ލަންޑަން (ނޮވެމްބަރު 24) - ޔުއެފާ ޗެމްޕިއަންސް ލީގުގައި ރޭ ޔުވެންޓަސް އަތުން 4-0 އިން މޮޅުވެ، އެންމެ ފަހުގެ ޗެމްޕިއަން ޗެލްސީން މުބާރާތުގެ ގަދަ 16 ޓީމު ވާދަކުރާ ބުރުގެ ޖާގަ ޔަގީންކުރިއިރު، އެ ބުރުުން ފުރުސަތު ހޯދަން ސްޕެއިނުގެ ގަދަބާރު ބާސެލޯނާ އަށް ޕްރެޝަރު ބޮޑުވެއްޖެ އެވެ.
ޒަވީ ހެނާންޑޭޒްގެ ކޯޗުކަމުގައި ބާސެލޯނާ އިން ޗެމްޕިއަންސް ލީގުގައި ކުޅުނު ފުރަތަމަ މެޗުގައި ރޭ އަމިއްލަ ދަނޑުގައި ވަނީ ޕޯޗުގަލްގެ ބެންފީކާއާ 0-0 އިން އެއްވަރުވެފަ އެވެ. ބާސެލޯނާ އަށް ގަދަ 16 ޓީމުގެ ބުރުން ފުރުސަތު ލިބޭނީ ގްރޫޕްގެ ފަހު މެޗުން ރަށުންބޭރުގައި ބަޔާން މިއުނިކްގެ މައްޗަށް ނަތީޖާއެއް ނެރެގެންނެވެ. ބަޔާން ވަނީ މި ފަަހަރު ޗެމްޕިއަންސް ލީގުގައި ކުޅުނު ފަސް މެޗުން ވެސް މޮޅުވެފަ އެވެ.
ރޭ ބާސެލޯނާ މޮޅުކޮށްދޭން އެ ޓީމުގެ ޔޫސުފް ޑެމީރް ޖެހި ބޯޅައެއް ވަނީ ގޯލުގެ ހުރަސްދަނޑިއަށް އަމާޒުވެފަ އެވެ. އެ ޓީމުގެ މެމްފިސް ޑިޕާއި ފޮނުވާލި ދެތިން ހަމަލާއެއް ދިޔައީ ގޯލާ ސީދާނުވެ އެވެ.
ކޮންމެ ޓީމަކަށް ވެސް ބާކީ އެއް މެޗު އޮތްއިރު، ގްރޫޕް އީގެ އެއް ވަނައިގައި ބަޔާން އޮތީ 15 ޕޮއިންޓާ އެކު އެވެ. ދެ ވަނައިގައި ބާސެލޯނާ އޮތީ ހަތް ޕޮއިންޓާ އެކު އެވެ. ބެންފީކާ އަށް ފަސް ޕޮއިންޓް ލިބިފައިވާއިރު، ޑިނަމޯ ކިއޭވް ފުލުގައި އޮތީ އެއް ޕޮއިންޓް ހޯދައިގެންނެވެ.
އަމިއްލަ ދަނޑުގައި ކުޅުނު ޗެލްސީން ރޭ ޔުވެންޓަސްގެ މައްޗަށް ބޮޑު މޮޅެއް ހޯދީ ތަފާތު މޮޅަށް ކުޅެގެންނެވެ. ފުރަތަމަ ހާފުގައި ޗެލްސީ އަށް ލީޑުނަގައިދިނީ އެންޓޯނިއޯ ރޫޑިގާ ދިން ބޯޅައަކުން ޒުވާން ޑިފެންޑަރު ޓްރެވޯ ޗަލޯބާ އެވެ. ދެ ވަނަ ހާފު ފެށިގެން މާގިނައިރެއް ނުވެ ޗެލްސީން އިތުރު ދެ ގޯލު ޖެހީ ގާތްގާތުގަ އެވެ. މެޗުގެ 55 ވަނަ މިނިޓްގައި ރީސް ޖޭމްސް ޗެލްސީގެ ދެ ވަނަ ގޯލު ޖެހިތާ ތިން މިނިޓް ފަހުން ކަލުމް ހަޑްސަން އޮޑޯއި ވަނީ އެ ޓީމުގެ ތިން ވަނަ ގޯލު ޖަހައިފަ އެވެ.
މެޗުގެ އިތުރު ވަގުތުގައި ޗެލްސީގެ ފަހު ގޯލު ޖެހީ އަނިޔާ އަށް ފަހު ދާދި ފަހުން އެނބުރި އައި ޖަރުމަނުގެ ފޯވާޑް ޓިމޯ ވާނާ އެވެ.
މި މޮޅާ އެކު ގްރޫޕް އެޗްގެ އެއް ވަނައިގައި އޮތް ޗެލްސީ އާއި ދެ ވަނައިގައި އޮތް ޔުވެންޓަސް އަށް ވަނީ ފަސް މެޗުން 12 ޕޮއިންޓް ލިބިފަ އެވެ. ތިން ވަނައިގައި އޮތީ ފަސް މެޗުން ހަތަރު ޕޮއިންޓް ހޯދި ރަޝިއާގެ ޒެނިޓް ޕީޓާސްބާގް އެވެ. އެންމެ ފުލުގައި އޮތް ސްވިޑެންގެ މަލްމޯ އަށް ލިބިފައިވަނީ ފަސް މެޗުން އެއް ޕޮއިންޓެވެ.
ގްރޫޕް ޖީގައި ރޭ ފްރާންސްގެ ޗެމްޕިއަން ލިލް އިން ވަނީ 1-0 އިން އޮސްޓްރިއާގެ ސަލްޒްބާގް ބަލިކޮށްފަ އަދި ސްޕެއިނުގެ ސެވިއްޔާ އިން ވަނީ 2-0 އިން ޖަރުމަނުގެ ވުލްފްސްބާގްގެ މައްޗަށް ކުރިހޯދައިފަ އެވެ. މި ގްރޫޕްގެ އެއް ވަނައިގައި ލިލް އޮތީ އަށް ޕޮއިންޓާ އެކު އެވެ. ދެ ވަނައިގައި އޮތް ސަލްޒްބާގުގެ ހަތް ޕޮއިންޓް އޮތްއިރު، ތިން ވަނައިގައި ސެވިއްޔާ އޮތީ ހަ ޕޮއިންޓާ އެކު އެވެ. ފުލުގައި އޮތް ވުލްފްސްބާގަށް ވަނީ ފަސް ޕޮއިންޓް ލިބިފަ އެވެ.
