މެންޗެސްޓާ (ނޮވެމްބަރު 23) - ހުސްވެފައިވާ މެންޗެސްޓާ ޔުނައިޓެޑްގެ ކޯޗުގެ މަގާމަށް ޕީއެސްޖީގައި ހުރި އާޖެންޓީނާގެ ކޯޗު މައުރީސިއޯ ޕޮޗެޓީނޯ ޝައުގުވެރިވާ ކަމަށް ރިޕޯޓްތައް ބުނެފި އެވެ.
ޔުނައިޓެޑްގެ ކޯޗުގެ މަގާމު ހުސްވީ އެންމެ ފަހުން ވަޓްފޯޑް އަތުން 4-1 އިން ބަލިވި މެޗަށް ފަހު އެ ޓީމުގެ ކޯޗަކަށް ހުރި އޮލެ ގުނަ ސޯލްޝެއާ މަގާމުން ދުރުކުރުމުންނެވެ. ޔުނައިޓެޑުން ހޯދަން މަސައްކަތްކުރާ ކޯޗުންގެ ތެރޭގައި ކުރިން ސައުތެމްޓަނާއި ޓޮޓެންހަމަށް ކޯޗުކޮށްދިން ޕޮޗެޓީނޯ އަކީ އެންމެ ކުރީގައި އޮތް ނަމެވެ.
ޔުނައިޓެޑްގެ ކޯޗުކަމުން 2018 ވަނަ އަހަރު ހޯސޭ މޮރީނިއޯ ވަކިކުރިއިރު، ވަގުތީ ކޯޗަކަށް ސޯލްޝެއާ ގެނައީ ދާއިމީ ކޮންޓްރެކްޓެއްގައި ޕޮޗެޓީނޯ ގެންނަން މަސައްކަތް ކުރަމުން ދިޔަ ދަނޑިވަޅެއްގަ އެވެ.
އޭރު، ޕޮޗެޓީނޯ ހުރީ ޓޮޓެންހަމާ ހަވާލުވެ އެވެ. ޔުނައިޓެޑްގެ ވަގުތީ ކޯޗެއްގެ މަގާމުގައި ހުރި މުއްދަތުގައި ސޯލްޝެއާ ކުރި މަސައްކަތް ރަނގަޅުވުމުން ތިން މަސް ތެރޭ އެ ކްލަބުން ބޭނުންވީ ސޯލްޝެއާ އަށް ދާއިމީ ކޮންޓްރެކްޓެއް ދޭށެެވެ. އެ ހިސާބުން ޕޮޗެޓީނޯ ގެންނަ ވާހަކަ މަޑުޖެހުނީ އެވެ.
އޭގެ ހަތަރު ވަރަކަށް އަހަރު ފަހުން ސޯލްޝެއާ ވަކިކޮށް ޔުނައިޓެޑުން އާ ކޯޗެއް ހޯދަން ބަލާއިރު، ޕޮޗެޓީނޯ މި ވަގުތު ހުރީ ގަތަރުގެ މަހުޖަނު ނާސިރު އަލް ހެއްލާފީ ހިންގާ ޕީއެސްޖީގަ އެވެ. ޕީއެސްޖީގައި ޕޮޗެޓީނޯ ހުރީ ދުނިޔޭގެ ފެންވަރުގެ ގިނަ ތަރިން ހިމެނޭ ޓީމެއްގެ ކޯޗަކަށެވެ. މި ވަގުތު ޕީއެސްޖީ އޮތީ ފްރެންްޗް ލީގުގެ އެއް ވަނައިގައި 11 ޕޮއިންޓުގެ ލީޑަކާ އެކު އެވެ. އެ ހުރިހާ ކަމަކާ އެކު ވެސް ޕޮޗެޓީނޯ ހުރީ ޔުނައިޓެޑުން ހުށަހަޅައިފިނަމަ އެ ކަމަށް ވިސްނާށެވެ.
