ސްޓޮކްހޯމް، ސްވިޑަން (ނޮވެމްބަރު 22) - "ފަހަތަށް ދާ" ޑިމޮކްރަސީތަކުގެ ލިސްޓުގައި ފުރަތަމަ ފަހަރަށް އެމެރިކާ ހިމެނިފައިވާ ކަމަށް އިންޓަނޭޝަނަލް އައިޑިއާ ތިންކްޓޭންކުން ބުނެފި އެވެ.
ސްޓޮކްހޯމްގައި ހިންގާ އިންޓަނޭޝަނަލް އިންސްޓިޓިއުޓް ފޯ ޑިމޮކްރަސީ އެންޑް އިލެކްޓޯރަލް އެސިސްޓަންސް (އައިޑިއާ) އިން ބުނީ ދުނިޔޭގެ ކޮންމެ ހަތަރު މީހުންގެ ތެރެއިން އެކަކު ދިރިއުޅެނީ "ފަހަތަށް ދާ" ޑިމޮކްރަސީއެއް އޮތް ގައުމެއްގައި ކަމަށެވެ.
"މި އަހަރު، ފުރަތަހަ ފަހަރަށް އެމެރިކާގެ ޑިމޮކްރަސީ ފަހަތަށް ދާ ކަމަށް ހިމަނާފައި އެ ވަނީ. އަޅުގަނޑުމެންގެ ޑޭޓާ އިން ދައްކާ ގޮތުގައި އެމެރިކާގެ ޑިމޮކްރަސީ ފަހަތަށް ދާން ފެށީ 2019 ވަނަ އަހަރު،" އައިޑިއާގެ ގްލޯބަލް ސްޓޭޓް އޮފް ޑިމޮކްރަސީ ރިޕޯޓުގައި ބުންޏެވެ.
"އެމެރިކާ އަށް ހަރުދަނާކޮށް ޕަފޯމް ކުރާ ޑިމޮކްރަސީއެއް. އަދި 2020 ވަނަ އަހަރު ވަނީ ވަކި އަތަކަށް ނުޖެހި ސަރުކާރު ހިންގުމުގެ އިންޑިކޭޓަރުން ކުރިއެރުން ހޯދާފައި. އެކަމަކު މަދަނީ މިނިވަންކަން ހަނިވުމާއި، ސަރުކާރުގެ އަމަލުތައް ބަލަން ހުރި ހުރަސްތަކުން އަންގައިދެނީ ޑިމޮކްރަސީގެ އަސާސްތައް ތަންފީޒު ކުރުމުގައި ސީރިއަސް މައްސަލަތަކެއް ހުރިކަން،" ރިޕޯޓު ލިޔުމުގައި ބައިވެރިވި އެލެގްޒެންޑާ ހަޑްސަން ވިދާޅުވި އެވެ.
ރިޕޯޓުގައި ބުނީ އެމެރިކާގެ ޑިމޮކްރަސީ ފަހަތަށް ވެއްޓުމުގައި އެންމެ ބޮޑަށް ފާހަގަވީ 2020 ވަނަ ރިޔާސީ އިންތިހާބުގެ ނަތީޖާއާ މެދު ކުރީގެ ރައީސް ޑޮނަލްޑް ޓްރަމްޕް ސުވާލު އުފެއްދެވުން ކަމަށެވެ. އޭގެ އިތުރުން 2020 ވަނަ އަހަރުގެ ތެރޭގައި އެއްވެ އުޅުމަށް އޮތް ހުރަސްތައް އިތުރުވިކަން ފާހަގަކޮށްފައި ވެ އެވެ.
އައިޑިއާ ތިންކްޓޭންކުން 160 ގައުމެއްގެ ޑިމޮކްރަސީ ވަޒަން ކުރަނީ ފާއިތުވި 50 އަހަރު ބޭނުންކުރި އިންޑިކޭޓަރުތަކުގެ އެހީގައި ތިން ކެޓެގަރީއަކަށް ބަހައިގެންނެވެ. އެއީ ޑިމޮކްރަސީ އަދި ފަހަތަށް ދާ ޑިމޮކްރަސީ، ހައިބްރިޑް ސަރުކާރު އަދި ހުދުމުހުތާރު ސަރުކާރެވެ.
ރިޕޯޓުގައިވާ ގޮތުން ޑިމޮކްރަސީގައި އުޅޭ ގައުމުތަކަށް ވުރެ ހުދުމުހުތާރް ވެރިކަން އޮތް ގައުމުތައް 2020 ވަނަ އަހަރު އިތުރުވި އެވެ. މި އަހަރު ވެސް މި ޓްރެންޑް ދެމިގެންދާނެ ކަމަށް ލަފާކޮށްފައި ވެ އެވެ.
މި އަހަރުގެ މިހާތަނަށް ފާހަގަކޮށްފައި އޮތީ 98 ޑިމޮކްރަސީ އެވެ. ރަޝިއާ އާއި މޮރޮކޯ އަދި ތުރުކީ ހިމެނޭ ގޮތަށް 20 ހައިބްރިޑް ސަރުކާރު ނުވަތަ ޑިމޮކްރަސީ އާއި ހުދުމުހުތާރް ސިފަތައް ހިމެނޭ ސަރުކާރު ފާހަގަކޮށްފައި ވާއިރު، ހުދުމުހުތާރް ސަރުކާރެއް އޮތް 47 ގައުމު ހިމެނެ އެވެ. އޭގެ ތެރޭގައި ޗައިނާ، ސައުދީ އަރަބިއްޔާ، އިތިއޮޕިއާ އަދި އިރާން ފާހަގަކޮށްފައި ވެ އެވެ.
