ދާދި މިދާކަށް ދުވަހު ދިމާވި އަންހެނެކެވެ. ދިވެހިން ސިފަކުރާ ރީތި އަންހެނުންގެ ހުރިހާ ސިފައެއް އޭނާގެ ކިބައިގައި ހުރިކަމަށް ދެންނެވިދާނެ އެވެ. އަޅާފައި ހުރި ހެދުމުން، އޭނާއަށް އޭނާގެ ރީތި ހަށިގަނޑު އިތުރަށް ފާހަގަކުރެވޭ ގޮތަށް އެ ހަށިގަނޑު ޒީނަތްތެރިކުރަން ދަންނަކަން ހާމަވެ އެވެ. ނަޞީބު އޭނާގެ މުށުތެރޭ ގެންގުޅޭ ކަހަލަ އެވެ. އޭނާގެ ނަޒަރު ހުއްޓިފައި ހުރީ ފާރާ ދިމާލަށެވެ. ދަތްދޮޅި ނެރެލައި އިސް އުފުލާލާފައި އިން ގޮތުން "ކަލޭމެން ހުތުރު މީހުންނަށް ވުރެ އަހަރެން ޚާއްޞައޭ" ކިބުރުވެރިކަމާއެކު ބުނާ ފަދަ އެވެ.
މި ކަހަލަ މީހުން އަހަރެން ދަންނަމެވެ. ކުރިން އަހަރެންނަކަށްވެސް އެ ފަދަ މީހުންނާ އެކު އުޅޭކަށް ނޭނގެ އެވެ. އޭނާއަށް ލިބިފައިވާ ބަނިޔާދަންކަން އަހަރެންނަށްވެސް ލިބުނު ނަމައޭ ހީވެ، ހަސަދަވެރިވެ އެވެ. އަދި އޭނާގެ އަމިއްލަ ނަފުސަށް ކުރާ އިތުބާރަކީ، ކިބުރުވެރިކަމާއި ބޮޑާކަން ކަމުގައި ލޭބަލްކޮށްގެން އަހަރެންގެ ހަސަދަވެރި ހިތަށް ތަސައްލީ ހޯދީމެވެ. ވަޒީފާއަކަށް ކުރިމަތިލިޔަސް، ހަމައެކަނި ސިފައަށް ބަލާލާފައި އޭނާއަށް ވަޒީފާ ލިބޭނެކަމަށް ބެލީމެވެ. އެފަދަ މާހައުލުތަކުގައި އޭނާގެ ރީތިކަމުގެ ނާޖާއިޒު ފައިދާ ޚުދު އޭނާ ނަގާނޭކަމަށް ބެލީމެވެ. އޭނާއަށް ލިބޭ ކޮންމެ ކާމިޔާބީއަކީ، އޭނާގެ ރީތި ސިފައިގެ ސަބަބުން ލިބޭ ކާމިޔާބީއެއްކަމިގައި އަހަރެން ކަނޑައެޅީމެވެ.
އެކަމަކު މިއީ އިންސާފެއް ނޫނެވެ. ސްކޫލާއި ވަޒީފާ އަދި ޒާތީ ކަންކަމުގައިވެސް، ރީތި ސިފައެއް ލިބިފައި ވުމުން ލިބޭ ފައިދާތަކެއް ހުންނާނެ އެވެ. އެހެން ނަމަވެސް އެ ފައިދާތަކާ އެކުއެކީ، އޭނާ ކުރިމަތިލާންޖެހޭ ތަފާތުކުރުންތަކެއްވެސް ހުންނާނޭކަން އަހަރެމެން ބަލައިގަންނަން ޖެހެ އެވެ. އަހަރެމެން އެންމެންވެސް، ކާމިޔާބީއަށް ވާޞިލުވުމަށް ކުރާ މަސައްކަތްތަކުގައި އަހަރެމެންނަށް ލިބިފައިވާ ހުނަރުތައް ބޭނުންކުރަނީ އިތުރު ބާރެއްދޭ ވަޞީލަތެއްގެ ގޮތުގަ އެވެ. އެހެންކަމުން، އޭނާއަށް ލިބިފައިވާ "ވަޞީލަތެއް" ބޭނުންކުރުމުން އަހަރެމެން ކަންބޮޑުވާންވީ ކީއްވެގެން ހެއްޔެވެ؟ މިގޮތަށް އަހަރެމެންނަށް ވިސްނޭނަމަ، މިއީ ގޯހެކެވެ. ސްޓީރިއޯޓައިޕިން އެވެ.
މީގައި އަހަރެމެންގެ މައްސަލައަކީ، ރީތި ސިފައެއް ލިބިފައިވާ މީހެއްގެ މުޅި ޝަޚުޞިއްޔަތަކީ އެއީ ކަމުގައި ކުރެވޭ ކުށްހީ އެވެ. އެމީހާއަކީ ކާކުކަން ދެނެގަންނަނަށް މަސައްކަތެއްވެސް ކުރުމަކާ ނުލައި، އޭނާއާ މެދު ނިންމާނިންމުންތަކެވެ. އެ ފެންނަ "ބޮޑާކަމަކީ" ކޮންމެ ފަހަރަކު ބޮޑާކަމެއް ނޫނެވެ. އަދި ކިއެއްތަ، އަހަރެމެން ފަދަ މީހުން ގެންގުޅޭ ތަޢައްޞަބުތަކުން ރައްކާތެރިވުމަށް ދިއްކޮށްލާ އައްޑަނައެކެވެ. މީހުން އޭނާ ދައްކޮށްލާ ދަށްކޮލުމުން ރައްކާތެރިވުމަށެވެ. މީހުން ކުރާ ފުރައްސާރައިން ސަލާމަތްވުމަށެވެ. މީހުންގެ ހަސަދަވެރި ނަޒަރުން ރެކުމަށެވެ.
އެއީވެސް އަހަރެމެންފަދަ މީހުންނެވެ. އޭނާއަކީ އޭނާގެ ސިފައެއް ނޫނެވެ. އޭނާއަކީވެސް އެތައް މައިދާނެއްގައި، އެތައް "ތޮތްޕެއް އަޅައިގެން" ދިރިއުޅުން ވެއަތުކުރަމުންދާ މީހުންކަން ޔަޤީނެވެ. އެހެން މީހުންނެކޭ އެއްފަދައިން އެ މީހުންވެސް އަގުކުރާށެވެ. އެއް ނާޅިއަކުން މިނާށެވެ. އެ ފަދަ މީހުން ފެނުމުން އެ މީހުންނަކީ ބޮޑާ މީހުން ކަމުގައި ކަނޑަނާޅާށެވެ. އޭނާ އެ ދިއްކޮށްފައިވާ އައްޑަނަ ތިރިކޮށްލާނޭ ފުރުޞަތު އޭނާއަށް ދޭށެވެ. ގިނަ ފަހަރަށް އެއީ ވެސް ހަމަ އަހަރެމެންފަދަ ތަޖުރިބާތައް ހިއްސާކުރާ "އާދައިގެ އިންސާނުންކަން" އަހަރެމެންނަށް ދޭހަވަނީ، އެ "ދިފާޢުގެ ފާރު" ތަޅާލެވުނީމަ އެވެ. އެ ރީތިކަމުގެ ދަޅައަށް އެއްގޯސްވެ، އެ މީހާގެ ޝަޚުޞިއްޔަތު އެނގުނީމަ އެވެ.