ފްރާންސާއި ދެކުނު އެމެރިކާގެ ބައެއް މީޑިއާތަކުން ރިޕޯޓްކުރާ ގޮތުގައި ޕޮޗެޓީނޯ ޔުނައިޓެޑްގެ ކޯޗުގެ މަގާމަށް އަދިވެސް ޝައުގުވެރިވެ އެވެ. އެއީ ބޮޑު ތާރީހެއް އޮތް ދުނިޔޭގެ ފުޓްބޯޅައިގެ ބޮޑު ކްލަބަކަށް ކޯޗުކޮށްދޭން ލިބޭ ފުރުސަތު ދެ ފަހަރެއްގެ މަތިން ގެއްލެން ބޭނުންނުވާތީ އެވެ.
ޔުނައިޓެޑްގެ ކޯޗަކަށް ވަގުތީ ގޮތުން ހަމަޖައްސާފައިވަނީ އެސިސްޓަންޓް ކޯޗަކަށް ހުރި މައިކަލް ކެރިކް އެވެ. ދާއިމީ ކޯޗެއް މި ސީޒަނަށް ފަހު ގެނައުމުގެ ވިސްނުމެއް ވެސް ޔުނައިޓެޑުން ގެންގުޅެ އެވެ. އެއީ މި ސީޒަނުގެ ނިޔަލަށް އިންޓަރިމް ކޯޗަކާ ޓީމު ހަވާލުކުރުމަށް ފަހު އެވެ. އިންޓަރިމް ކޯޗަކަށް ޔުނައިޓެޑްގެ ޝޯޓްލިސްޓުގައި ހިމެނޭ އެއް ނަމަކީ އާރްބީ ލައިޕްޒިގުގެ ކުރީގެ ކޯޗު ރާލްފް ރަޖްނިކް އެވެ.
މި ސީޒަނުގައި ސޯލްޝެއާ އަށް ޔުނައިޓެޑްގެ ކޯޗުގެ މަގާމުގެ ޕްރެޝަރު އެންމެ ފުރަތަމަ ބޮޑުވިއިރު، އިޓަލީގެ ކޯޗު އެންޓޯނިއޯ ކޮންޓޭ ހުރީ ހުސްކޮށެވެ. ކޮންޓޭ، ޔުނައިޓެޑާ ހަވާލުވުމުގެ ވާހަކަތައް މީޑިއާގައި ދެކެވުނު ނަމަވެސް އޭނާ އަށް އެ ފުރުސަތު ނުދިނެވެ. އޭގެ ފަހުން ޓޮޓެންހަމް އިން ވަނީ ނޫނޯ އެސްޕިރީޓޯ ސަންޓޯ އެ ޓީމުގެ ކޯޗުގެ މަގާމުން ވަކިކޮށް، ކޮންޓޭއާ ޓީމު ހަވާލުކޮށްފަ އެވެ.
ޔުނައިޓެޑުން އާ ކޯޗެއް ހޯދަން ކުރާ މަސައްކަތުގައި ޒިނެދިން ޒިދާނަށް ފާރަލާ ކަމަށް ވެސް ރިޕޯޓްތައް ބުނެ އެވެ. އެކަމަކު، ޒިދާންގެ އެ ފަދަ އެއްވެސް ޝައުގުވެރިކަމެއް ނެތް ކަމަށް ފްރާންސްގެ ނޫހަކުން ވަނީ ރިޕޯޓްކޮށްފަ އެވެ. ޔުނައިޓެޑްގެ ބައެއް ބޯޑު މެމްބަރުން ޓީމު ހަވާލުކުރަން ދެން ބޭނުންވާ ކޯޗަކީ ލެސްޓާ ސިޓީގެ ކޯޗު ބްރެންޑަން ރޮޖާސްއާ އެވެ. ކުރިން ޔުނައިޓެޑްގެ ވާދަވެރި ލިވަޕޫލަށް ކޯޗުކޮށްދިން ރޮޖާސް ވަނީ ލެސްޓާގައި ހުރީ އުފަލުން ކަމަށް ބުނެފަ އެވެ.
