ސ. އަތޮޅު މަދަރުސާގައި ކިޔަވައިދޭ ބިދޭސީ ޓީޗަރަކު ކަލަކު ވޮޑިގެން ނުވާ ކަމަށް ބުނެ ކީރިތި ގުރުއާން ވެސް ދޮގުކޮށް ދީނާ ހިލާފު ވާހަކަތަކެއް ދަރިވަރުންނަށް ކިޔައިދިން މައްސަލައެއް ފެންމަތިވެއްޖެ އެވެ.
މައުލޫމާތު ލިބިފައިވާ ގޮތުގައި، އައްޑޫ ސިޓީ، ހުޅުމީދޫގައި ހުންނަ ސ. އަތޮޅު މަދަރުސާގެ ގްރޭޑް އަށަކަށް ކިޔަވައިދޭ އިންޑިއާ ޓީޗަރު ވަނީ މާތްﷲ އަކީ ހަގީގަތެއް ނޫން ކަމަށް ދަރިވަރުން ގާތު ބުނެފަ އެވެ.
އަދި ކީރިތި ގުރުއާނަކީ އިންސާނުން ލިޔެފައިވާ "ވާހަކަ"ތަކެއް ކަމަށާއި ކަލަކު ވޮޑިގެން ވާކަމަށް ގަބޫލުކުރަނީ މުސްލިމުންގެ ސިކުނޑި ދޮވެލައިގެން ކަމަށް އެ ޓީޗަރު ބުނި ކަމަށްވެ އެވެ.
އެކަމާ ގުޅިގެން އެޑިޔުކޭޝަން މިނިސްޓްރީން ބުނީ ދަރިވަރެއްގެ ފަރާތުން އެފަދަ ޝަކުވާއެއް ހުށަހެޅިގެން އެ މައްސަލަ އެ ސްކޫލުން ބަލަމުން އަންނަ ކަމަށެވެ.
އެކަން މިނިސްޓްރީއަށް ވެސް އިއްޔެ ރިޕޯޓުކޮށްފައިވާއިރު، ސްކޫލުން ހިންގާ ތަހުގީގަށްފަހު ރިޕޯޓެއް ފޮނުވާނެކަމަށް ބުންޏެވެ.
"އެއަށްފަހު މައްސަލައާ ގުޅޭ ފިޔަވަޅެއް އަޅާނެ،" މިނިސްޓްރީން އިތުރަށް ބުންޏެވެ.
ރާއްޖޭގައި ދީނީ ހަރުކަށި ފިކުރު ފެތުރުން ހުއްޓުވަން، ސްކޫލްތަކުގައި ދީން ކިޔަވައިދޭ ގޮތް ބަދަލުކުރަން އުޅޭކަމުގެ ތުހުމަތު ދޭތެރެ ދޭތެރެއިން ކުރެވެ އެވެ.
މިގޮތުން، އިސްލާމް މާއްދާ ކިޔަވައިދޭން ރާއްޖޭން ބޭރުން ޓީޗަރުން ގެނެސް، އެއީ އިނގިރޭސި ބަހުން ކިޔަވައިދޭ މާއްދާއަކަށް ހަދަން އުޅޭ ކަމުގެ ވާހަކައެއް މިފަހުން ފެތުރުނެވެ.
ނަމަވެސް، އެޑިއުކޭޝަން މިނިސްޓްރީން ވަނީ އެކަން ދޮގުކޮށްފަ އެވެ.
