތު ހިފުމުގެ ދައުވާ އެވެ.
އާރަށު މައްސަލާގައި ޔާމީންގެ މައްޗަށް ތަހުގީގު ހިންގީ ފުލުހުންނެވެ.
ފުލުހުން ތުހުމަތުކޮށްފައިވާ ގޮތުގައި ރިސޯޓެއް ގޮތަށް ތަރައްގީ ކުރުމަށްޓަކައި އާރަށް ބޭރު ބަޔަކަށް ވިއްކައިގެން ލިބުނު އެއް މިލިއަން ޑޮލަރު (15.3 މިލިއަން ރުފިޔާ) ޔާމީންގެ ބޭންކު އެކައުންޓަކަށް ޖަމާކޮށްފައިވެ އެވެ.
ޔާމީންގެ އިތުރުން މި މައްސަލާގައި ވ.ފެލިދޫ ހަނދުވަރީގެ ޔޫސުފް ނައީމްގެ މައްޗަށް ވެސް ވަނީ ދައުވާ އުފުލާފަ އެވެ. އޭނާގެ މައްޗަށް އުފުލީ ރިޝްވަތު ދިން ކަމުގެ ދައުވާ އެވެ.
ފަސް އަހަރު ވެރިކަން ކުރެއްވި ޔާމީންގެ މައްޗަށް މިހާރު ވެސް ވަނީ މަނީލޯންޑްރިންގެ ކުށް ސާބިތުވެފަ އެވެ. ގއ. ވޮޑުމުލާ ކުއްޔަށް ދޫކޮށްގެން ލިބުނު ފައިސާ އަމިއްލަ އެކައުންޓަށް ޖަމާކޮށް, އެ ފައިސާއިން މަންފާ ހޯދި ކަމުގެ ކުށް ސާބިތުވެފައިވާ މި މައްސަލާގައި ސުޕްރީމް ކޯޓުގައި ދެން އޮތީ ހުކުމް އިއްވުމެވެ.
ވޮޑުމުލާ މައްސަލާގައި ކުރިމިނަލް ކޯޓުން ހުކުމް ކޮށްފައިވަނީ ޔާމީން ފަސް އަހަރަށް ޖަލަށްލުމަށާއި ފަސް މިލިއަން ޑޮލަރުން ޖޫރިމަނާކުރުމަށެވެ. މި ވަގުތު ޔާމީން ގޭބަންދުގައި ހުންނެވިއިރު ހުކުމްގައި ކަނޑައަޅާފައިވާ ޖޫރިމަނާގެ ފައިސާ އަދި ދައްކަވާފައެއް ނުވެ އެވެ.
މީގެއިތުރުން ރ. ފުއްގިރި މައްސަލައިގައި ވެސް ޔާމީންގެ މައްޗަށް މަނީ ލޯންޑްރިން އާއި ރިޝްވަތު ގަބޫލުކުރުމުގެ ދައުވާ އުފުލައި, ކުރިމިނަލް ކޯޓުގައި ޝަރީއަތް މިހާރު ކުރިއަށްދެ އެވެ.
ފުއްގިރި މައްސަލާގައި ދައުލަތުން ޔާމީންގެ މައްޗަށް ތުހުމަތުކުރާ ގޮތުގައި ފުއްގިރި، ކްލެސިކް ސިޓީ އައިލެންޑް ހޯލްޑިންގްސްއަށް ކުއްޔަށް ދޫކުރުމުގައި އަހުމަދު ކްރިކް ރިޒާ މެދުވެރިކޮށް 2015 ވަނަ އަހަރު، 1.3 މިލިއަން ޑޮލަރު ރިޝްވަތުގެ ގޮތުގައި އެމަނިކުފާނު ވަނީ ގަބޫލުކޮށްފަ އެވެ. އަދި އެ ފައިސާގެ ތެރެއިން 1.1 މިލިއަން ޑޮލަރު ސަންގެ ދެ ކުންފުންޏެއް މެދުވެރިކޮށް ޔާމީންގެ ބޭންކް އެކައުންޓަކަށް ޖަމާކޮށް، ރިޝްވަތު ގަބޫލުކޮށްފައިވާ ކަމަށެވެ.
ޔާމީންގެ ނަމުގައި އޮތް އިސްލާމިކް ބޭންކްގެ ސޭވިން އެކައުންޓަކަށް އެ ފައިސާ ޖަމާކުރުމަށް ފަހު، ޖެނަރަލް އިންވެސްޓްމެންޓް އެކައުންޓަކަށް ޖަމާކޮށް މަންފާ ހޯދައި، އެ ފައިސާ ލޯންޑާކޮށްފައިވާ ކަމަށް ވެސް ތުހުމަތުކުރެ އެވެ.
