ވޮޝިންޓަން، އެމެރިކާ (ނޮވެމްބަރު 22) - އެމެރިކާގެ ވުސްކޯންސުން ސްޓޭޓުގައި ބެރިކޭޑްތައް ފަޅާލާފައި ދިޔަ ކާރަކުން ކްރިސްމަސް ޕެރޭޑުގެ ތެރެއަށް ވަދެ ގަތުމުން، ފަސް މީހުން މަރުވެ 40 މީހުންނަށް އަނިޔާވެއްޖެ އެވެ.
ކޮންމެ އަހަރަކު ވެސް ޗުއްޓީއާ ދިމާކޮށް ބާއްވާ ކްރިސްމަސް ޕެރޭޑުގެ ތެރެއަށް ދުއްވާފައި ދިޔައީ ރަތް ކުލައިގެ އެސްޔޫވީ ކާރެކެވެ. ވީޑިއޯތަކުން ފެންނަނީ ޕެރޭޑް ބަލަން ތިބި މީހުންގެ ކައިރިން ބާރު ސްޕީޑުގައި ގޮސް، ސްކޫލެއްގެ ބޭންޑު ކުދިންގެ ތެރެއަށް ވަންނަ މަންޒަރެވެ.
"ފަސް މީހަކު މަރުވެ، 40 މީހުންނަށް އަނިޔާވި. ނަމަވެސް އިތުރު މައުލޫމާތު ލިބޭ ވަރަކަށް އަދަދުތަކަށް ބަދަލު އަތުވެދާނެ،" ވައުކެޝާ ޕޮލިސް ޑިޕާޓްމަންޓުން ނެރުނު ބަޔާނެއްގައި ބުންޏެވެ.
ތުހުމަތު ކުރެވޭ މީހަކު ހައްޔަރުކޮށްފައި އެބަ ހުރި ކަމަށް ވެސް ފޭސްބުކްގައި އާއްމުކުރި ބަޔާނުގައި ވެ އެވެ. މަރުވި މީހުންގެ ތެރޭގައި ހިމެނެނީ ނަސާރާ ދީނުގެ ފާދިރީއަކާއި، ޗާޗުގެ ބައެއް މުވައްޒަފުންނާއި ވައުކެޝާ ކެތޮލިކް ސްކޫލުގެ ދަރިވަރުންނެވެ.
ފުލުހުންގެ ބެލުމުގެ ދަށަށް ކާރު ގެންގޮސްފައި ވާއިރު، މި ވަގުތު އިތުރު އެހެން ނުރައްކަލެއް ނެތް ކަމަށް ފުލުހުން ވަނީ ކަނޑައަޅާފަ އެވެ.
އަނިޔާވުމާ ގުޅިގެން 11 މީހުންނާއި 12 ކުދިން ހޮސްޕިޓަލަށް ގެންގޮސްފައި ވެ އެވެ. ހާދިސާ ހިނގި ވަގުތު ކާރު ހުއްޓުވުމުގެ ގޮތުން ފުލުހުން އެއަށް އަމާޒުކޮށް ބަޑި ވެސް ޖެހި އެވެ.
