ގުދުސް (ނޮވެމްބަރު 21) - ގުދުސްގެ އޯލްޑް ސިޓީގައި އާދީއްތަ ދުވަހު ބަޑި ޖަހައި އެކަކު މަރުވެ ތިން މީހުންނަށް އަނިޔާވެފައިވާ ކަމަށް އިޒްރޭލުގެ ފުލުހުންނާއި ސިއްހީ އޮފިޝަލުން ބުނެފި އެވެ.
ހަމަލާގައި އަނިޔާވީ އާއްމު ދެ މީހުންނާއި ދެ ފުލުހަކަށެވެ. އެ މީހުންނަށް ހޮސްޕިޓަލުގައި ފަރުވާ ދެނިކޮށް އުމުރުން 30 އަހަރުގެ މީހަކު މަރުވެފައިވާ ކަމަށް އޮފިޝަލުން ބުންޏެވެ. ނަމަވެސް އޭނާއާ ބެހޭ ތަފްސީލް އާއްމެއް ނުކުރެ އެވެ.
"ސަބްމެޝިން ބަޑިއެއް ހިފައިގެން އުޅުނު ޓެރަރިސްޓަކު ވަނީ އޯލްޑް ސިޓީގައި ބަޑި ޖަހާފައި،" އިޒްރޭލް ފުލުހުން ނެރުނު ބަޔާނެއްގައި ބުންޏެވެ.
ފުލުހުން ބުނީ "ޓެރަރިސްޓުގެ" ގަޔަށް ބަޑި ޖަހައި މަރާލާފައިވާ ކަމަށެވެ. އޯލްޑް ސިޓީ އަކީ އިޒްރޭލުން ވެރިވެގަނެގެން އުޅޭ ގުދުސްގެ އިރުމަތީގެ ހިސާބެކެވެ. އެ ތަނުގައި ވަރަށް ގިނައިން އިޒްރޭލް ފުލުހުންނަށް ހަމަލާތައް އަމާޒުވެ އެވެ.
މިދިޔަ ބުދަ ދުވަހު އޯލްޑް ސިޓީގައި ވަޅިއަކުން ދެ ފުލުހުންނަށް ހަމަލާ ދިން ފުރާވަރު އުމުރުގެ ކުއްޖެއްގެ ގަޔަށް ބަޑި ޖަހައި މަރާލި އެވެ.
މިދިޔަ ސެޕްޓެމްބަރު މަހު އަލް އަގްސާ މިސްކިތަށް ދާން އޮންނަ މަގުގައި ފުލުހުންނަށް ވަޅިން ހަމަލާ ދޭން އުޅުނު ކަމަށް ބުނެ، އަންހެނެއްގެ ގަޔަށް ބަޑި ޖަހައި މަރާލި އެވެ.
އިޒްރޭލުން އިރުމަތީ ގުދުސް ހިފީ 1967 ގައި ކުރި ހަނގުރާމަ އަށް ފަހު އެވެ. އެއީ އިޒްރޭލުގެ ބިމަކަށް ހަދައިގެން އުޅުނު ނަމަވެސް ބައިނަލްއަގްވާމީ މުޖުތަމައިން އެކަން ބަލައެއް ނުގަނެ އެވެ.
