ބާސެލޯނާ (ނޮވެމްބަރު 23) - ބާސެލޯނާ މިހާރު އޮތް ހާލަތު ބަދަލުކުރަން އެންމެ ރަނގަޅު ކޯޗަކީ ދާދި ފަހުން އެ ޓީމާ ހަވާލުވި ކޯޗު ޒަވީ ހެނާންޑޭޒް ކަމަށް ބާސެލޯނާގެ ކުރީގެ ކެޕްޓަން ލިއޮނަލް މެސީ ބުނެފި އެވެ.
ޒަވީ ހަވާލުވި ފަހުން ބާސެލޯނާ ކުޅުނު ހަމައެކަނި މެޗުން ވަނީ އެސްޕަންޔޯލް އަތުން 1-0 އިން މޮޅުވެފަ އެވެ. ބާސެލޯނާގައި ޒަވީ ކޯޗަކަށް ހުރެ، މިވީ މަދު ދުވަސްކޮޅުގެ ތެރޭގައި ވެސް އެ ކްލަބްގެ ގިނަ ކަންކަން ވަނީ ބަދަލުކޮށްފަ އެވެ.
އެކާވީސް އަހަރު ބާސެލޯނާގައި ހޭދަކުރުމަށް ފަހު މެސީ، މި ސީޒަން ފެއްޓުމުގެ ކުރިން އެ ޓީމު ދޫކޮށްލަން ޖެހުނީ މަޖުބޫރީ ހާލަތެއްގައި ކްލަބް މާލީ ގޮތުން އޮތް އަޑިގަނޑުގެ ތެރެއިން ކޮންޓްރެކްޓް އާ ކުރެވޭނެ ގޮތެއް ނެތިގެންނެވެ. މެސީ ވަނީ ޕީއެސްޖީއާ އެކު 2023 ވަނަ އަހަރުގެ ނިޔަލަށް ކޮންޓްރެކްޓް ހެދި ފަހުން ވެސް މުސްތަގުބަލުގައި ކޮންމެވެސް ސިފައެއްގައި ބާސެލޯނާ އަށް ހިދުމަތް ކޮށްދޭން އަންނާނެ ކަމަށް ބުނެފަ އެވެ.
ޒަވީ ބާސެލޯނާއާ ހަވާލުވި ފަހުން މެސީ އެ ކްލަބާ ބެހޭގޮތުން މީޑިއާގައި ވާހަކަ ދެެއްކި ފުރަތަމަ ފަހަރު ވެސް ވަނީ ޒަވީ އަށް ތައުރީފުކޮށްފަ އެވެ.
"ޒަވީ އަށް އެ ކްލަބް އެނގޭނެ. ޒަވީ އަކީ ފުޓްބޯޅައިގެ ވިސްނުންތޫނު މީހެއް. ބާސެލޯނާ މިހާރު އޮތް ހާލަތުން އަރައިގަނެ އެ ޓީމު ހަމަމަގަށް އެޅުވޭނެ ގާބިލުކުރަން ޒަވީގެ އެބަހުރި،" މެސީ ބުންޏެވެ.
ބާސެލޯނާގައި ޒަވީ މިހާތަނަށް ކޮށްފައިވާ މަަސައްކަތްތަކަށް ބަލާއިރު، ޑިސިޕްލިން ހިފަހައްޓައި ރަނގަޅު ޓީމު ރޫހެއް އޮތް ކްލަބަކަށް ބާސެލޯނާ ހެދުމުގެ މަސައްކަތުގެ ތެރެއިން ޒަވީ ވަނީ ބޮޑެތި ބަދަލުތަކެއް ގެނެސްފަ އެވެ.
އޭގެ ތެރޭގައި ކުޅުންތެރިން ސޯޝަލް މީޑިއާ ބޭނުންކުރުމާއި މީޑިއާ ޝޯތަކާއި އިންޓަވިއުތައް ދިނުން ވަކި އުސޫލެއްގެ ތެރެއިން ކުރިއަށްދާ ގޮތަށް ހެދުމާއި ޓްރެއިނިން އަށް ގަޑި ނުޖެހި އައުމާއި ކުޅުންތެރިންގެ ނިއުޓްރިޝަން ޕްލޭނަށް ގަވާއިދުން ފާރަވެރިވުން ހިމެނެ އެވެ.
މި ފަހަރުގެ ޗެމްޕިއަންސް ލީގުގެ ފޭވަރިޓަކީ ޕީއެސްޖީ ކަމަށް ބުނާތީ މެސީ ވަނީ އެ ސުވާލުތަކަށް ޖަވާބެއް ދީފަ އެވެ.
މެސީ ބުނީ ޕީއެސްޖީގައި ތިބި ތަރިންނަށް ބަލާއިރު، އެ ޓީމުގެ ގައިގައި ފޭވަރިޓުންގެ ޓެގް އަޅުވަން ވަރަށް ފަސޭހަވާނެ ކަމަށެވެ. އެކަމަކު، ހަމައެކަނި ޕީއެސްޖީ އަކީ ފޭވަރިޓުންގެ ގޮތުގައި ބަލައިފިނަމަ އެއީ އެންމެ ރަނގަޅު ގޮތެއް ނޫން ކަމަށް މެސީ ވަނީ ބުނެފަ އެވެ.
