ތެހްރާން، އިރާން (ނޮވެމްބަރު 21) - ފެނުގެ ދަތިކަމަށް ހައްލު ހޯދައި ދިނުމަށް ޑިމާންޑުކޮށް އިރާނުގެ އެތައް ހާސް ބަޔަކު ހުޅަނގު ޗަހަރް މަހަލް ބަހްތިއާރީ ޕްރޮވިންސްގެ ގަވަރުނަރުގެ އޮފީސް ކައިރީގައި މުޒާހަރާކޮށްފި އެވެ.
ގަވަރުނަރުގެ އޮފީސް ކައިރި އަށް ނިންމި ހިނގާލުމެއްގެ ގޮތުގައި މުޒާހަރާ ކުރިއަށް ދިޔަ އިރު، އިރާނުގެ މެދުތެރޭގައި އޮންނަ އިސްފަހާން ސިޓީގައި މީގެ ދެ ދުވަސް ކުރިން ވެސް އެތައް ހާސް ބަޔަކު އެއްވެ ނުރުހުން ފާޅުކުރި އެވެ.
މުޒާހަރާ ކުރާ މީހުން ހިތްހަމަނުޖެހިގެން އުޅެނީ ކޯރެއް ހިކި ފެން ނުލިބޭ މައްސަލައިގަ އެވެ. އެ ކޯރު ހިކިފައި ވަނީ އާދަޔާ ހިލާފަށް ހޫނުގަދަވުމުގެ އިތުރުން، ކޯރުގެ ފެން ދައުރު ކުރާ ރޫޓު ބަދަލުކުރުމުގެ ސަބަބުން ކަމަށް ރިޕޯޓުތައް ބުނެ އެވެ.
ފާއިތުވި 10 އަހަރުގެ ތެރޭގައި އާދަޔާ ހިލާފަށް ހޫނުގަދަވުމާ ހެދި ތަފާތު އެކި މައްސަލަތައް އިރާނަށް ވަނީ ދިމާވެފަ އެވެ. ހަމަ އެގޮތަށް ބައެއް ހިސާބުތަކަށް މާ ގިނައިން ވާރޭވެހި ފެންބޮޑުވުމުގެ މައްސަލަ ވެސް ފަހަކަށް އައިސް ދިމާވެފައި ވެ އެވެ.
ސައިންސްވެރިން ބުނާ ގޮތުގައި އާދަޔާ ހިލާފަށް ހޫނުގަދަވުމުގެ މައްސަލަ އަހަރުން އަހަރަށް ގޯސްވަމުން ދަނީ މޫސުމީ ބަދަލާ ހެދި އެވެ. މާ ގިނައިން ހޫނުވާ މައްސަލަ ދިމާވާން ފެށުމުން ފެނުގެ އިތުރުން ކާބޯތަކެތީގެ ސެކިއުރިޓީ ވެސް ނުރައްކަލަށް ހުށަހެޅެ އެވެ.
ދައުލަތުގެ ޓީވީން ބުނީ ޗަހަރް މަހަލް ބަހްތިއާރީ ޕްރޮވިންސްގެ ޒަގްރޯސް ފަރުބަދަތަކުން އިސްފަހާން ސިޓީ ތެރެއިން ދައުރުވާ ޒަޔަދްނޭހް ރޫދް ކޯރުގެ ފެންގަނޑު ހިކުމާ އެކު ކައިރި ހިސާބުތަކުގައިވާ ވަޅުތަކުން ވެސް ފެން ނުލިބޭ ކަމަށެވެ.
ދެހާސް ވަނަ އަހަރުން ފެށިގެން އެ ކޯރުން ފެން ހިކެމުން ގޮސްފައި ވާއިރު، ފެނުގެ ދަތިކަމާ ހެދި އެތައް ސަތޭކަ ދަނޑުވެރިން ވެސް މުޒާހަރާކޮށްފައި ވެ އެވެ.
މި މަހުގެ ކުރީކޮޅު ރައީސް އިބްރާހިމް ރައިސީ ވިދާޅުވީ ފެނުގެ މައްސަލަ ހައްލު ކުރައްވާނެ ކަމަށާއި ފެން ހިކިގެން އުޅޭ ކޯރު އަލުން އާރޯކުރުމަށް ހާއްސަ ކޮމިޓީއެއް އުފައްދަވާނެ ކަމަށެވެ.
